Titus 1

နှုတ်ဆက်ခြင်း

သို့၊ တိတု။

1ငါ ပေါလု၊ ငါစာ ထာဝရဘုရား၏ ကျွန်န ယေရှုခရစ်တော်၏ တမန်တော် တစ်ယောက် ဖြစ်တေ။ ထာဝရဘုရား၏ ရွီးကောက်ခြင်းကို ခံရသူရို့ ကျုံခြင်းတရားန ပြည့်စုံကတ်ပတ်စီအတွက် အရာ ထာဝရဘုရား၏ မှန်ကန်ခြင်းတရားကို သိကတ်ပတ်စီအတွက် ထာဝရဘုရား ငါ့ကို သွန်သင်ပီးဖို့ ရွှတ်လိုက်လီရေ။ ထာဝရဘုရား၏ အလိုတော်အတိုင်း ဇာပိုင် နီထိုင်ရဖို့လည်းဆိုစာကို ထိုမှန်ကန်ခြင်းတရားစာ လူရို့ကို ပြပီးရေ။ 2အရာ ထိုမှန်ကန်ခြင်းတရားစာ ထာဝရအသက်ကို ရဖို့အတွက် ငါရို့ကို မျှော်လင်းချက်လည်း ပီးရေ။ ကမ္ဘာကို မဖန်ဆင်းခင်အယင်ကပင် ထာဝရအသက်ကို ပီးဖို့အတွက် ထာဝရဘုရားစာ ဂတိခံထားလီရေ။ သူစာ မုတ်သားစကား မပြော။ 3သူစာ အချိန်တိုင်ရေခါ ငါ ဟောပြောစာ တရားကနီရို့ ထိုဂတိတော်ကို ဖေါ်ပြလီရေ။ ငါရို့မာ ကယ်တင်သျှင် ထာဝရဘုရားစာ ထိုမှန်ကန်ခြင်း၏ တရားတော်ကို ဟောပြောဖို့အတွက် ငါ့ကို တာဝန် ပီးလီရေ။ ယင်းအတွက်န ငါစာ ဒေဂု ထိုတရားတော်ကို ကျုံသူရို့ဘားမာ ဟောပြောနီရေ။

4ငါ ဒေ စာစောင်ကို နင့်တို့ ရွီးလိုက်တေ။ နင် ခရစ်တော်ကို ကျုံရို့ ငါန တစ်ကိုယ်တည်း ဖြစ်ပျာ။ ယင်းအတွက်န နင် ငါ့သားအရင်းပိုင် ဖြစ်တေ။ ထာဝရဘုရားစာ ငါရို့မာ အဖ ဖြစ်တေ အရာ ခရစ်တော်ယေရှုစာ ငါရို့မာ ကယ်တင်သျှင် ဖြစ်တေ။ ထာဝရဘုရားန ခရစ်တော်ယေရှုစာ နင့်ကို ကျေးဇူးတော်န ငြိမ်းချမ်းခြင်း ပီးပါစီ။

အသင်းတော် ဂေါင်းဆောင်အကြီးရို့ အကျင့်သီလ

5မပြီးဆုံးစာ အလုပ်တိကို နင် ပြီးဆုံးအောင် လုပ်လီ အရာ ငါ နင့်ကို ညွှန်ပြရေအတိုင်း အသင်းတော်ဟိစာ မြို့ရွာတိမာ ဂေါင်းဆောင်ရို့ကို ခန့်ထားလီ။ ယင်းအတွက်န ငါ နင့်ကို ကရေတေကျွန်းမာ ထားဘိုက်ခလီရေ။ 6အသင်းတော် ဂေါင်းဆောင်အကြီး တစ်ယောက်မာ အမှားဆိုစာ တစ်ခုလည်း မဟိရ။ သူ့မာ မယားတစ်ယောက်တည်းရာ ဟိရဖို့။ သူ့မာ သားသမီးရို့စာ ခရစ်တော်ကို ကျုံသူ ဖြစ်ကတ်ရဖို့။ သူရို့စာ ရိုင်းစိုင်းသူန စကားမကိုင်သူ မဖြစ်ရ။ 7သူစာ ထာဝရဘုရား၏ အလုပ်တိကို ကြည့်ရှုစောင်မရဖို့။ ယင်းအတွက်န သူစာ အပြစ်အတင်ခံသူ မဖြစ်ရ၊ နုညံ့ခြင်းစိတ် ဟိရဖို့၊ တစ်ဖက်ခွတ် မဖြစ်ရ၊ မာနကြီးသူ မဖြစ်ရ၊ ယစ်မုန်းငါးပါးကို မသုံးရ အရာ သူစာ အခြားတစ်ယောက် စီးပွါးကို လိမ်လှည့်ရို့ ကိုယ်ချမ်းသာဖို့အတွက် မကြိုးစားရ။ 8ယင်းထက်ပင် သူစာ အာဂန္တုကို ပြုဇုဖို့ သဖေါဟိရဖို့၊ သူစာ ကောင်းမြတ်စာ အလုပ်ကို လုပ်ဖို့အတွက် ဝါသနာ ဟိရဖို့၊ ကိုယ့်ကိုကိုယ် ထိန်းသိမ်းရဖို့၊ ရိုးသားသူ ဖြစ်ရဖို့၊ သန့်ရှင်းသူ ဖြစ်ရဖို့ အရာ စည်းကမ်းဟိသူ ဖြစ်ရဖို့။ 9သူစာ ကျုံဖို့ထိုက်တန်စာ သွန်သင်ချက်ကို ရိုးရိုးသားသား လိုက်နာရဖို့။ သူစာ လူရို့ကို မှန်ကန်စာ သွန်သင်ချက်ကို သင်ပီးနိုင်ရဖို့။ အရာ သူစာ မှန်ကန်ခြင်းတရားကို ဆန့်ကျင်သူရို့ အပြစ်တိကို ဖေါ်ပြနိုင်ရဖို့။

