Titus 2

အမျိုးမျိုး လူရို့အတွက် ပညှတ်ချက်

1ယေကေလည်း နင်စာ မှန်ကန်စာ သွန်သင်ချက်နတူစာ အကြောင်းတိကို သွန်သင်ပီးရဖို့။ 2ဝါကြီးရို့ အားကုံးစာမာ စဉ်းစားဆင်ခြင်မှုစိတ် ဟိဖို့အတွက် အရာ ရိုသေခြင်းကို ခံထိုက်သူ ဖြစ်ဖို့အတွက် နင် သူရို့ကို ပြောပြလီ။ ယင်းသျှင့်ကိုအပယ် သူရို့စာ ကိုယ်ရို့ကို ထိန်းသိမ်းဖို့အတွက်၊ မှန်ကန်စာ ကျုံခြင်းတရား ဟိဖို့အတွက်၊ ချစ်ခြင်းမေတ္တာ ဟိဖို့အတွက် အရာ သည်းခံခြင်းစိတ် ဟိဖို့အတွက်လည်း နင် သူရို့ကို ပြောပြလီ။

3ယင်းပိုင်တထန် ဝါကြီးမရို့ကိုလည်း နင် ပြောပြလီ။ သူရို့စာ ထာဝရဘုရားကို ရိုသေကြောက်လန့်ကတ်ရဖို့ အရာ ကောင်းမြတ်စာ သွန်သင်ချက်တိကို သွန်သင်ပီးကတ်ရဖို့။ ယေကေလည်း သူရို့စာ အခြားတစ်ယောက် အကြောင်းကို ယူရို့ နင်းမရွှင့်ရ အရာ ယစ်မုန်းငါးပါး သောက်ဖို့စာကို အများ စိတ်မဝင်စားရ။ 4ယင်းပိုင်ဆိုကေ အိမ်ထောင်ပျိုမရို့စာ ကိုယ့်လင်န ကိုယ့်သားသမီးရို့ကို ချစ်ကတ်ပတ်စီအတွက် ထိုဝါကြီးမရို့စာ သူရို့ကို သွန်သင်ပီးဖို့ ရကတ်လိမည်။

5အိမ်ထောင်ပျိုမရို့ ကိုယ်ရို့ကို ထိန်းသိမ်းကတ်ပတ်စီအတွက်၊ သန့်ရှင်းခြင်း ဟိကတ်ပတ်စီအတွက်၊ ကိုယ့်အိမ်ထောင်ကို ကြည့်ရှုစောင်မကတ်ပတ်စီအတွက်၊ သနားကြင်နာမှုစိတ် ဟိကတ်ပတ်စီအတွက် အရာ ကိုယ့်လင် အုပ်ချုပ်ခြင်းကို ခံယူကတ်ပတ်စီအတွက် သွန်သင်ပီးရဖို့။ ယင်းပိုင်ဆိုကေ ထာဝရဘုရား၏ စကားတော်ကို တစ်ယောက်လည်း ပုတ်ခတ်ရို့ စကားပြောဖို့ ရကတ်လိမည် မဟုတ်။

6ယင်းပိုင်တထန် အိမ်ထောင်ပျိုယောက်ျားရို့လည်း ကိုယ်ရို့ကို ထိန်းသိမ်းကတ်ပတ်စီအတွက် နင် သွန်သင်ပီးလီ။ 7နင် ကိုယ်တိုင် အားကုံးစာမာ ကောင်းမြတ်စာ အလုပ်တိကို လုပ်ရို့ သူရို့ ရှိက ပုံဥပမာ တင်ပြလီ။ 8နင့်ကို တစ်ယောက်လည်း အပြစ်တင်ဖို့ မရလတ်အောင် နင်စာ ယဉ်ကျေးမှုန မှန်ကန်စာ သွန်သင်ချက်ကို သင်ပီးလီ။ ယင်းပိုင်ဆိုကေ ငါရို့ကို ဆန့်ကျင်သူရို့စာ ငါရို့ အကြောင်းကို တစ်ခုပိုင်လည်း မကောင်း ပြောဖို့ ရကတ်လိမည် မဟုတ်။ ယင်းအတွက်န သူရို့စာ အရှက်ကျကတ်လိမည်။

