Romans 9
ထာဝရဘုရားန ယုဒလူမျိုး အကြောင်း
1– 2ငါ ခရစ်တော်န တစ်ကိုယ်တည်း ဖြစ်ရို့ မှန်ကန်စာ စကားကို ပြောရေ၊ ငါ မုတ်သားစကား ပြောစာ မဟုတ်။ ငါ မှန်ကန်စာ စကားကို ပြောစာကား၊ ကိုယ့်လူမျိုးအတွက် ငါ့နှလုံးသားထဲမာ စိတ်ဆိုးဝမ်းနည်းခြင်းန ဝေဒနာကို ခံရနီရေ။ ဒေ အကြောင်းကို ငါ့အသိညာဏ်လည်း သန့်ရှင်းသောဝိညာဉ်တော်၏ တန်ခိုးန သက်သီပီးနီရေ။ 3သူရို့စာ ငါ့ညီအစ်ကိုမောင်နမှရို့န ငါ့လူမျိုးရို့ ဖြစ်ကတ်တေ။ ငါ သူရို့ကို ကူညီဖို့ စိတ်သဖေါ ဟိရေ! ယင်းထက်မက ဖြစ်နိုင်ရေဆိုကေ ငါ ကိုယ်တိုင် သူရို့တက်စား ခရစ်တော်န ဝီးကွာဖို့စာ ကျိန်ဆဲခြင်းကို ခံယူချင်ရေ၊ 4အကြောင်းကား သူရို့စာ ဣသရေလလူမျိုး ဖြစ်ကတ်တေ။ ထာဝရဘုရားစာ သူရို့ကို သားသမီးဖြစ်ဖို့ အခွင့် ပီးလီရေ၊ ကိုယ့်ဘုန်းတန်ခိုးကို သူရို့ဘားမာ ဖေါ်ပြလီရေ၊ သူရို့အတွက် စာချုပ်ထိုးလီရေ၊ ပညှတ်တရား ပီးလီရေ၊ ဝတ်ပြုကိုးကွယ်ဖို့စာ နည်းလမ်းကို ပြပီးလီရေ အရာ ဂတိတော် အများကြီး ပီးလီရေ။ 5သူရို့စာ ငါရို့မာ ကြီးမြတ်စာ အဖိုးအဖီးအစိုင်လာရို့မာ အမျိုးအနွယ်သား ဖြစ်ကတ်တေ။ အရာ ခရစ်တော်စာ လူ့ဇာတိအဖြစ် သူရို့ အမျိုးအနွယ်က မွီးဖွားလာလီရေ။ သူစာ ဟိသမျ အားကုံးကို အုပ်ချုပ်စာ ထာဝရဘုရား ဖြစ်တေ။ သူစာ ထာဝရပတ်လုံး ဟိသမျ ချီမွမ်းခြင်းကို ခံရပါစီ။ အာမန်။ 6ယေကေလည်း ထာဝရဘုရား၏ ဂတိတော်မတည် ဟို့ ငါ ပြောချင်စာ မဟုတ်၊ အကြောင်းကား ဣသရေလလူမျိုးအထဲမာ မွီးဖွားခြင်းကို ခံရသူရို့ အားကုံးသူ ဣသရေလလူမျိုး အစစ် မဟုတ်။ 7အရာ သူရို့စာ အာဗြဟံ၏ အမျိုးအနွယ်သား ဖြစ်ကတ်ကေလည်း အာဗြဟံ၏ သားသမီး အစစ် မဟုတ်။ ယေကေလည်း ကျမ်းစာမာ ရွီးရို့ ဟိရေ၊ “ဣဇာက်၏ အမျိုးအနွယ်ကိုရာ နင့် အမျိုးအနွယ် ကိုင်လိမည်။” 8ယင်းအဓိပ္ပါယ်ကား၊ အာဗြဟံ၏ အမျိုးအနွယ်က မွီးဖွားခြင်းကို ခံရသူရို့ အားကုံးသူ ထာဝရဘုရား၏ သားသမီး အစစ် မဟုတ်။ ယေကေလည်း