Romans 4
အာဗြဟံ၏ ဘဝ အကြောင်း
1ယင်းပိုင်ဆိုကေ ငါရို့မာ အဖိုးအဖီးအစိုင်လာ အာဗြဟံ၏ အကြောင်းနပတ်သပ်ရို့ ငါရို့ ဇာ ပြောဖို့လည်း? ကျုံခြင်းတရား အကြောင်းနပတ်သပ်ရို့ သူ့မာ ဇာပိုင် အတွိအကြုံ ဟိလီရေလည်း? 2ထာဝရဘုရားစာ အာဗြဟံကို သူ့အလုပ်အကြောင်းန သူတော်ကောင်းအဖြစ် လက်ခံလီရေဆိုကေ သူ့မာ ဘော်ကြော့ကြင်းစရာ ဟိနိုင်ရေ။ ယေကေလည်း အမှန် စကား ပြောလိုက်ဖို့ဆိုကေ ထာဝရဘုရား၏ ရှိက သူ့မာ ဘော်ကြော့ကြင်းစရာ တစ်ခုလည်း မဟိ။ 3ကျမ်းစာမာ ရွီးရို့ ဟိရေ၊ “အာဗြဟံစာ ထာဝရဘုရားကို ကျုံလီရေအတွက်န ထာဝရဘုရားစာ သူ့ကို သူတော်ကောင်းအဖြစ် လက်ခံလီရေ။” 4လူတစ်ယောက်မာ အလုပ်လုပ်ရို့ အခကို ရရေဆိုကေ ထိုအခစာ လက်ဆောင် မဟုတ်၊ သူ့မာ ရစုသင့်ရာ ဖြစ်တေ။ 5ယေကေလည်း အသူမဆို ကိုယ့်အလုပ်ကို အားမကိုးဘိုင်းန ထာဝရဘုရားကို ကျုံရေဆိုကေ ထာဝရဘုရားစာ သူ့ကျုံခြင်းတရားအကြောင်းန သူတော်ကောင်းအဖြစ် လက်ခံရေ၊ အကြောင်းကား ထာဝရဘုရား တစ်ပါးတည်းရာ ရိုသေကြောက်လန့်ခြင်း မဟိသူရို့ကို သူတော်ကောင်းအဖြစ် လက်ခံနိုင်ရေ။ 6ကောင်းမှုကုသိုလ် မပါဘိုင်း သူတော်ကောင်းအဖြစ် ထာဝရဘုရား၏ လက်ခံခြင်းကို ရသူကို ဒါဝိဒ်မင်းလည်း မင်္ဂလာ ဟိရေ ဟို့ ပြောလီရေ။ 7ဒါဝိဒ်မင်းစာ ပြောလီရေ၊“မတရားလုပ်ခြင်းက ခွင့်ရွှတ်ခြင်းကို ခံရသူရို့စာ မင်္ဂလာ ဟိကတ်တေ၊
အပြစ် ဖုံးထားခြင်းကို ခံရသူရို့စာ မင်္ဂလာ ဟိကတ်တေ။
8အရာ အသူ့အပြစ်ကိုမဆို အသျှင်ထာဝရဘုရား
မှတ်ရို့ မထားဆိုကေ သူစာ မင်္ဂလာ ဟိရေ။” 9ဒေမာ သက်သက် အရီဖျားလှီးမင်္ဂလာကို ခံယူသူရို့ကို ပြောလီစာလော? အရီဖျားလှီးမင်္ဂလာကို မခံယူသူရို့ကိုလည်း ပြောလီစာ မဟုတ်လော? ဟုတ်တေ၊ အရီဖျားလှီးမင်္ဂလာကို မခံယူသူရို့ကိုလည်းသောက် ပြောလီရေ၊ အကြောင်းကား၊ “အာဗြဟံစာ ထာဝရဘုရားကို ကျုံရေအတွက်န ထာဝရဘုရားစာ သူ့ကို သူတော်ကောင်းအဖြစ် လက်ခံလီရေ” ဟို့ ငါရို့ ပြောကတ်စာ ဖြစ်တေ။ 10ထာဝရဘုရား အာဗြဟံကို သူတော်ကောင်းအဖြစ် လက်ခံလီရေခါ အာဗြဟံစာ အရီဖျားလှီးမင်္ဂလာကို ခံယူလီဗျာလော၊ မခံယူလီသိလော? အရီဖျားလှီးမင်္ဂလာကို မခံယူခင်အယင်က သူတော်ကောင်းအဖြစ် လက်ခံလီစာ ဖြစ်တေ၊ အရီဖျားလှီးမင်္ဂလာကို