Luke 11:14-23
ထာဝရဘုရား၏ တန်ခိုးကို တရိုက်ခြင်း
(မဿဲ ၁၂:၂၂-၃၂၊ မာကု ၃:၂၀-၂၇)
14အရာ တစ်ချိန်ခါ ယေရှုစာ လူတစ်ယောက်က ပပွါးနတ်ဆိုး တစ်ကောင်ကို နှင်ထုတ်လီရေ။ နတ်ဆိုး ထွက်လားခရေခါ ထိုပပွါးစာ စကားပြောဖို့ နိုင်လီရေ။ ယင်းခါ လူရို့စာ အံ့ဩကတ်လီရေ၊ 15ယေကေလည်း သူရို့အထဲက တစ်ချိုးလူရို့စာ ပြောကတ်လီရေ၊ “သူစာ နတ်ဆိုးရို့မာ မင်း ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်ဖို့ နိုင်စာရာ!” 16အခြား တစ်ချိုးလူရို့စာ ယေရှုကို စုံစမ်းဖို့အတွက် ဂေါင်းခင်ဘုံက နိမိတ်လက္ခဏာတစ်ခု ကြည့်ဖို့ တောင်းကတ်လီရေ။ 17ယေရှုစာ သူရို့ စိတ်မာ စဉ်းစားချက်ကို သိရို့ ပြောလီရေ၊ “နိုင်ငံတစ်ခုမာ လူရို့စာ ကိုယ်ရို့အချင်းချင်း မသင့်မတင် ဖြစ်ရို့ ကွဲလားခရေဆိုကေ ယင်းနိုင်ငံစာ ပျက်စီးခြင်းတို့ ရောက်ရရေ။ အရာ အိမ်တစ်အိမ်မာ ကိုယ်ရို့အချင်းချင်း မသင့်မတင် ဖြစ်ရို့ ကွဲလားခရေဆိုကေ ယင်းအိမ်စာ ပျက်စီးခြင်းတို့ ရောက်ရရေ။ 18မာရ်နတ်လည်း ကိုယ့်ကိုကိုယ် ဆန့်ကျင်ရေဆိုကေ သူ့နိုင်ငံ ဇာပိုင်ပျင်ရို့ တည်မြဲနိုင်ဖို့သိလည်း? ကိုယ်ဘင်ရို့ ငါ့ကို ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်တေ ဟို့ ပြောကတ်တေ။ 19ကောင်းရေ၊ ငါ ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်တေဆိုကေ ကိုယ်ဘင်ရို့မာ တပည့်ရို့ အသူ့ တန်ခိုးကို အသုံးပြုရို့ နတ်ဆိုးတိကို နှင်ထုတ်ကတ်စာလည်း? ယင်းအတွက်န ကိုယ်ဘင်ရို့ ပြောစာစကား မှားရေဆိုစာကို ကိုယ်ဘင်ရို့မာ တပည့်ရို့ လုပ်ကတ်စာ အလုပ်တိကနီရို့ သက်သီပြရေ။ 20ယေကေလည်း ငါ အမှန် ထာဝရဘုရား၏ တန်ခိုးကို အသုံးပြုရို့ နတ်ဆိုးတိကို နှင်ထုတ်တေဆိုကေ ထာဝရဘုရား၏ နိုင်ငံတော်စာ ကိုယ်ဘင်ရို့အထဲမာ ရောက်နီဗျာ။ 21“အားသျှင်တစ်ယောက်စာ ဟိသမျ လက်နှက်တိကို ယူရို့ ကိုယ့်အိမ်ကို စောင့်ရေဆိုကေ သူ့မာ ပစ္စည်း-ဥစ္စာတိ လလုံချချုံ ဟိရေ။ 22ယေကေလည်း သူ့ထက် အားခွန်န ပြည့်စုံသူတစ်ယောက် လာပြီးကေ သူ့ကို တိုက်ဆိုင်ရို့ အနိုင်ယူရေဆိုကေ သူ့မာ လက်နှက် အားကုံးကို ထိုသူစာ လုယူလားခရေ အရာ လုယူခစာ ပစ္စည်း-ဥစ္စာတိကိုလည်း ဝီပီးရေ။ 23ငါ့ဖက်က မနီသူစာ ငါ့ကို ဆန့်ကျင်သူ ဖြစ်တေ အရာ ငါနအတူ မစုမသိမ်းသူစာ ကြဲဖြန့်သူ ဖြစ်တေ။
Copyright information for
RmzSC