ထာဝရဘုရား၏ ဂတိတော်အတိုင်း မွီးဖွားခြင်းကို ခံရသူရို့ရာ အာဗြဟံ၏ အမျိုးအနွယ်သား အစစ် ဖြစ်ကတ်တေ ဟို့ သတ်မှတ်ခြင်းကို ခံရကတ်လိမည်၊ 9အကြောင်းကား ထာဝရဘုရားစာ အာဗြဟံဘားမာ ဒေပိုင် ဂတိခံထားလီရေ၊ “အချိန်တိုင်ရေခါ ငါ ပြန်လာဖို့ အရာ စာရာမာ သားယောက်ျား တစ်ယောက် မွီးဖွားလိမည်။” 10သက်သက် ယင်းသျှင့် မဟုတ်သိ၊ ရေဗက္ကမာ ငါရို့ အဖိုးအဖီးအစိုင်လာ ဣဇာက်န သားနှစ်ယောက် မြင်လီရေ။ 11– 12ထိုသားနှစ်ယောက် မမွီးဖွားခင်အယင်ကပင် အရာ အကောင်းအဆိုး တစ်ခုလည်း မလုပ်ခင်အယင်ကပင် ထာဝရဘုရားစာ ရေဗက္ကကို ပြောလီရေ၊ “သားအကြီးစာ သားအသျှေဘားမာ ကျွန်ခံရဖို့။” ထာဝရဘုရား ပြပီးလီစာကား၊ ထိုသားအသျှေစာ ထာဝရဘုရား၏ ရွယ်မှတ်ချက်အတိုင်း ရွီးကောက်ခြင်းကို ခံရလီရေ၊ ယေကေလည်း သူ့အကျင့်သီလအကြောင်းန မဟုတ်။ ယင်းထက်ပင် သူစာ ထာဝရဘုရား၏ အလိုတော်အတိုင်း ခေါ်ခြင်းကို ခံရလီရေ။ 13ယင်းပိုင်တထန် ကျမ်းစာမာ ရွီးရို့ ဟိရေ၊ “ငါ ယာကုပ်ကို ချစ်ပျာ၊ ယေကေလည်း ဧသောကို မုန်းဗျာ။” 14ယင်းပိုင်ဆိုကေ ထာဝရဘုရား မတရားလုပ်တေ ဟို့ ငါရို့ ပြောဖို့စာလော? တစ်ခါလည်း မပြော! 15အကြောင်းကား ထာဝရဘုရားစာ မောရှေကို ပြောလီရေ၊ “ငါ ကျေးဇူးပြုချင်သူကို ကျေးဇူးပြုဖို့ အရာ သနားချင်သူကို သနားဖို့။” 16ယင်းအတွက်န ဟိသမျ အားကုံး လူကြိုးစားမှုန လူအလိုဆန္ဒထက်မာ မတည်၊ ယေကေလည်း ကျေးဇူးသျှင် ထာဝရဘုရားထက်မာရာ တည်ရေ၊ 17အကြောင်းကား ကျမ်းစာမာ ထာဝရဘုရားစာ ဖာရောမင်းကို ပြောလီရေ၊ “ငါ နင့်ကို မင်းအဖြစ် ခန့်ထားဗျာ၊ အကြောင်းကား ငါ နင့်ကို အသုံးပြုခြင်းကနီရို့ ငါ ကိုယ့်တန်ခိုးကို ဖေါ်ပြချင်ရေ အရာ ငါ့နာမည်ကို ကမ္ဘာတစ်လုံးမာ ကျော်ကြားချင်ရေ။” 18ယင်းပိုင်ဆိုကေ မြင်ရစာကား၊ ထာဝရဘုရားစာ ကိုယ် သနားချင်သူကို သနားရေ အရာ စိတ်ကျန်းအောင် လုပ်ချင်သူကို စိတ်ကျန်းအောင် လုပ်တေ။ထာဝရဘုရား၏ သနားကြင်နာခြင်း
