John 19:17-27
ယေရှုကို ကားတိုင်မာ တင်ခြင်း
(မဿဲ ၂၇:၃၂-၄၄၊ မာကု ၁၅:၂၁-၃၂၊ လုကာ ၂၃:၂၆-၃၉)
17အသျှင်ယေရှုစာ ကိုယ့်ကားတိုင်ကို ရွက်ယူလားရို့ “အဂေါင်းခွံ” ဟို့ ခေါ်စာ နေရာတစ်ခုတို့ ရောက်လီရေ။ ယင်းနေရာကို ဟေဗြဲဘာသာစကားန “ဂေါလဂေါသ” ဟို့ ခေါ်ရေ။ 18ယင်းနေရာမာ စစ်သားရို့စာ ယေရှုကို ကားတိုင်မာ တင်ကတ်လီရေ။ ယင်းခါ သူရို့စာ ယေရှုနအတူ အခြားနှစ်ယောက်ကိုလည်း ကားတိုင်မာ တင်ကတ်လီရေ။ သူရို့စာ ယေရှုအနားက တစ်ဖက်တစ်ယောက် ဟိကတ်လီရေ။ ယေရှုစာ သူရို့ နှစ်ယောက်အလယ်မာ ဟိလီရေ။ 19– 20အုပ်ချုပ်သူကြီးပိလတ်စာ အပြစ်ဖေါ်ပြချက် ကမ္ဗည်းစာတစ်ခု ရွီးလီရေ။ ယင်းကမ္ဗည်းစာကို ကားတိုင်မာ ယေရှုအဂေါင်းထက်က ကပ်လီရေ။ ယင်းကမ္ဗည်းစာမာ၊ “နာဇရက်မြို့သျှေသား ယေရှု ယုဒလူမျိုးရို့မာ မင်း” ဟို့ ဟေဗြဲဘာသာစကား၊ ရောမဘာသာစကား အရာ ဂရိဘာသာစကားန ရွီးရို့ ဟိလီရေ။ ယေရှုကို ကားတိုင်မာ တင်လီစာ နေရာစာ မြို့နအပါး ဟိလီရေ။ ယင်းအတွက်န ယုဒလူအများကြီး ယင်းကမ္ဗည်းစာကို ဖတ်ကတ်လီရေ။ 21ယုဒလူမျိုးရို့မာ ယဇ်ပုရောဟိတ်အကြီးရို့စာ ပိလတ်ကို ပြောကတ်လီရေ၊ “‘ယုဒလူမျိုးရို့မာ မင်း’ မရွီးဘိုင်းန ‘ဒေသူ ပြောရေ၊ ငါ ယုဒလူမျိုးရို့မာ မင်း’ ဟို့ ရွီးပါ။” 22ယင်းခါ သူစာ ပြောလီရေ၊ “ငါ ရွီးစာကို အရာ မပြောင်းလှဲဗျာ။” 23ယေရှုကို ကားတိုင်မာ တင်ပြီးရေနောက် စစ်သားရို့စာ ယေရှု ကိုယ်ရုံကို လေးပိုင်းပိုင်းရို့ တစ်ယောက် တစ်ပိုင်းစီ ဝီကတ်လီရေ။ ယင်းနောက် သူရို့စာ အင်္ကျီကိုလည်း ယူကတ်လီရေ။ ယင်းအင်္ကျီမာ တစ်ခုလည်း ခြုပ်သား မဟိလီ။ ယင်းအင်္ကျီစာ အထက်အစွန်းကပင် အောက်အစွန်းတိုင်အောင် ရက်စာအင်္ကျီ ဖြစ်တေ။ 24ယင်းအင်္ကျီကို ကြည့်ရို့ စစ်သားရို့စာ ကိုယ်ရို့အချင်းချင်း ပြောကတ်လီရေ၊ “ဒေ အင်္ကျီကို မဆုတ်ဘိုင်းန မဲဖေါက်ရို့ အသူ ရမည်လည်း ကြည့်မည်။” မဲဖေါက်ဖို့စာ အကြောင်းကို ကျမ်းစာမာ ရွီးရို့ ဟိရေ၊“သူရို့ ငါ့အဝတ်ကို ကိုယ်ရို့အထဲမာ ဝီရို့ ယူကတ်လီရေ၊
အရာ ငါ့အင်္ကျီအတွက် မဲဖေါက်ကတ်လီရေ။” 25ယင်းခါ ယေရှုကို တင်ထားစာ ကားတိုင်အနားမာ ယေရှု အမိ၊ ယေရှု အမိမာ ညီမ၊ ကလောဖ မယား မာရိ အရာ မာဂဒလမြို့သမ မာရိလည်း ရပ်ရို့ ဟိလီရေ။ 26ယေရှုစာ ကိုယ့်အမိန ကိုယ်ချစ်စာ တပည့်ကို ရပ်ရို့ မြင်လီရေ။ ယင်းခါ သူစာ ကိုယ့်အမိကို ပြောလီရေ၊ “အမိ၊ အမိမာ သားကို ကြည့်လိုက်။” 27ယင်းနောက် ကိုယ်ချစ်စာ တပည့်ကို ပြောလီရေ၊ “အဝေး၊ နင့် အမိကို ကြည့်လိုက်။” ယင်းအတွက်န ထိုတပည့်စာ ယေရှု အမိကို ကြည့်ရှုစောင့်သျှောက်ရို့ ထားဖို့အတွက် ကိုယ့်အိမ်တို့ ခေါ်ယူလားခလီရေ။
Copyright information for
RmzSC