Luke 9:10-17
လူငါးထောင်ကို ကျွေးခြင်း
(မဿဲ ၁၄:၁၃-၂၁၊ မာကု ၆:၃၀-၄၄၊ ယောဟန် ၆:၁-၁၅)
10ယေရှု ရွှတ်လိုက်လီစာ တပည့်ရို့ ပြန်လာကတ်လီရေ အရာ သူရို့စာ ကိုယ်ရို့ လုပ်ခကတ်စာ ဟိသမျ အကြောင်းကို ယေရှုဘားမာ ပြောပြကတ်လီရေ။ ယင်းခါ ယေရှုစာ သူရို့ကို ယူရို့ ဗက်ဇဲဒရွာအနားက တတိန်းဆဆိတ်နေရာ တစ်ခုတို့ ကြွလီရေ။ 11ယေကေလည်း လူရို့စာ ထိုသတင်းကို ကြားရို့ ယေရှု နောက်က နောက်က လိုက်ကတ်လီရေ။ ယေရှုစာ ထိုလူရို့ကို လက်ခံလီရေ အရာ သူရို့ဘားမာ ထာဝရဘုရား၏ နိုင်ငံတော် အကြောင်းကို ဟောပြောလီရေ။ အရာ ရောဂါကောင်းဖို့ လိုသူရို့ကို ကောင်းအောင် လုပ်လီရေ။ 12နီဝင်လာရေခါ ထိုတပည့်တစ်ဆယ့်နှစ်ယောက်စာ ယေရှုတို့ လာရို့ ပြောကတ်လီရေ၊ “ဒေဂု အကျွန်ရို့ ဟိစာနေရာစာ တတိန်းဆဆိတ်နေရာ ဖြစ်ပါရေ။ ယင်းအတွက်န ဒေ လူရို့ အပါးနီးဝန်းကျင်မာ ရွာတိတို့ လားရို့ အစားဝယ်ဖို့ ရလတ်အောင် အရာ ကိုယ်ရို့ တည်းခိုဖို့စာနေရာ ရှာဖို့ ရလတ်အောင် သူရို့ကို ရွှတ်လိုက်ပါဖိ။” 13ယေကေလည်း ယေရှုစာ သူရို့ကို ပြောလီရေ၊ “နင်ရို့ ကိုယ်တိုင် သူရို့ကို တစ်ခုမသာ စားဖို့ ပီးလိုက်ကတ်။” ယင်းခါ သူရို့စာ ပြောကတ်လီရေ၊ “ယေကေလည်း အကျွန်ရို့ဘားမာ ပေါင်မုန့် ငါးသျှက်န ငါးနှစ်ကောင်တောက်ရာ ဟိပါရေ။ အကျွန်ရို့ လားရို့ ဒေ ဟိသမျ လူရို့အတွက် အစားဝယ်ယူခဖို့ ရဖို့ဆိုကေ သူရို့ကို ကျွေးဖို့ ရပါဖို့။” 14အကြောင်းကား ယင်းနေရာမာ ယောက်ျား သက်သက် ငါးထောင်လှောက် ဟိလီရေ။ ယေရှုစာ ကိုယ့်တပည့်ရို့ကို ပြောလီရေ၊ “တစ်စုစီမာ အယောက်ငါးဆယ်၊ ငါးဆယ် ထိုင်စီကတ်။” 15တပည့်ရို့စာ ဟိသမျ လူရို့ကို ယင်းပိုင်တထန် ထိုင်စီကတ်လီရေ။ 16ယင်းခါ ယေရှုစာ ထိုပေါင်မုန့် ငါးသျှက်န ငါးနှစ်ကောင်ကို ယူရို့ ဂေါင်းခင်ဘုံတို့ မော်ကြည့်ရို့ ထာဝရဘုရားကို ကျေးဇူးတင်လီရေ။ ယင်းနောက် သူစာ ပေါင်မုန့်တိကို ဖဲ့ရို့ လူရို့ကို ဝီပီးဖို့အတွက် တပည့်ရို့အလက်မာ အပ်လီရေ။ 17ယင်းခါ လူရို့ အားကုံးသူ ဝအောင် စားကတ်လီရေ။ ယင်းနောက် ကျရို့ဟိစာ အပဲ့အခြမ်းတိကို တပည့်ရို့ ကောက်ကတ်တေခါ တစ်ဆယ့်နှစ်တောင်း ဖြစ်လီရေ။
Copyright information for
RmzSC