19နင်ရို့အထဲက အသူမဆိုတစ်ယောက် ငါ့ကို မီးနိုင်စရာ ဟိရေ၊ “ယင်းပိုင်ဆိုကေ ထာဝရဘုရား လူရို့ကို ဇာဖို့ အပြစ်တင်စာလည်း? အကြောင်းကား ထာဝရဘုရား၏ ရွယ်မှတ်ချက်ကို အသူ တားဆီးနိုင်ရေလည်း?” 20ယေကေလည်း နင် အသူလည်း? နင် ဇာ အခွင့်အာဏာန ထာဝရဘုရားကို ဒေပိုင် မီးစာလည်း? လူတစ်ယောက် ဝန်တစ်ဦးကို လုပ်တေဆိုကေ ထိုဝန်စာ၊ “ငါ့ကို ဇာဖို့ ဒေပိုင် လုပ်တေလည်း” ဟို့ လုပ်သူကို မီးနိုင်ရေလော? 21အိုးလုပ်သမား တစ်ယောက်မာ ကျုပ်တစ်မျိုးတည်းက အမျိုးမျိုး အိုးတိကို လုပ်ပိုင်ခွင့် ဟိရေ မဟုတ်လော? ထိုအိုးတိအထဲက တစ်ချိုးအိုးတိကို အဆင့်အမြင့်နေရာမာ အသုံးပြုရေ အရာ တစ်ချိုးအိုးတိကို ရိုးရိုးနေရာမာ အသုံးပြုရေ။ 22ယင်းပိုင်တထန် ထာဝရဘုရားလည်းသောက် လူရို့ကို ဖျက်စီးဖို့အတွက် ကိုယ့်အငြိုဒေါသကို ဖေါ်ပြဖို့ ကြည့်လီရေ၊ ယေကေလည်း သူစာ ကိုယ့်အငြိုဒေါသကို မဖေါ်ပြဘိုင်း ထိုလူရို့ကို စိတ်ရှည်ခြင်းန သည်းခံလီရေ။ 23ယင်းသျှင့်ကိုအပယ် ထာဝရဘုရားစာ ကိုယ့်မာ ကြီးမြတ်စာ ဘုန်းတန်ခိုးကိုလည်း ဖေါ်ပြဖို့ ကြည့်လီရေ။ ထာဝရဘုရားစာ ကိုယ့်ကျေးဇူးတော်ကို ခံရသူရို့ကို ကိုယ့်ဘုန်းတန်ခိုး ပီးလီရေ။ ယင်းအတွက်န သူစာ ထိုလူရို့ကို အယင်ကပင် အဆင်သင့် လုပ်ထားလီရေ။ 24ထိုအဆင်သင့် လုပ်ထားသူရို့အထဲမာ ငါရို့လည်း ပါကတ်တေ။ ထာဝရဘုရားစာ ငါရို့ကို သက်သက် ယုဒလူမျိုးရို့အထဲက ခေါ်လီစာ မဟုတ်သိ၊ သူစာ ယုဒမဟုတ်သူရို့အထဲကလည်း ခေါ်လီရေ။ 25ဘုရားသတင်းပို့သူ ဟောရှေ၏ ကျမ်းစာမာ ထာဝရဘုရား ပြောလီရေ၊“ငါ့လူမျိုး မဟုတ်သူရို့ကို ငါ့လူမျိုး ဟို့ ခေါ်ဖို့၊
အရာ ငါ မချစ်စာ လူမျိုးရို့ကို ငါ ချစ်စာ လူမျိုး ဟို့ ခေါ်ဖို့။”
26“တစ်နေရာမာ ထာဝရဘုရား သူရို့ကို ပြောလီရေ၊
‘နင်ရို့ ငါ့လူမျိုး မဟုတ်၊’
ယင်းနေရာမာ သူရို့စာ အသက်သျှင် ထာဝရဘုရား၏ သားသမီး
