Luke 4:31-37
နတ်ဆိုးကိုင်သူတစ်ယောက် အကောင်းဖြစ်ခြင်း
(မာကု ၁:၂၁-၂၈)
31ယင်းနောက် ယေရှုစာ ဂါလိလဲပြည်နယ်မာ ကပေရနောင်မြို့သျှေတို့ ကြွလီရေ အရာ သူစာ သတင်းနိမာ လူရို့ကို သွန်သင်ပီးလီရေ။ 32ယေရှု သွန်သင်ချက်ကို ကြားရို့ လူရို့စာ အံ့ဩကတ်လီရေ၊ အကြောင်းကား သူစာ အခွင့်အာဏာဟိသူတစ်ယောက်ပိုင် သွန်သင်ပီးလီရေ။ 33ထိုတရားဇရပ်မာ နတ်ဆိုးကိုင်သူတစ်ယောက် ဟိလီရေ။ 34သူစာ အားန အော်ရို့ ပြောလီရေ၊ “အိုး နာဇရက်မြို့သျှေသား ယေရှု! ကိုယ်ဘင် အကျွန်ရို့ကို ဇာဖို့ နှောက်သျှက်ပါစာလည်း? ကိုယ်ဘင် အကျွန်ရို့ကို ဖျက်စီးဖို့ လာပါစာလော? ကိုယ်ဘင် အသူလည်းဆိုစာကို အကျွန် သိပါရေ။ ကိုယ်ဘင်စာ ထာဝရဘုရား၏ သန့်ရှင်းသူ ဖြစ်ပါရေ။” 35ယေရှုစာ ထိုနတ်ဆိုးကို ဟောက်ရို့ ပြောလီရေ၊ “တိန်းရို့ နီ! ဒေသူခန္ဓာက ထွက်လားလီ!” ထိုနတ်ဆိုးစာ သူ့ကို အားကုံးသူ ရှိက ခါချဘိုက်ခလီရေ အရာ သူ့ကို တစ်ခုလည်း ဘေးအန္တရာယ် မပီးဘိုင်းန သူ့ခန္ဓာက ထွက်လားခလီရေ။ 36ယင်းခါ အားကုံးသူ အံ့ဩရို့ ကိုယ်ရို့အချင်းချင်း ပြောကတ်လီရေ၊ “ဒေ အကြောင်းအရာကား ဇာလည်း! ဒေသူ အခွင့်အာဏာန တန်ခိုးကို အသုံးပြုရို့ နတ်ဆိုးတိကို အာဏာချရေဆိုကေ နတ်ဆိုးတိ ထွက်လားခကတ်တေကား!” 37ယေရှု၏ သတင်းကို ထိုတစ်ရပ်တစ်ဝန်းလုံးသားရို့ ကြားရကတ်လီရေ။
Copyright information for
RmzSC