Mark 4:13-20
လယ်သမား ပုံဥပမာ အဓိပ္ပါယ်ကို ရှင်းပြခြင်း
(မဿဲ ၁၃:၁၈-၂၃၊ လုကာ ၈:၁၁-၁၅)
13ယင်းနောက် ယေရှုစာ သူရို့ကို ပြောလီရေ၊ “နင်ရို့ ဒေ ပုံဥပမာ အဓိပ္ပါယ်ကို နားမလည်ကတ်လော? ယင်းပိုင်ဆိုကေ အခြားပုံဥပမာ အဓိပ္ပါယ်ကို နင်ရို့ ဇာပိုင်ပျင်ရို့ နားလည်ကတ်ဖို့လည်း? 14လယ်သမား ကြဲလီစာ မျိုးစိတိစာ ထာဝရဘုရား၏ စကားတော် ဖြစ်တေ။ 15လမ်းနားမာ ကျစာမျိုးစိတိစာ ထာဝရဘုရား၏ စကားတော်ကို နားထောင်ကတ်စာ လူတစ်မျိုးနတူကတ်တေ။ သူရို့စာ စကားတော်ကို ကြားရို့အတိုင်းလည်း မာရ်နတ်စာ ချက်ချင်း လာရို့ သူရို့ စိတ်နှလုံးက ထိုစကားတော်ကို နုတ်ယူလားခရေ။ 16“အရာ ကျောက်နရောစာမြေမာ ကျစာမျိုးစိတိစာ ထိုစကားတော်ကို နားထောင်ကတ်စာ လူတစ်မျိုးနတူကတ်တေ။ သူရို့ ထိုစကားတော်ကို ကြားရေချက်ချင်း ဝမ်းသာရို့ လက်ခံကတ်တေ။ 17ယေကေလည်း ထိုစကားတော်စာ သူရို့ စိတ်နှလုံးမာ အမြစ် အလှပ မထိုးနိုင်။ ယင်းအတွက်န သူရို့စာ တစ်ရက်နှစ်ရက်တောက်ရာ တည်မြဲနိုင်ခကတ်တေ။ ယင်းနောက် သူရို့စာ ထိုစကားတော် အကြောင်းန ညှဉ်းဆဲခြင်းန ဒုက္ခကို ခံရရေချက်ချင်း နောက်ဆုတ်လားခကတ်တေ။ 18“စူးခြုံတောမာ ကျစာမျိုးစိတိစာ ထိုစကားတော်ကို နားထောင်ကတ်စာ အခြားလူတစ်မျိုးနတူကတ်တေ။ 19သူရို့စာ ထိုစကားတော်ကို ကြားရို့အတိုင်းလည်း သူရို့မာ အိမ်ထောင်ရေး စဉ်းစားခြင်း၊ ပစ္စည်း-ဥစ္စာကို တွယ်တာခြင်း အရာ အမျိုးမျိုး ဝန်တိကို လောဖတတ်ခြင်းစာ သူရို့ စိတ်နှလုံးမာဟိစာ ထာဝရဘုရား၏ စကားတော်ကို ဖိထားရေ။ ယင်းအတွက်န သူရို့ ဘဝမာ ကောင်းစာ အသီးတိ မသီးနိုင်။ 20“မြေအကောင်းမာ ကျစာမျိုးစိတိစာ ထိုစကားတော်ကို နားထောင်ကတ်စာ အရာလည်း အခြားလူတစ်မျိုးနတူကတ်တေ။ သူရို့စာ ထိုစကားတော်ကို ကြားရေအတိုင်း လက်ခံရို့ အသီးသီးကတ်တေ အရာ သူရို့အထဲက တစ်ယောက်တစ်ရီမာ အဆသုံးဆယ်၊ တစ်ယောက်တစ်ရီမာ အဆခြောက်ဆယ် အရာ တစ်ယောက်တစ်ရီမာ အဆတစ်ရာတိုင်အောင် အသီးသီးရေ။”
Copyright information for
RmzSC