Romans 7
တရားဥပဒေက ရွတ်ခြင်း
1ညီအစ်ကိုမောင်နမှရို့၊ နင်ရို့ကား ပညှတ်တရားကို နားလည်ကတ်တေ။ လူစာ အသက်အရှင် ဟိသရိကာလပတ်လုံး ပညှတ်တရားအောက်မာ နီရရေဆိုစာကို နင်ရို့ အမှန် သိကတ်တေ မဟုတ်လော? 2ငါ ပုံဥပမာတစ်ခု တင်ပြမည်။ မိန်းမတစ်ယောက်စာ ကိုယ့်လင်အသက်အရှင် ဟိသရိကာလပတ်လုံး အိမ်ထောင်ရေးနဆိုင်စာ တရားဥပဒေအောက်မာ နီရရေ။ ယေကေလည်း လင် သီလားခပြီးရေနောက် ထိုမိန်းမစာ အိမ်ထောင်ရေးနဆိုင်စာ တရားဥပဒေက ရွတ်တေ။ 3ယင်းအတွက်န ထိုမိန်းမစာ ကိုယ့်လင် အသက်အရှင် ဟိရေခါ အခြားယောက်ျား တစ်ယောက်ကို နစပ်တေဆိုကေ သူစာ ကာမဂုဏ် ပြစ်မှားသူ ဟို့ အခေါ် ခံရရေ။ ယေကေလည်း သူ့မာ လင် သီလားခရေဆိုကေ သူစာ အိမ်ထောင်ရေးနဆိုင်စာ တရားဥပဒေ၏ ချိုင်နှောင်ခြင်းက ရွတ်တေ။ ယင်းခါ သူစာ အခြားယောက်ျား တစ်ယောက်ကို နစပ်တေဆိုကေ ကာမဂုဏ် ပြစ်မှားသူ ဟို့ အခေါ် မခံရ။ 4ငါ့ ညီအစ်ကိုမောင်နမှရို့၊ ယင်းပိုင်တထန် ခရစ်တော်၏ ကိုယ်ခန္ဓာကနီရို့ နင်ရို့မာ ဘဝအဟောင်းလည်း သီလားခဗျာ အရာ နင်ရို့စာ ပညှတ်တရား၏ ချိုင်နှောင်ခြင်းက ရွတ်ကတ်ပျာ။ ထာဝရဘုရားအတွက် ကောင်းမြတ်စာ အလုပ်ကို လုပ်ဖို့အတွက် နင်ရို့စာ သီရာက ပြန်ရှင်ထမြောင့်လီစာ ယေရှုခရစ်တော်၏ လူဖြစ်ကတ်ပျာ။ 5ငါရို့ ဇာတိပကတိအောက်မာ ဟိလီရေခါ ပညှတ်တရားစာ ငါရို့အထဲမာ အပြစ်၏ အလိုဆန္ဒကို နှိုးဆော်ရို့ ပီးနီလီရေ အရာ ထိုအပြစ်၏ အလိုဆန္ဒစာ ငါရို့ ကိုယ်ခန္ဓာကို အုပ်ချုပ်ရို့ ထားလီရေ။ ယင်းအတွက်န ငါရို့မာ အပြစ်၏ အလုပ်တိစာ ငါရို့အတွက် ဝိညာဉ်၏ သီခြင်းတရားကို ယူလာလီရေ။ 6တစ်ချိန်ခါ ပညှတ်တရားစာ ထောင်ကျသားကိုပိုင် ငါရို့ကို ချိုင်နှောင်ရို့ ထားလီရေ။ ယေကေလည်း ဒေဂု ငါရို့မာ ဘဝအဟောင်းစာ သီလားခဗျာ အရာ ငါရို့ ပညှတ်တရား၏ ချိုင်နှောင်ခြင်းက ရွတ်ကတ်ပျာ။ ယင်းအတွက်န ငါရို့ ဒေဂု နည်းလမ်းအသစ်ကနီရို့ ထာဝရဘုရားကို ဝတ်ပြုနိုင်ကတ်တေ၊ ယေကေလည်း ပညှတ်တရားမာ ရွီးထားစာ နည်းလမ်းအတိုင်း မဟုတ်။ ယင်းထက်ပင် နည်းလမ်းအသစ်ကနီရို့ သန့်ရှင်းသောဝိညာဉ်တော်၏ ညွှန်ပြချက်အတိုင်း ထာဝရဘုရားကို ဝတ်ပြုနိုင်ကတ်စာ ဖြစ်တေ။ပညှတ်တရား ငါရို့ကို လွတ်မြောင့်ခြင်း မပီးနိုင်
