Mark 5:21-43
မိန်းမနှစ်ယောက် အကောင်းဖြစ်ခြင်း
(မဿဲ ၉:၁၈-၂၆၊ လုကာ ၈:၄၀-၅၆)
21– 22ယေရှုစာ အရာတစ်ပြန် လောင်းမာ တက်ရို့ မြစ်ကမ်းတစ်ဖက်တို့ ကူးလီရေ။ ယင်းခါ လူအများကြီး သူ့လေးဖက်လက်စိမာ လာရို့ စုကတ်လီရေ။ သူစာ မြစ်ကမ်းနားမာ ရပ်နီတုံးမာ ယာဣရုနာမည်န ယုဒလူမျိုး တရားဇရပ်မာ ဂေါင်းဆောင်တစ်ယောက် ယင်းနေရာတို့ လာလီရေ အရာ သူစာ ယေရှုကို မြင်ရေခါ သူ့အခြီးရင်းမာ ဒူးထောက်လီရေ။ 23အရာ သူစာ ယေရှုကို ကောင်းကောင်း တောင်းပန်ရို့ ပြောလီရေ၊ “ဆရာ၊ အကျွန့်မာ သမီးသျှေ သီပါဖို့ဗျာ။ ကိုယ်ဘင် လာရို့ အကျွန့် သမီးသျှေ ခန္ဓာမာ အလက်တင်ရေဆိုကေ သူစာ အသက်ရှင်ပါဖို့။” 24ယင်းခါ ယေရှုစာ သူနအတူ လိုက်လီရေ။ ယေရှုနအတူ လူအများကြီး လိုက်ကတ်လီရေ အရာ သူ့လေးဖက်လက်စိမာ တိုးရို့တွန်းရို့ ဟိကတ်လီရေ။ 25ထိုလူပရိတ်သတ်ရို့အထဲမာ တစ်ဆယ့်နှစ်နှစ်ပတ်လုံး သွီးကျရောဂါ ဖြစ်နီစာ မိန်းမတစ်ယောက် ဟိလီရေ။ 26သူစာ ဆီးဆရာရို့ အကြောင်းန ကောင်းကောင်း ဒုက္ခ ခံရလီရေ။ သူစာ ရောဂါကောင်းဖို့အတွက် ကိုယ့်မာ ဟိသမျ အားကုံးကို ရောင်းရို့ ဆီးကြည့်လီရေ၊ ယေကေလည်း သူ့မာ ရောဂါကောင်းဖို့စာထက်ပင် တစ်ရက်ထက် တစ်ရက် ပိုရို့ ဆိုးလာလီရေ။ 27ယေရှု အကြောင်းကို ကြားရို့ သူစာ လူကျိုင်ထဲမာ ယေရှု နောက်က လာရို့ သူ့ကိုယ်ရုံကို ကိုင်လီရေ၊ 28အကြောင်းကား သူစာ၊ “ယေရှု အဝတ်ကိုဆိုကေလည်း ကိုင်ဖို့ ရရေဆိုကေ ငါ့မာ ရောဂါကောင်းလားလီဖို့” ဆိုပြီးကေ စိတ်မာ စိတ်မာ စဉ်းစားရို့ ဟိလီရေ။ 29ယေရှု ကိုယ်ရုံစွမ်ကို ကိုင်ရေချက်ချင်း သူ့မာ သွီးကျရောဂါစာ ကောင်းလားခလီရေ အရာ သူစာ ကိုယ့်မာ ရောဂါကောင်းလားခဗျာဆိုစာကို သိလီရေ။ 30ယေရှုစာ ကိုယ့်က တန်ခိုး ထွက်လားခစာကို ချက်ချင်း သိလီရေ။ ယင်းအတွက်န သူစာ လူပရိတ်သတ် လေးဖက်လက်စိတို့ ဝန်းရို့ယာရို့ ကြည့်ပြီးကေ မီးလီရေ၊ “ငါ့အဝတ်ကို အသူ ကိုင်လီစာလည်း?” 31သူ့တပည့်ရို့စာ ပြောကတ်လီရေ၊ “လူရို့ တစ်ယောက်ကို တစ်ယောက် တိုးရို့တွန်းရို့ ကိုယ်ဘင်ဘားမာ အက်ကျကတ်စာကို ကိုယ်ဘင် မြင်ပါရေ၊ ယေကေလည်း ‘ငါ့အဝတ်ကို အသူ ကိုင်ရေလည်း’ ဟို့ ကိုယ်ဘင် မီးပါရေ?” 