9ကျွန်ရို့ကို နင် သွန်သင်ပီးဖို့စာကား၊ သူရို့စာ အားကုံးစာမာ ကိုယ်ရို့အပိုင်သျှင် အာဏာကို လိုက်နာကတ်။ သူရို့မာ အပိုင်သျှင်ရို့ နှစ်သက်လတ်အောင် ကြိုးစားအားထုတ်ရို့ အလုပ် လုပ်ပီးကတ်ရဖို့။ အရာ သူရို့စာ ကိုယ်ရို့မာ အပိုင်သျှင်ရို့ကို စကားအပြန် မပြောရ။ 10သူရို့စာ ကိုယ်ရို့မာ အပိုင်သျှင်ရို့ ဝန်ဆန်တိကို မခိုးရ။ ယင်းထက်ပင် သူရို့စာ ကိုယ်ရို့မာ သစ္စာတရား ဟိရေဆိုစာကို အပိုင်သျှင်ဘားမာ သက်သီပြရဖို့။ ယင်းပိုင်ဆိုကေ သူရို့မာ ကောင်းမြတ်စာ အကျင့်သီလကို မြင်ရို့ ငါရို့မာ ကယ်တင်သျှင် ထာဝရဘုရား၏ သွန်သင်ချက်ကို လူရို့ ရိုသေကတ်လိမည်။

11ထာဝရဘုရားစာ ကိုယ့်ကျေးဇူးတော်ကို လူရို့ဘားမာ ဖေါ်ပြဗျာ။ ထိုကျေးဇူးတော်စာ ဟိသမျ လူရို့ကို ကယ်တင်နိုင်ရေ။ 12ထိုကျေးဇူးတော်စာ ငါရို့ ထာဝရဘုရားကို ရိုသေကြောက်လန့်ခြင်း မဟိဘိုင်း နီထိုင်ခြင်းန လောကမာ ကာမဂုဏ် လိုက်စားခြင်းကို စွန့်ပယ်ဖို့အတွက် ငါရို့ကို သွန်သင်ပီးရေ။ အရာ ဒေ လောကမာ ကိုယ်ရို့ကို ထိန်းသိမ်းထားရို့ ထာဝရဘုရားကို ရိုသေကြောက်လန့်ခြင်းန ရိုးရိုးသားသား နီထိုင်ဖို့စာကိုလည်း သွန်သင်ပီးရေ။ 13မြင့်မြတ်စာ ထာဝရဘုရားန ငါရို့မာ ကယ်တင်သျှင် ယေရှုခရစ်တော် အပြည့်အစုံ ဘုန်းတန်ခိုးန ကြွလာဖို့စာနိကို ငါရို့ မျှော်လင်းရို့ စောင့်နီကတ်တေ။ ယင်းအချိန်ခါ ငါရို့ အားကုံးသူ ယင်းပိုင် နီထိုင်ကတ်ရဖို့။ 14ယေရှုခရစ်တော်စာ ငါရို့ကို ဟိသမျ ဆိုးယုတ်ခြင်းက ချွတ်ဖို့အတွက် ကိုယ့်အသက်ကို စွန့်လီရေ။ အရာ ငါရို့စာ သူ၏ သန့်ရှင်းသူအဖြစ် အမြဲတိုင်း ကောင်းမြတ်စာ အလုပ်တိကို လုပ်ဖို့အတွက်လည်း သူစာ အသီခံလီရေ။

15နင် အပြည့်အစုံ အခွင့်အာဏာန ဒေ အကြောင်းတိကို လူရို့ကို သင်ပီးလီ၊ အားပီးကူညီလီ အရာ သူရို့ အပြစ်တိကို ဖေါ်ပြလီ။ တစ်ယောက်လည်း နင့်ကို အားမနာ မလုပ်စီကေ့။
Copyright information for RmzSC