ဆိုးယုတ်စာ လူရို့ကို တားဆီးဖို့အတွက် မှာထားခြင်း

10အကြောင်းကား စကားမကိုင်သူ အများကြီး ဟိကတ်တေ။ သူရို့စာ တန်ဖိုးမဟိစာ စကားတိကို ပြောရို့ အခြားလူရို့ကို မှားယွင်းစာလမ်းတို့ ဆောင်ယူလားနီကတ်တေ။ တစ်ချိုးလူရို့စာ ယုဒမဟုတ်သူရို့အထဲက ကျုံသူရို့ကို အရီဖျားလှီးမင်္ဂလာ လုပ်ရဖို့ ဟို့ မှတ်နီကတ်တေ။ အရေးကြီးဆုံး ငါ သူရို့ အကြောင်းကို ပြောစာ ဖြစ်တေ။ 11ထိုလူရို့မာ ပစကို ပိတ်ထားရဖို့၊ အကြောင်းကား သူရို့စာ မတရားစာနည်းန တန်းကား-ဖွေသျှာ ရဖို့အတွက် မပီးသင့်စာ သွန်သင်ချက်တိကို သွန်သင်ပီးနီကတ်တေ။ သူရို့စာ ယင်းပိုင် သွန်သင်ပီးရို့ တစ်ချိုးမိသားစုကို ဖျက်စီးဘိုက်လိုက်ပျာ။ 12ကရေတေကျွန်းသားရို့အထဲက ပညာသျှင် တစ်ယောက်စာ ကိုယ့်လူရို့ အကြောင်းကို ပြောလီရေ၊ “သူရို့စာ အမြဲတိုင်း မုတ်သားစကား ပြောနီကတ်တေ၊ သူရို့စာ ဆိုးယုတ်စာ တောတိရစ္ဆာန်နတူကတ်တေ အရာ သူရို့စာ ကောင်းကောင်း ပျင်းသူရို့န စားကြူးသူရို့ ဖြစ်ကတ်တေ။” 13ထိုပညာသျှင် ပြောစာစကားတိ မှန်ရေ။ ယင်းအတွက်န သူရို့မာ မှားယွင်းခြင်းတိကို နင် ဖေါ်ပြလီ။ သူရို့မာ ကျုံခြင်းတရား တည်မြဲဖို့အတွက်၊ 14ယုဒလူမျိုးရို့မာ မဟုတ်မမှန်စာ ဝတ္ထုတိကို နားမထောင်ဖို့အတွက် အရာ မှန်ကန်ခြင်းတရားကို စွန့်ရို့ လားခသူရို့ ပညှတ်ချက်ကို မလိုက်နာဖို့အတွက် နင် သူရို့ကို ကြမ်းတမ်းစာ စကားန ဆုံးမလီ။

15စိတ်နှလုံး သန့်စင်သူရို့ဘားမာ အားကုံးစာ စင်ကြယ်ရေ၊ ယေကေလည်း စိတ်နှလုံး ညစ်ညူးသူရို့န မကျုံသူရို့ဘားမာ တစ်ခုလည်း မစင်ကြယ်။ သူရို့မာ စိတ်နှလုံးန အသိညာဏ် တိုင်အောင်ပင် ညစ်ညူးလားခဗျာ။ 16သူရို့စာ၊ “ငါရို့ ထာဝရဘုရားကို သိရေ” ဟို့ ပြောနီကတ်တေ၊ ယေကေလည်း သူရို့ ထာဝရဘုရားကို မသိကတ်ဆိုစာကို သူရို့ အလုပ်ကနီရို့ ဖေါ်ပြရေ။ သူရို့စာ ရွန်ဖို့ကောင်းသူရို့န နာခံမှုမဟိသူရို့ ဖြစ်ကတ်တေ။ သူရို့စာ ကောင်းမြတ်စာ အလုပ် တစ်ခုကိုလည်း မလုပ်နိုင်ကတ်။