Luk 12:22-31 | RmzSC | STEP | ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “ယင်းအတွက်န ငါ နင်ရို့ကို ပြောရေ၊ နင်ရို့ ဇာ စားသောက်ဖို့လည်း ဆိုပြီးကေ အသက်ရှင်ဖို့စာ အကြောင်း၊ မဟုတ်ကေ ဇာ ဝတ်ဖို့လည်း ဆိုပြီးကေ ခန္ဓာ အကြောင်းကို ယူရို့ မစဉ်းစားကတ်ကေ့။

Luke 12:22-31

အစားအစာထက် အသက် အရေးကြီးခြင်း

(မဿဲ ၆:၂၅-၃၄)

22 ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “ယင်းအတွက်န ငါ နင်ရို့ကို ပြောရေ၊ နင်ရို့ ဇာ စားသောက်ဖို့လည်း ဆိုပြီးကေ အသက်ရှင်ဖို့စာ အကြောင်း၊ မဟုတ်ကေ ဇာ ဝတ်ဖို့လည်း ဆိုပြီးကေ ခန္ဓာ အကြောင်းကို ယူရို့ မစဉ်းစားကတ်ကေ့။ 23 အကြောင်းကား အသက်စာ အစားအစာထက် အရေးကြီးရေ အရာ ခန္ဓာစာ အဝတ်ထက် အရေးကြီးရေ။ 24 ကျီးကန်းတိကို ကြည့်ကတ်။ သူရို့စာ စိုက်လည်း မစိုက်ကတ်၊ ရိတ်လည်း မရိတ်ကတ်။ သူရို့မာ စပါးတဲ၊ မဟုတ်ကေ စပါးရိုင်လည်း မဟိကတ်၊ ယေကေလည်း ထာဝရဘုရား သူရို့ကို ကျွေးထားရေ။ နင်ရို့ ထိုငှက်တိထက်လည်း ပိုရို့ တန်ဖိုး ဟိကတ်တေ။ 25 နင်ရို့အထဲမာ အသူတစ်ယောက် စဉ်းစား-ဆင်ခြင်ရို့ ကိုယ့်အသက်ကို တစ်တောင်လှောက် ရှည်အောင် လုပ်နိုင်ရေလည်း? 26 ဒေ အလုပ်သျှေ တစ်ခုကိုပင် နင်ရို့ မလုပ်နိုင်ကတ်ဆိုကေ အခြား အကြောင်းအရာတိကို ယူရို့ ဇာဖို့ စဉ်းစားကတ်စာလည်း?

27 “ထိုတောပန်းတိ ဇာပိုင်ပျင်ရို့ ပွင့်ကတ်တေလည်းဆိုစာကို နင်ရို့ စဉ်းစားကြည့်ကတ်။ ယင်းသျှင့်တိစာ အလုပ်လည်း မလုပ်ကတ်၊ ဗိုင်းလည်း မဝင့်ကတ်။ ယေကေလည်း ငါ နင်ရို့ကို ပြောရေ၊ ရှောလမုန်မင်းကြီး ဒေလှောက် ချမ်းသာကြွယ်ဝရို့လည်း ထိုတောပန်းတိအထဲက တစ်ပွင့်လှောက်ပင် ကိုယ့်ကို ဆင်ဖို့မနိုင်ခလီ။ 28 အဝေး ကျုံခြင်းတရား အားနည်းသူရို့! ထိုမြက်တိကိုတိုင်အောင် ထာဝရဘုရား ဆင်ရေဆိုကေ နင်ရို့ကို အရာလည်း ပိုရို့ လှပအောင် ဆင်ဖို့ မဟုတ်လော? ယေကေလည်း ထိုမြက်တိစာ ဒေနိခါ အသက်ရှင်ရို့ ဟိကေလည်းသောက် နှက်ဖြန်ခါ မီးဖေါ်ထဲတို့ ဘိုက်ချခြင်းကို ခံရကတ်ဖို့။ 29 ဇာ စားသောက်ဖို့လည်း ဆိုပြီးကေ မစဉ်းစားကတ်ကေ့ အရာ စိတ်မပူကတ်ကေ့၊ 30 အကြောင်းကား လောကမာ ဟိသမျ လူမျိုးရို့စာ ထို ဟိသမျ အကြောင်းအရာကို လိုက်ရို့ ရှာနီကတ်တေ။ အရာ ထိုအကြောင်းအရာတိကို နင်ရို့ လိုအပ်တေဆိုစာကို နင်ရို့မာ အဖ သိရေ။ 31 ယင်းထက်ပင် ထာဝရဘုရား၏ နိုင်ငံတော်ကို ရှာကတ်။ ယင်းပိုင်ဆိုကေ ထိုသျှင့်တိကိုလည်း နင်ရို့ ရကတ်လိမည်။