Joh 12:12-19 | RmzSC | STEP | လွတ်မြောင့်ခြင်းပွဲတို့ လာကတ်လီစာ ဟိသမျ လူရို့စာ နောက်တစ်ရက်နိမာ ယေရှု ယေရုရှလင်မြို့တို့ ကြွလာရေဆိုစာကို ကြားရကတ်လီရေ။

John 12:12-19

ယေရှု ယေရုရှလင်မြို့တို့ ဝင်ခြင်း

(မဿဲ ၂၁:၁-၁၁၊ မာကု ၁၁:၁-၁၁၊ လုကာ ၁၉:၂၈-၄၀)

12 လွတ်မြောင့်ခြင်းပွဲတို့ လာကတ်လီစာ ဟိသမျ လူရို့စာ နောက်တစ်ရက်နိမာ ယေရှု ယေရုရှလင်မြို့တို့ ကြွလာရေဆိုစာကို ကြားရကတ်လီရေ။ 13 ယင်းခါ သူရို့စာ ခဇူပင်က အလက်တိကို ယူရို့ ယေရှုကို ကြိုဆိုဖို့ လာကတ်လီရေ။ သူရို့စာ အော်ရို့ ပြောကတ်လီရေ၊
“ဟောရှဏ္ဏ! ^{▼▼ဟောရှဏ္ဏ အဓိပ္ပါယ်ကား “အကျွန်ရို့ကို ကယ်တင်ပါ” ဟို့ မေတ္တာရပ်ခံစာ ဖြစ်ပါရေ} ထာဝရဘုရား၏ ဘုန်းကြီးပါစီ၊
အသျှင်၏ နာမည်န ကြွလာသူစာ မင်္ဂလာ ဟိပါစီ၊
ဣသရေလလူမျိုးရို့မာ မင်း မင်္ဂလာ ဟိပါစီ။”

14 – 15 ကျမ်းစာမာ၊ “အိုး ယေရုရှလင်မြို့သားရို့၊ နင်ရို့ မကြောက်ကေ့။ ကြည့်ကတ်၊ နင်ရို့မာ အသျှင်မင်းကြီး ဝန်ရွက်မြင်းသျှေကို စီးရို့ ကြွလာနီရေ” ဟို့ ရွီးရို့ ဟိစာပိုင်တထန် ယေရှုစာ ဝန်ရွက်မြင်းသျှေ တစ်ကောင်ကို တွိရေခါ စီးရို့ ကြွလာလီရေ။

16 ထိုအကြောင်းတိကို ယေရှုမာ တပည့်ရို့စာ ပထမခါ နားမလည်ကတ်လီ၊ ယေကေလည်း ယေရှုမာ ဘုန်းတန်ခိုး ရပြီးရေနောက် သူရို့စာ ကျမ်းစာမာ ရွီးရို့ဟိစာ စကားတိ ယေရှု အကြောင်းကို ရွီးထားလီရေဆိုစာကို တွက်ရကတ်လီရေ။ အရာ ထိုလူရို့ လုပ်လီကတ်စာ အလုပ်တိ ယေရှုအတွက် လုပ်လီရေဆိုစာကိုလည်း သူရို့စာ တွက်ရကတ်လီရေ။

17 ယေရှု လာဇရုကို အရှင်လုပ်ရို့ သင်္ချိုင်းဂူခေါင်းထဲက ခေါ်ထုတ်လီရေခါ လူအများကြီး ယေရှုနအတူ ဟိကတ်လီရေ။ ယင်းနောက် သူရို့စာ လာဇရု အသက်ရှင်စာ အကြောင်းကို အခြားလူရို့ဘားမာ ပြောပြကတ်လီရေ။ 18 ယင်းအတွက်န ယင်းသျှင့်ကို ကြားရို့ လူရို့စာ ယေရှုကို ကြိုဆိုဖို့ ထွက်လာကတ်လီရေ။ 19 ယင်းခါ ဖာရိရှဲအဖွဲ့သားရို့စာ ကိုယ်ရို့ အချင်းချင်း ပြောကတ်လီရေ၊ “ကြည့်ကတ်၊ ငါရို့ ကြိုးစားမှုတိ တစ်ခုလည်း အမြတ်မဟိ။ ကမ္ဘာ တစ်လုံးသား သူ့နောက်က လိုက်လားခကတ်ပျာ။”