Luke 5:1-11
ပထမ တပည့် ရွီးကောက်ခြင်း
(မဿဲ ၄:၁၇-၂၂၊ မာကု ၁:၁၄-၂၀)
1တစ်ရက်နိ ယေရှုစာ ဂင်္နေသရက်မြစ်ကမ်းနားမာ ရပ်ရို့ တရားဟောပြောရို့ ဟိလီရေ။ ယင်းခါ လူရို့စာ ထာဝရဘုရား၏ စကားတော်ကို နားထောင်ဖို့အတွက် သူ့လေးဖက်လက်စိမာ အခဲအကျိုင် စုကတ်လီရေ။ 2ယင်းခါ သူစာ မြစ်ကမ်းနားမာ လောင်းနှစ်စင်းကို မြင်ရလီရေ။ ထိုလောင်းနှစ်စင်းက ဆင်းရို့ ပိုက်သမားရို့စာ ကိုယ်ရို့မာ ပိုက်တိကို ဆီးရို့ ဟိကတ်လီရေ။ 3ယင်းခါ ယေရှုစာ လောင်းတစ်စင်းမာ တက်လီရေ။ ထိုလောင်းစာ ရှိမုန် လောင်း ဟိလီရေ အရာ လောင်းကို ကမ်းနားက တစ်ဖဲ့ အဝီးတို့ ယူလားဖို့အတွက် ယေရှုစာ သူ့ကို တောင်းပန်လီရေ။ ယင်းနောက် ယေရှုစာ လောင်းမာ ထိုင်ရို့ လူရို့ကို သွန်သင်ပီးဖို့ စလီရေ။ 4သွန်သင်ပီးရို့ ပြီးရေခါ သူစာ ရှိမုန်ကို ပြောလီရေ၊ “ဒေဂု လောင်းကို ရီအနက်တို့ ယူလား အရာ ငါး ဖမ်းဖို့အတွက် နင်ရို့ ပိုက်ကို ချကတ်။” 5ရှိမုန်စာ ပြောလီရေ၊ “ဆရာ၊ အကျွန်ရို့ တစ်ညဉ့်လုံး ကြိုးစားအားထုတ်ရို့ ရှာရို့ပင် ငါးတစ်ကောင်လည်း မရလီပါ။ ယေကေလည်း ကိုယ်ဘင် ပြောရေအတိုင်း အကျွန် ပိုက်ကို ချပါမည်။” 6ပိုက်ကို ချလိုက်တေခါ ငါးအများကြီး ငြိမ့်ရေအတွက်န သူရို့မာ ပိုက်စာ စုတ်ဖို့ပျင်လီရေ။ 7ယင်းခါ သူရို့စာ ကူညီဖို့အတွက် အဖက်သားရို့ကို လက်ယတ်ရို့ ခေါ်လီရေ။ သူရို့စာ လာရို့ လောင်းနှစ်စင်းမာ ငါး ကောက်ရို့ တင်ကတ်တေခါ လောင်းတိစာ နစ်ဖို့ ပျင်လီရေ။ 8ယင်းသျှင့်ကို မြင်ရို့ ရှိမုန်-ပေတရုစာ ▼▼ပေတရု ပေတရုနာမည်စာ နောက်က ယေရှု မှည့်စာနာမည်အသစ် ဖြစ်ပါရေ။
ယေရှု ရှိက ဒူးထောက်ရို့ ပြောလီရေ၊ “အသျှင်၊ အကျွန် အပြစ်သေတစ်ယောက် ဖြစ်ပါရေ။ ကိုယ်တော် အကျွန့် နိုင်ဗြင်းက ကြွလီပါ။” 9ငါးအများကြီး ငြိမ့်စာကို မြင်ရေခါ ရှိမုန်န သူ့အဖက်သားရို့ အားကုံးသူ အံ့ဩကတ်လီရေ။ 10ယာကုပ်န ယောဟန်ဆိုစာ ဇေဗေဒဲမာ သားနှစ်ယောက်လည်း အံ့ဩကတ်လီရေ။ သူရို့စာ ရှိမုန်န ကုန်လုပ်ဖက်သား ဖြစ်ကတ်တေ။ ယင်းခါ ယေရှုစာ ရှိမုန်ကို ပြောလီရေ၊ “မကြောက်ကေ့၊ ဒေဂုကပင်စရို့ နင် လူဆွယ်ရမည်။” 11ယင်းနောက် သူရို့စာ လောင်းတိကို မြစ်ကမ်းနားတို့ ယူခကတ်လီရေ အရာ ဟိသမျ အားကုံးကို ထားဘိုက်ခရို့ ယေရှု နောက်က လိုက်ကတ်လီရေ။
Copyright information for
RmzSC