7ယင်းပိုင်ဆိုကေ ပညှတ်တရားကို မကောင်း ဟို့ ငါရို့ ပြောဖို့စာလော? ယင်းပိုင်လည်း မပြော။ ယင်းထက်ပင် ပညှတ်တရား မဟိဆိုကေ အပြစ် ဇာလည်းဆိုစာကို ငါ သိလီဖို့ မဟုတ်။ ပညှတ်တရားမာ “လောဖ မတတ်ရ” ဟို့ မပြောဆိုကေ လောဖ ဇာလည်းဆိုစာကို ငါ သိလီဖို့ မဟုတ်။ 8ယေကေလည်း အပြစ်စာ ထိုပညှတ်ချက်၏ အခွင့်ရေးကို ယူရို့ ငါ့အထဲမာ အမျိုးမျိုး လောဖစိတ်ကို နှိုးဆော်ရို့ ပီးလီရေ၊ အကြောင်းကား ပညှတ်တရား မဟိဆိုကေ အပြစ်စာ အသီပိုင် ဖြစ်နီရေ။ 9တစ်ချိန်ခါ ငါစာ ပညှတ်တရားကို နားမလည်ဘိုင်းန အသက်အရှင် ဟိလီရေ၊ ယေကေလည်း ပညှတ်တရားကို နားလည်ရေချက်ချင်း အပြစ်လည်း ရှင်ရို့ ထလီရေ။ 10ယင်းနောက် ငါစာ အပြစ် အကြောင်းန ဝိညာဉ်ရေးဖက်က သီလီရေ။ ပညှတ်တရား၏ ပညှတ်ချက်တိစာ လူကို အသက်ပီးဖို့ စကား ဟိလီရေ၊ ယေကေလည်း ထိုပညှတ်ချက်တိစာ ငါ့ကို အသီသတ်လီရေ၊ 11အကြောင်းကား ထိုပညှတ်ချက်၏ အခွင့်ရေးကို ယူရို့ အပြစ်စာ ငါ့ကို လိမ်လှည့်လီရေ အရာ အပြစ်စာ ထိုပညှတ်ချက်ကို အသုံးပြုရို့ ငါ့ကို ဝိညာဉ်ရေးဖက်က အသီသတ်လီရေ။ 12ယေကေလည်း ပညှတ်တရားစာ သန့်ရှင်းရေ အရာ ပညှတ်တရားအထဲမာ ရွီးထားစာ ပညှတ်ချက်လည်း သန့်ရှင်းရေ၊ ရိုးသားရေ အရာ ကောင်းမြတ်တေဆိုစာ စကား မှန်ရေ။ 13ယင်းပိုင်ဆိုကေ ကောင်းမြတ်စာ ပညှတ်တရား ငါ့ကို အသီသတ်လီရေလော? တစ်ခါလည်း မသတ်! ယင်းထက်ပင် အပြစ်စာ ကောင်းမြတ်စာကို အသုံးပြုရို့ ငါ့ကို အသီသတ်လီရေ။ ယင်းအတွက်န အပြစ် ဇာလှောက် ဆိုးယုတ်တေလည်းဆိုစာကို ငါရို့ သိရရေ။ အပြစ်စာ ထာဝရဘုရား၏ ကောင်းမြတ်စာ ပညှတ်ချက်တိကို ကိုယ့်ဆိုးယုတ်စာ ရွယ်မှတ်ချက်အတွက် အသုံးပြုရေ။လူအထဲမာဟိစာ သဖေါတရားနှစ်မျိုး