32ယေကေလည်း ယေရှုစာ ကိုယ့်ကို အသူ ကိုင်လီရေလည်းဆိုစာကို သိဖို့အတွက် လေးဖက်လက်စိတို့ ဝန်းရို့ယာရို့ ကြည့်လီရေ။ 33ယင်းမိန်းမစာ ကိုယ့်ခန္ဓာမာ ဇာ ဖြစ်တေလည်းဆိုစာကို သိရေခါ တုန်ရို့ တုန်ရို့ လာရို့ ယေရှု အခြီရင်းမာ ဒူးထောက်လီရေ အရာ ဟိသမျ အကြောင်းအရာကို ပြောပြလီရေ။ 34ယေရှုစာ သူ့ကို ပြောလီရေ၊ “အယွေ၊ အယွေ ကျုံရေအတွက်န အယွေမာ ရောဂါကောင်းလားခဗျာ။ ဒေဂု စိတ်အီးချမ်းသာန ပြန်လားလီဖိ၊ အယွေ အရာ ဒေပိုင် ဒုက္ခကို မခံရစီကေ့ဖိ။” 35ယေရှု စကားပြောနီတုံးမာ ဂေါင်းဆောင် ယာဣရုအိမ်က လူလိုင်းကေယောက် လာရို့ ပြောကတ်လီရေ၊ “ကိုယ်ဘင်မာ သမီးသျှေ သီလားခပါဗျာ။ ဆရာကို ဒုက္ခ မထည့်ပါကေ့ဖိ။” 36ယေကေလည်း ယေရှုစာ ထိုစကားကို ကြားရို့ ယာဣရုကို ပြောလီရေ၊ “မကြောက်ကေ့၊ ကျုံခြင်းတရားကိုရာ ထား!” 37ယင်းခါ ယေရှုစာ သက်သက် ပေတရု၊ ယာကုပ် အရာ သူ့မာညီ ယောဟန်ကို ကိုယ်နအတူ ခေါ်ယူလီရေ။ 38ယင်းနောက် သူစာ ယာဣရုအိမ်တို့ ရောက်တေခါ ကောင်းကောင်း ရောင်းရင်းသပ်ပြီးကေ အော်ရို့ ငိုနီကတ်စာကို မြင်ရလီရေ။ 39ယင်းခါ သူစာ အိမ်ထဲတို့ ဝင်ရို့ လူရို့ကို ပြောလီရေ၊ “ကိုယ်ဘင်ရို့ ဇာဖို့ ရောင်းရင်းသပ်ရို့ ငိုနီကတ်စာလည်း? ဒေ မိန်းမသျှေ မသီသိ၊ အိပ်နီစာရာ။” 40ယေရှု စကားကို ကြားရို့ လူရို့စာ ရယ်သွန်းပြုကတ်လီရေ။ ယင်းခါ သူစာ အားကုံးသူကို ပြင်တို့ ထွက်ဖို့ ခိုင်းလီရေ။ အရာ သူစာ မိန်းမသျှေ အမိအဖန ကိုယ့်တပည့်ရို့ကို ယူရို့ မိန်းမသျှေ ဟိစာအခန့်တို့ ဝင်လီရေ။ 41အရာ သူစာ မိန်းမသျှေ အလက်ကို ကိုင်ရို့ ပြောလီရေ၊ “တလိသကုမိ။” ဒေ စကား အဓိပ္ပါယ်ကား၊ သမီးသျှေ၊ ငါ နင့်ကို ပြောရေ၊ ထဖိ။ 42ယေရှု ပြောရေချက်ချင်း ထိုမိန်းမသျှေစာ ထရို့ လားနီလီရေ။ ယင်းခါ အားကုံးသူ ကောင်းကောင်း အံ့ဩကတ်လီရေ။ (ထိုမိန်းမသျှေစာ အသက်တစ်ဆယ့်နှစ်နှစ် ဟိလီရေ)။ 43ယင်းနောက် သူစာ အိမ်ထဲမာ ဖြစ်စာ အကြောင်းအရာကို တစ်ယောက်ဘားမာလည်း မပြောရအောင် တတင်းရရင်း ဟန့်ဘိုက်ခလီရေ အရာ ထိုမိန်းမသျှေကို တစ်ခုမသာ စားစရာ ပီးဖို့ ခိုင်းလီရေ။
Copyright information for
RmzSC