Mark 14:12-26
အဆုံးခေါက် လွတ်မြောင့်ခြင်းပွဲကို စားခြင်း
(မဿဲ ၂၆:၁၇-၂၅၊ လုကာ ၂၂:၇-၁၃၊ ၂၁-၂၃၊ ယောဟန် ၁၃:၂၁-၃၀)
12တဆီးမထည့်စာမုန့်ပွဲ ပထမနိမာ လွတ်မြောင့်ခြင်းပွဲအတွက် သိုးဆိတ်သျှေတိကို လှီးရို့ ထားရလီရေ။ ယင်းအတွက်န တပည့်ရို့စာ ယေရှုကို မီးကတ်လီရေ၊ “ကိုယ်တော်အတွက် အကျွန်ရို့ ဇာမာ လွတ်မြောင့်ခြင်းပွဲကို အဆင်သင့် လုပ်ပါဖို့စာလည်း?” 13ယေရှုစာ တပည့်နှစ်ယောက်ကို ဒေပိုင် ပြောရို့ ရွှတ်လိုက်လီရေ၊ “နင်ရို့ မြို့ထဲတို့ လားခီကတ်။ နင်ရို့ မြို့ထဲတို့ ဝင်ကတ်တေခါ ယောက်ျားတစ်ယောက် ရီအိုးခွက်တစ်လုံး ရွက်ရို့ လားစာကို မြင်ရကတ်လိမည်။ နင်ရို့ သူ့နောက်က လိုက်လီကတ်။ 14သူဝင်ဖို့စာ အိမ်က အိမ်သျှင်ကို ပြောလီကတ်၊ ‘ငါ ကိုယ့်တပည့်ရို့နအတူ လွတ်မြောင့်ခြင်းပွဲကို စားဖို့အတွက် ဧည့်ခံစာ အိမ်ခန့် ဇာမာလည်း ဟို့ ဆရာ မီးလိုက်ပါရေ။’ 15ယင်းခါ သူစာ နင်ရို့ကို အထက်မာ ဆင်ထားစာ အိမ်ခန့်ကြီး တစ်ခန့်ကို ပြပီးလိမည်။ ထိုအိမ်ခန့်မာ အားကုံးစာ အဆင်သင့် လုပ်လီကတ်။” 16သူရို့ မြို့ထဲတို့ ဝင်လားခကတ်တေခါ ယေရှု ပြောပြလိုက်စာပိုင်တထန် ဟိသမျ အားကုံးကို မြင်ရကတ်လီရေ အရာ လွတ်မြောင့်ခြင်းပွဲကို စားဖို့အတွက် ဟိသမျ အားကုံး အဆင်သင့် လုပ်ကတ်လီရေ။ 17ယင်းနောက် နီဝင်လာရေခါ ယေရှုစာ တပည့်တစ်ဆယ့်နှစ်ယောက်ကို ယူရို့ မြို့ထဲတို့ ဝင်လီရေ။ 18သူရို့ စားသောက်ကတ်တေခါ ယေရှုစာ ပြောလီရေ၊ “ငါ နင်ရို့ကို အမှန် ပြောရေ၊ နင်ရို့အထဲက တစ်ယောက် ငါ့ကို ရန်သူရို့အလက်မာ ဖမ်းပီးလိမည် အရာ သူစာ ငါနအတူ ထိုင်ရို့ စားသောက်နီရေ။” 19ယင်းခါ တပည့်ရို့စာ စိတ်ဒုက္ခ ရကတ်လီရေ အရာ တစ်ယောက်ပြီးကေ တစ်ယောက် မီးကတ်လီရေ၊ “အသျှင်၊ ထိုသူစာ အကျွန်ပါလော?” 20ယေရှုစာ သူရို့ကို ပြောလီရေ၊ “သူစာ ဒေ တစ်ဆယ့်နှစ်ယောက်အထဲက တစ်ယောက် ဖြစ်တေ။ သူစာ ငါနအတူ ခွက်မာ ပေါင်မုန့် နှစ်ရို့ စားနီရေ။ 21မနုသသားတော် အကြောင်းကို ကျမ်းစာမာ ရွီးရို့ ဟိရေအတိုင်း သူစာ သီရဖို့၊ ယေကေလည်း သူ့ကို ရန်သူရို့အလက်မာ ဖမ်းပီးဖို့သူစာ အမင်္ဂလာဟိရေ။ သူစာ လူ့ဇာတိအဖြစ် မွီးဖွားခြင်းကို မခံယူလီကေပင် သူ့အတွက် ပိုရို့ ကောင်းလီဖို့သိ။”အသျှင်၏ ပွဲတော်မင်္ဂလာ
(မဿဲ ၂၆:၂၆-၃၀၊ လုကာ ၂၂:၁၄-၂၀၊ ၁ကောရိန္သု ၁၁:၂၃-၂၅)
22သူရို့ စားသောက်ကတ်တေခါ ယေရှုစာ ပေါင်မုန့်ကို ယူရို့ ထာဝရဘုရားကို ကျေးဇူးတင်လီရေ အရာ သူစာ ထိုပေါင်မုန့်ကို ဖဲ့ပြီးကေ တပည့်ရို့ကို ပီးရို့ ပြောလီရေ၊ “ယော၊ ယူကတ်၊ ဒေ ပေါင်မုန့် ငါ့အသား ဖြစ်တေ။” 23ယင်းနောက် သူစာ စပျစ်ရည် ခွက်ကို ယူရို့ ထာဝရဘုရားကို ကျေးဇူးတင်လီရေ အရာ တပည့်ရို့ကို ပီးလီရေ။ သူရို့ အားကုံးသူ ထိုခွက်က စပျစ်ရည်ကို သောက်ကတ်လီရေ။ 24ယင်းခါ ယေရှုစာ သူရို့ကို ပြောလီရေ၊ “ဒေ စပျစ်ရည်စာ ငါ့သွီး ဖြစ်တေ။ လူအများကြီးအတွက် ငါ့မာ ဒေ သွီးကို သွန်းလောင်းပီးဖို့။ လူရို့အတွက် ငါ့မာ ဒေ သွီးန ထာဝရဘုရား၏ စာချုပ်အသစ်ကို ထိုးရေ။ 25ငါ နင်ရို့ကို အမှန် ပြောရေ၊ ထာဝရဘုရား၏ နိုင်ငံတော်မာ ငါ စပျစ်ရည်အသစ်ကို မသောက်သကြား ငါ အရာတစ်ခါလည်း စပျစ်ရည် မသောက်ပျာ။” 26ယင်းနောက် သူရို့စာ တေခြင်းတစ်ပုဒ် ဆိုပြီးကေ မြို့က ထွက်ရို့ သံလွင်တောင်တို့ တက်ကတ်လီရေ။
Copyright information for
RmzSC