14ပညှတ်တရားစာ ဝိညာဉ်ရေးန ဆိုင်ရေဆိုစာကို ငါရို့ သိရေ၊ ယေကေလည်း ငါစာ အပြစ်၏ အုပ်ချုပ်ခြင်းကို ခံရရေအတွက်န အပြစ်၏ ကျွန် ဖြစ်နီဗျာ။ 15ငါ ကိုယ်တိုင် ဇာ လုပ်တေလည်းဆိုစာကို ငါ မသိ၊ အကြောင်းကား ငါ လုပ်ချင်စာတိကို ငါ မလုပ်။ ယင်းထက်ပင် ငါ ရွန်စာတိကိုရာ ငါ လုပ်နီရေ။ 16ငါ ဆိုးယုတ်တေ ဟို့ မှတ်စာတိကို ငါ လုပ်တေခါ ပညှတ်တရား ကောင်းရေဆိုစာကို ငါ ဝန်ခံရေ။ 17ယင်းပိုင်ဆိုကေ မြင်ရစာကား၊ ငါ ကိုယ်တိုင် ထိုအလုပ်တိကို လုပ်နီစာ မဟုတ်၊ ယေကေလည်း ငါ့အထဲမာဟိစာ အပြစ်စာ ငါ့ကို အသုံးပြုရို့ ထိုအလုပ်တိကို လုပ်နီရေ။ 18ငါ့အထဲမာ ကောင်းမြတ်စာ တစ်ခုလည်း မဟိဆိုစာကို ငါ သိရေ။ ယင်းအဓိပ္ပါယ်ကား ငါ့ဇာတိပကတိအထဲမာ ကောင်းမြတ်စာ တစ်ခုလည်း မဟိဆိုစာကို ငါ သိရေ။ ငါစာ အမှန် ကောင်းမြတ်စာ အလုပ်တိကို လုပ်ချင်ကေလည်း ငါ လုပ်ဖို့ မနိုင်။ 19ငါ လုပ်ချင်စာ ဟိသမျ ကောင်းမြတ်စာ အလုပ်တိကို ငါ မလုပ်၊ ယေကေလည်း ငါ မလုပ်ချင်စာ ဆိုးယုတ်စာ အလုပ်တိကိုရာ ငါ လုပ်နီရေ။ 20ငါစာ ကိုယ် မလုပ်ချင်စာ အလုပ်ကို လုပ်တေဆိုကေ ငါ ကိုယ်တိုင် ထိုအလုပ်ကို လုပ်စာ မဟုတ်၊ ယေကေလည်း ငါ့အထဲမာဟိစာ အပြစ်စာ ငါ့ကို အသုံးပြုရို့ ထိုအလုပ်ကို လုပ်နီစာ ဖြစ်တေ။ 21ယင်းအတွက်န ငါ့အထဲမာ အလုပ်လုပ်နီစာ သဖေါတရား တစ်ခုကို ငါ မြင်ရရေ။ ထိုသဖေါတရား ဖြစ်တေကား၊ ငါ ကောင်းမြတ်စာ အလုပ်တိကို လုပ်ချင်ရေခါ ဆိုးယုတ်ခြင်းစာ ငါ့အထဲမာ အမြဲတိုင်း ရောက်ရို့ ဟိရေ။ 22ငါ ဟိသမျ စိတ်နှလုံးန ထာဝရဘုရား၏ ပညှတ်တရားကို ချစ်တေ။ 23ယေကေလည်း ငါ့ခန္ဓာအထဲမာ အလုပ်လုပ်နီစာ အခြားသဖေါတရား တစ်ခုကို ငါ မြင်ရရေ။ ထိုသဖေါတရားစာ ငါ့စိတ်နှလုံးကို ဆန့်ကျင်ရို့ တိုက်ဆိုင်နီရေ။ ငါ့ခန္ဓာအထဲမာ အလုပ်လုပ်နီစာ သဖေါတရားစာ အပြစ်၏ သဖေါတရား ဖြစ်တေ အရာ ထိုသဖေါတရားစာ ငါ့ကို ဖမ်းရို့ ချိုင်နှောင်ထားရေ။ 24ငါ ဇာပိုင် နဖူးဇာကန်ဆိုးသူတစ်ယောက် ဖြစ်တေလည်း! ငါ့မာ ဒေ သင်္ခါရ ခန္ဓာအထဲက ငါ့ကို အသူ ကယ်တင်ဖို့လည်း? 25ထာဝရဘုရားစာ ငါ့ကို အသျှင်ယေရှုခရစ်တော်ကနီရို့ ကယ်တင်ဖို့! ယင်းအတွက်န ငါ ထာဝရဘုရားကို ကျေးဇူးတင်ရေ။ ယင်းပိုင်ဆိုကေ မြင်ရစာကား၊ ငါ့စိတ်နှလုံးစာ ထာဝရဘုရား၏ ပညှတ်တရားကို လိုက်နာချင်ရေ၊ ယေကေလည်း ဇာတိပကတိအကြောင်းန ငါစာ အပြစ်၏ ကျွန် ဖြစ်နီရေ။
Copyright information for
RmzSC