Luk 23:26-39 | RmzSC | STEP | ရှိမုန်နာမည်န ကုရေနေမြို့သားတစ်ယောက် ဟိလီရေ။ သူစာ ရွာဖက်က လာလီရေ။ စစ်သားရို့စာ သူ့ကို ယေရှု၏ ကားတိုင်ကို ရွက်ရို့ သူ့နောက်က လိုက်ဖို့အတွက် အားဒမ ဖမ်းရို့ ကားတိုင်ကို သူ့ပက်ခုံးမာ တင်ပီးကတ်လီရေ။

Luke 23:26-39

ယေရှုကို ကားတိုင်မာ တင်ခြင်း

(မဿဲ ၂၇:၃၂-၃၄၊ မာကု ၁၅:၂၁-၃၂၊ ယောဟန် ၁၉:၁၇-၂၇)

26 ရှိမုန်နာမည်န ကုရေနေမြို့သားတစ်ယောက် ဟိလီရေ။ သူစာ ရွာဖက်က လာလီရေ။ စစ်သားရို့စာ သူ့ကို ယေရှု၏ ကားတိုင်ကို ရွက်ရို့ သူ့နောက်က လိုက်ဖို့အတွက် အားဒမ ဖမ်းရို့ ကားတိုင်ကို သူ့ပက်ခုံးမာ တင်ပီးကတ်လီရေ။ 27 ယင်းခါ လူအများကြီး ယေရှု နောက်က လိုက်ကတ်လီရေ။ သူရို့အထဲမာ မိန်းမလည်းသောက် အများကြီး ပါကတ်လီရေ။ သူရို့စာ ယေရှုအတွက် ဝမ်းနည်းရို့ ငိုကတ်လီရေ။ 28 ယေရှုစာ သူရို့တို့ လှည့်ကြည့်ရို့ ပြောလီရေ၊ “ယေရုရှလင်မြို့သမရို့၊ ငါ့အတွက် မငိုကတ်ကေ့။ ယင်းထက်ပင် ကိုယ်ရို့န ကိုယ်ရို့မာ သားသမီးရို့အတွက် ငိုကတ်၊ 29 အကြောင်းကား လူရို့ ဒေပိုင် ပြောဖို့စာအချိန် ရောက်လာလိမည်၊ ‘တစ်ခါလည်း သားသမီး မမွီးဖူးကတ်စာ အရာ အသျှေကို နို့မတိုက်ဖူးကတ်စာ အမြုံမရို့ မင်္ဂလာ ဟိကတ်တေ။’ 30 ယင်းအချိန်ခါ လူရို့စာ တောင်ကြီးတိကို ပြောကတ်လိမည်၊ ‘ငါရို့ဘားမာ ပြိုကျခလိုက်၊’ အရာ တောင်သျှေတိကို ပြောကတ်လိမည်၊ ‘ငါရို့ကို ကွယ်ထားခလိုက်!’ 31 အကြောင်းကား လူရို့စာ အပင်အစိမ်းကို ^{▼▼အပင်အစိမ်းန အပင်အခြောက်ယေရှုစာ ကိုယ့်ကို အပင်အစိမ်းန နှိုင်းယှဉ်လီပါရေ အရာ ရိုးရိုး ယုလူရို့ကို အပင်အခြောက်န နှိုင်းယှဉ်လီပါရေ။ လူရို့စာ ယေရှုကို ညှဉ်းဆဲရေဆိုကေ ရိုးရိုး ယုးလူရို့ကို ပိုရို့ ညှဉ်းဆဲကတ်ဖို့ဆိုစာ စကားကို ယေရှု ပြောလီစာ ဖြစ်ပါရေ။} တိုင်အောင် ဒေပိုင် လုပ်ကတ်တေဆိုကေ အပင်အခြောက်ကို အရာလည်း ပိုရို့ လုပ်ကတ်လိမည်!”

32 စစ်သားရို့စာ ရာဇဝတ်သင့်သူနှစ်ယောက်ကိုလည်း အသီသတ်ဖို့အတွက် ယေရှုနအတူ ယူလားကတ်လီရေ၊ 33 အဂေါင်းခွန် ဟို့ ခေါ်စာ နေရာတစ်ခုမာ ရောက်ကတ်တေခါ သူရို့စာ ယေရှုန ရာဇဝတ်သင့်သူနှစ်ယောက်ကို ကားတိုင်မာ တင်ကတ်လီရေ။ သူရို့နှစ်ယောက်မာ တစ်ယောက်ကို ယေရှု ညာဖက်က အခြားတစ်ယောက်ကို ဘယ်ဖက်က ချကတ်လီရေ။ 34 ယင်းခါ ယေရှုစာ ပြောလီရေ၊ “အိုး အဖ၊ သူရို့ကို ခွင့်ရွှတ်လိုက်ပါ၊ အကြောင်းကား သူရို့စာ ကိုယ်ရို့ ဇာ လုပ်ကတ်တေလည်းဆိုစာကို မသိကတ်ပါ။” စစ်သားရို့စာ ယေရှု အဝတ်အစားတိကို မဲဖေါက်ရို့ ကိုယ်ရို့အထဲမာ ဝီကတ်လီရေ။

35 လူရို့စာ ယင်းနေရာမာ ရပ်ရို့ ကြည့်နီကတ်လီရေ။ ဘာသာရေး ဂေါင်းဆောင်ရို့စာ ယေရှုကို သရော်ရို့ ပြောကတ်လီရေ၊ “ယင်းသူကား အခြားလူရို့ကို ကယ်ဆယ်နိုင်ရေ။ ယင်းသူ ထာဝရဘုရား၏ ရွီးကောက်ခြင်းကို ခံရစာ ခရစ်တော် ဖြစ်တေဆိုကေ ကိုယ့်ကိုကိုယ် ကယ်ဆယ်ပတ်စီ‍!”

36 စစ်သားရို့လည်း သူ့ကို ရယ်သွန်းပြုကတ်လီရေ။ သူရို့စာ ယေရှုကို သောက်စီဖို့အတွက် ပုံးရည် ယူခရို့ သူ့ကို ပြောလီရေ၊ 37 “နင် ယုဒလူမျိုးရို့မာ မင်း ဖြစ်တေဆိုကေ ကိုယ့်ကိုကိုယ် ကယ်ဆယ်။” 38 ကားတိုင်မာ သူ့အဂေါင်းထက်က ကမ္ဗည်းစာတစ်ခု ကပ်ရို့ ဟိလီရေ။ ထိုကမ္ဗည်းစာမာ၊ “ဒေသူ ယုဒလူမျိုးရို့မာ မင်း” ဟို့ ရွီးရို့ ဟိလီရေ။

39 ကားတိုင်မာ အတင်ခံလီစာ ရာဇဝတ်သင့်သူနှစ်ယောက်မာ တစ်ယောက်စာ ယေရှုကို ကဲရဲရို့ ပြောလီရေ၊ “အဝေး၊ နင် ခရစ်တော် ဆိုကား? ယင်းပိုင်ဆိုကေ နင် ကိုယ့်ကိုကိုယ် ကယ်ဆယ် အရာ ငါရို့ကိုလည်း ကယ်ဆယ်။”