Joh 19:28-37 | RmzSC | STEP | ယင်းနောက် ယေရှုစာ အလုပ်အားကုံး ပြီးဆုံးဗျာဆိုစာကို သိလီရေ။ အရာ သူစာ ကျမ်းစာမာ ရွီးရို့ ဟိစာစကား ပြည့်စုံဖို့အတွက်၊ “ငါ ရီသောက်မွတ်တေ” ဟို့ ပြောလီရေ။

John 19:28-37

ယေရှု ကားတိုင်ထက်မာ အသက်စွန့်ခြင်း

(မဿဲ ၂၇:၄၅-၅၆၊ မာကု ၁၅:၃၃-၄၁၊ လုကာ ၂၃:၄၄-၄၉)

28 ယင်းနောက် ယေရှုစာ အလုပ်အားကုံး ပြီးဆုံးဗျာဆိုစာကို သိလီရေ။ အရာ သူစာ ကျမ်းစာမာ ရွီးရို့ ဟိစာစကား ပြည့်စုံဖို့အတွက်၊ “ငါ ရီသောက်မွတ်တေ” ဟို့ ပြောလီရေ။ 29 ယင်းခါ ယင်းနေရာမာ ပုံးရည်အပြည့်န အိုးတစ်လုံး တည်ရို့ ဟိလီရေ။ ယင်းအတွက်န စစ်သားရို့စာ ဖေါ့တုံးတစ်တုံးကို ယူရို့ ယင်းပုံးရည်အိုးမာ နှစ်လီရေ။ ယင်းနောက် ယင်းဖေါ့တုံးကို အပင်အခက်တစ်ခက်မာ ချိုင်ရို့ ယေရှုပစမာ တို့လီရေ။ 30 ယေရှုစာ ယင်းပုံးရည်ကို သောက်ရို့ ပြီးရေခါ၊ “အလုပ် ပြီးဗျာ” ဟို့ ပြောလီရေ။ ယင်းနောက် သူစာ အဂေါင်းကို အောက်တို့ ငုံ့ရို့ အသက် စွန့်လီရေ။

31 ယင်းနိစာ လွတ်မြောင့်ခြင်းပွဲအတွက် အစီစဉ်ချစာနိ ဖြစ်တေ။ (နောက်တစ်ရက်နိစာ အရေးကြီးစာ သတင်းနိ ဖြစ်တေ၊ အကြောင်းကား ယင်းနိစာ လွတ်မြောင့်ခြင်းပွဲနိ ဖြစ်တေ)။ ယင်းအတွက်န ယုဒဂေါင်းဆောင်ရို့စာ ထိုအသီကောင်တိကို သတင်းနိမာ ကားတိုင်ထက်မာ ထားဖို့ မလိုကတ်လီ။ သူရို့စာ အုပ်ချုပ်သူကြီးပိလတ်တို့ လားရို့ တောင်းပန်ကတ်လီရေ၊ “အသျှင်၊ ကားတိုင်မာ ဟိသူရို့ အယင် သီလတ်အောင် သူရို့မာ အခြီတိကို ချိုးဖို့အတွက် စစ်သားရို့ကို အာဏာချလိုက်ပါ၊ အကြောင်းကား ဒေနိခါ ထိုအသီကောင်တိကို ကားတိုင်က အယင် ချဘိုက်လိုက်ရပါဖို့။” 32 ယင်းခါ စစ်သားရို့စာ လာရို့ ယေရှုနအတူ ကားတိုင်မာ တင်လီစာ လူနှစ်ယောက် အခြီကို ချိုးဘိုက်လိုက်လီရေ။

33 ယင်းနောက် ယေရှုတို့ လာရေခါ ယေရှု သီရို့ဟိစာကို မြင်ကတ်လီရေ။ ယင်းအတွက်န သူရို့စာ ယေရှု အခြီကို မချိုးကတ်လီ။ 34 ယေကေလည်း စစ်သားတစ်ယောက်စာ ယေရှုနံဘေးမာ လှံနထိုးလီရေ။ ယင်းခါ ချက်ချင်း ယေရှုနံဘေးက သွီးန ရီထွက်လာလီရေ။ 35 နင်ရို့လည်း ကျုံကတ်ပတ်စီအတွက် ထိုဖြစ်ပျက်ခြင်းကို ကိုယ်တိုင် မြင်ဖူးသူစာ သက်သီ ပီးလီရေ။ သူပီးစာ သက်သီ မှန်ရေ အရာ ကိုယ်ပီးစာ သက်သီ မှန်ရေဆိုစာကို သူကိုယ်တိုင် သိရေ။

36 ကျမ်းစာမာ ရွီးရို့ ဟိရေ၊ “သူ၏ အရိုးတစ်ချောင်းလည်း ကျိုးရမည် မဟုတ်။” ထိုစကား ပြည့်စုံဖို့အတွက် ဒေပိုင် ဖြစ်ပျက်လီစာ ဖြစ်တေ။ 37 အခြားတစ်ခု ပုဒ်မမာ ရွီးရို့ ဟိရေ၊ “သူရို့စာ ကိုယ်ရို့ လှံန ထိုးသူကို မော်ကြည့်ကတ်လိမည်။”