ဟို့ အခေါ် ခံရကတ်လိမည်။” 27ဘုရားသတင်းပို့သူ ဟေရှာယစာ ဣသရေလလူမျိုးရို့ အကြောင်းကို အားန အော်ရို့ ပြောလီရေ၊
“ဣသရေလလူမျိုးရို့စာ ပင်လယ်နားမာ သဲလုံးတိန အရှိရှိ ပွါးကတ်တေ၊
ယေကေလည်း သူရို့အထဲက လူအနည်းသျှေရာ ကယ်တင်ခြင်းကို ရကတ်လိမည်။
28အကြောင်းကား အသျှင်စာ လောကသားရို့ကို အယင်အမြန် အပြစ်ဒါဏ် ပီးလိမည်။” 29ဟေရှာယစာ အရာလည်း ပြောလီရေ၊
“အနန္တတန်ခိုးနပြည့်စုံစာ အသျှင်စာ တစ်ချိုးအမျိုးအနွယ်သားရို့ကို ငါရို့အတွက် မထားခလီဆိုကေ
ငါရို့စာ သောဒုံမြို့သားရို့န ဂေါမောရမြို့သားရို့ပိုင် တစ်ယောက်မကျန် ပျက်စီးလီကတ်ဖို့။”
ဣသရေလလူမျိုးန သတင်းကောင်း
30ယင်းပိုင်ဆိုကေ ငါရို့ ဒေပိုင် ပြောနိုင်ရေ၊ ယုဒမဟုတ်သူရို့စာ သူတော်ကောင်းအဖြစ် ထာဝရဘုရား၏ နှစ်သက်ခြင်းကို ရဖို့အတွက် မကြိုးစားလီကတ်၊ ယေကေလည်း သူရို့စာ ယေရှုခရစ်တော်ကို ကျုံခြင်းကနီရို့ သူတော်ကောင်းအဖြစ် ထာဝရဘုရား၏ နှစ်သက်ခြင်းကို ခံရကတ်လီရေ။ 31ယေကေလည်း ဣသရေလလူမျိုးရို့စာ ပညှတ်တရားကို လိုက်နာခြင်းကနီရို့ ထာဝရဘုရား၏ နှစ်သက်ခြင်းကို ခံရဖို့အတွက် ကြိုးစားရို့အတိုင်းလည်း သူရို့စာ မခံရကတ်လီ။ 32သူရို့ ဇာဖို့ မခံရကတ်လီစာလည်း? အကြောင်းကား သူရို့စာ ကျုံခြင်းတရားကို အားမကိုးဘိုင်းန ကိုယ်ရို့အကျင့်သီလတိကို အားကိုးလီကတ်တေ။ သူရို့စာ လူရို့ ခလုံးတိုက်ရို့ လဲကျကတ်စာ ကျောက်လုံးမာ ▼▼ကျောက်လုံး ဒေနေရာမာ ကျောက်လုံးဆိုစာ ယေရှုခရစ်တော်ကို ပြောစာ ဖြစ်ပါရေ။
ခလုံးတိုက်ရို့ လဲကျကတ်လီရေ။ 33ထိုအကြောင်းကို ထာဝရဘုရားစာ ကျမ်းစာမာ သတိပီးလီရေ၊“ကြည့်ကတ်၊ လူရို့ ခလုံးတိုက်ရို့ လဲကျလတ်အောင်
ငါ ဇိအုန်တောင်ထက်မာ ကျောက်လုံးတစ်လုံး ချထားရေ။
ထိုကျောက်လုံးစာ လူရို့အတွက် ခလုံးတိုက်ရို့ လဲကျစရာအကြောင်း ဖြစ်လိမည်။
ယေကေလည်း ထိုကျောက်လုံးကို ကျုံသူစာ တစ်ခါလည်း စိတ်ပျက်လိမည် မဟုတ်။”
Copyright information for
RmzSC