ခံယူပြီးခါ မဟုတ်။ 11အာဗြဟံစာ အရီဖျားလှီးမင်္ဂလာကို မခံယူခင်အယင်ကပင် သူ၏ ကျုံခြင်းတရားအကြောင်းန သူတော်ကောင်းအဖြစ် လက်ခံခြင်းကို ရလီရေ။ သူတော်ကောင်းအဖြစ် လက်ခံခြင်းကို ရစာသက်သီအဖြစ် သူစာ အရီဖျားလှီးမင်္ဂလာကို ခံယူလီရေ။ ယင်းအတွက်န သူစာ အရီဖျားလှီးမင်္ဂလာကို မခံရကေလည်း ထာဝရဘုရားကို ကျုံခြင်းကနီရို့ သူတော်ကောင်းအဖြစ် လက်ခံခြင်းကို ရသူရို့မာ အဖ ဖြစ်တေ။ 12ယင်းသျှင့်ကိုအပယ် အာဗြဟံစာ အရီဖျားလှီးမင်္ဂလာကို ခံယူသူရို့မာလည်း အဖ ဖြစ်တေ၊ ယေကေလည်း သူရို့ အရီဖျားလှီးမင်္ဂလာကို ခံယူခြင်းကနီရို့ အဖ တော်ကတ်စာ မဟုတ်။ အာဗြဟံပိုင် အရီဖျားလှီးမင်္ဂလာကို မခံယူခင်အယင်က ကျုံခြင်းတရားန နီထိုင်လီကတ်တေအတွက်န သူရို့မာ အဖ တော်ကတ်စာ ဖြစ်တေ။
ကျုံခြင်းတရားကနီရို့ ဂတိတော်ကို ခံရခြင်း
13ဒေ လောကကို အာဗြဟံ ပိုင်ဆိုင်လိမည် ဆိုပြီးကေ ထာဝရဘုရားစာ အာဗြဟံန သူ့အမျိုးအနွယ်သားရို့ဘားမာ ဂတိခံလီရေ။ ပညှတ်တရားကို လိုက်နာရေအတွက်န သူ့ဘားမာ ထိုဂတိတော်ကို ခံလီစာ မဟုတ်။ ယေကေလည်း သူစာ ကိုယ့်ကျုံခြင်းတရား အကြောင်းန သူတော်ကောင်းအဖြစ် လက်ခံခြင်းကို ရလီရေ အရာ ယင်းအတွက်န သူစာ ထိုဂတိတော်ကို ခံရလီစာ ဖြစ်တေ။ 14လူရို့စာ ပညှတ်တရားကို လိုက်နာရို့ ထာဝရဘုရား ပီးဖို့ခံထားစာ ဂတိတော်ကို ခံရရေဆိုကေ ကျုံခြင်းတရားစာ တစ်ခုလည်း အသုံးမဝင်ဗျာ အရာ ထာဝရဘုရား၏ ဂတိတော်လည်းသောက် တစ်ခုလည်း တန်ဖိုး မဟိဗျာ။ 15ယင်းအဓိပ္ပါယ် ဖြစ်တေကား၊ ပညှတ်တရားစာ အမြဲတိုင်း ထာဝရဘုရားက အပြစ်ဒါဏ်ကို ယူလာရေ၊ အကြောင်းကား ပညှတ်တရားကို တစ်ယောက်လည်း အပြည့်အစုံ လိုက်နာဖို့ မနိုင်ကတ်။ ယေကေလည်း ပညှတ်တရား မဟိစာနေရာမာ ပညှတ်တရားကို ဖျက်ဖို့စာလည်း မဟိ။ 16ယင်းအတွက်န လူရို့စာ ကိုယ်ရို့မာ ကျုံခြင်းတရားကနီရို့ ထာဝရဘုရား၏ ဂတိတော်ကို ခံရကတ်တေ၊ အကြောင်းကား ထာဝရဘုရားစာ ထိုဂတိတော်ကို လက်ဆောင်အဖြစ် အခမဲ့ ပီးချင်လီရေ။ ယင်းအတွက်န အာဗြဟံန သူ့အမျိုးအနွယ်သားရို့ အားကုံးသူလည်း အခမဲ့ လက်ဆောင်အဖြစ် ထိုဂတိတော်ကို ခံရကတ်လိမည်။ ထိုဂတိတော်စာ သက်သက် ပညှတ်တရားကို လိုက်နာသူရို့ ခံရကတ်ဖို့စာ မဟုတ်။ ယင်းထက်ပင် အာဗြဟံပိုင် ထာဝရဘုရားကို ကျုံသူရို့ အားကုံးသူလည်း ထိုဂတိတော်ကို ခံရကတ်လိမည်၊ အကြောင်းကား အာဗြဟံစာ ဟိသမျ ကျုံသူရို့မာ အဖ ဖြစ်တေ။ 17ကျမ်းစာမာ ရွီးရို့ ဟိရေ၊ “ငါ နင့်ကို လူမျိုး အများကြီးရို့မာ အဖ ဖြစ်စီဗျာ။” ထာဝရဘုရားစာ သီသူရို့ကို ပြန်ရှင်ထမြောင့်စီရေ အရာ တစ်ခုလည်း မဟိစာက ဖန်ဆင်းရေ။ အာဗြဟံစာ ထိုထာဝရဘုရားကို ကျုံလီရေ။ 18အာဗြဟံမာ သားသမီး ရဖို့ ဟို့ တစ်ခုလည်း မျှော်လင်းချက် မဟိလီ၊ ယေကေလည်း သူစာ ထာဝရဘုရားကို ကျုံရို့ မျှော်လင်းနီလီရေ။ ထာဝရဘုရားစာ သူ့ကို ပြောလီရေ၊ “နင့် အမျိုးအနွယ်သားရို့စာ ဂေါင်းခင်မာဟိစာ ကြယ်တိန အရှိရှိ ပွါးကတ်လိမည်။” ထာဝရဘုရား၏ စကားအတိုင်း အာဗြဟံစာ လူမျိုး အများကြီးရို့မာ အဖ ဖြစ်လာလီရေ။ 19ယင်းခါ အာဗြဟံမာ အသက်တစ်ရာ ပြည့်ဖို့ပါးလားခလီရေ။ ယင်းအတွက်န အာဗြဟံ သိလီစာကား၊ သူ့ခန္ဓာမာ သားသမီး ရဖို့စာ တန်ခိုး မဟိလီဗျာ အရာ သူ့မာ မယား စာရာလည်း သားသမီး မွီးဖွားဖို့စာ အသက်အရွှယ် မဟိဗျာ။ ယေကေလည်း သူ့မာ ကျုံခြင်းတရားစာ အားနည်းခြင်း မဟိလီ။ 20ထာဝရဘုရား၏ ဂတိတော် အကြောင်းနပတ်သပ်ရို့ သူ့စိတ်မာ တစ်ခါလည်း မယုံသင်္ခါ မဖြစ်လီ။ ယင်းထက်ပင် သူ့မာ ကျုံခြင်းတရားစာ အရာလည်း ခိုင်မာရို့ ထာဝရဘုရား၏ ဘုန်းတန်ခိုးကို ချီမွမ်းလီရေ။ 21ကိုယ်ခံထားစာ ဂတိတော်အတိုင်း ထာဝရဘုရား လုပ်ပီးနိုင်ရေဆိုစာကို အာဗြဟံစာ အပြည့်အစုံ ကျုံလီရေ။ 22ယင်းအတွက်န ထာဝရဘုရားစာ အာဗြဟံကို သူတော်ကောင်းအဖြစ် လက်ခံလီရေ။ 23“သူတော်ကောင်းအဖြစ် လက်ခံလီရေ” ဟို့ ပြောစာစကားစာ သက်သက် အာဗြဟံအတွက် ရွီးထားခလီစာ မဟုတ်၊ 24ငါရို့အတွက်လည်း ရွီးထားခလီစာ ဖြစ်တေ။ ငါရို့ ကျုံခြင်းတရားအကြောင်းန ထာဝရဘုရားစာ ငါရို့ကိုလည်း သူတော်ကောင်းအဖြစ် လက်ခံဖို့၊ အကြောင်းကား ငါရို့မာ အသျှင်ယေရှုကို သီရာက ပြန်ရှင်ထမြောင့်စီလီစာ ထာဝရဘုရားကိုရာ ငါရို့ ကျုံကတ်တေ။ 25ငါရို့ အပြစ်အကြောင်းန အသီခံစီဖို့အတွက် ထာဝရဘုရားစာ ယေရှုကို သီခြင်းတရားအလက်မာ တင်အပ်လီရေ အရာ ငါရို့ကို သူတော်ကောင်းအဖြစ် လက်ခံဖို့အတွက် ယေရှုကို သီရာက ပြန်ရှင်ထမြောင့်စီလီရေ။
Copyright information for
RmzSC