Mark 6:1-6
နာဇရက်မြို့သျှေသားရို့ ယေရှုကို ငြင်းပယ်ခြင်း
(မဿဲ ၁၃:၅၃-၅၈၊ လုကာ ၄:၁၆-၃၀)
1ယင်းနောက် ယေရှုစာ ယင်းနေရာက ထွက်ရို့ ကိုယ်ကြီးပြင်းခစာ နာဇရက်မြို့သျှေတို့ ကြွလီရေ။ ယင်းခါ တပည့်ရို့လည်းသောက် သူနအတူ ပါကတ်လီရေ။ 2သူစာ သတင်းနိမာ တရားဇရပ်တို့ ကြွရို့ သွန်သင်ပီးဖို့ စလီရေ အရာ လူအများကြီး သူ့စကားကို ကြားရေခါ အံ့ဩရို့ ပြောကတ်လီရေ၊ “ဒေသူမာ ဒေ ညာဏ်ပညာတိ ဇာက ရခီရေလည်း? ဒေသူ ဇာပိုင်ပျင်ရို့ ညာဏ်ပညာန စကား ပြောနိုင်ရေလည်း? အရာ ဒေ အံ့ဩဖွယ်အလုပ်တိကို ဒေသူ ဇာပိုင်ပျင်ရို့ လုပ်နိုင်ရေလည်း? 3ဒေသူ လက်သမားသျှေ မဟုတ်လော? ဒေသူ မာရိသား မဟုတ်လော? ဒေသူစာ ယာကုပ်၊ ယောသပ်၊ ယုဒ အရာ ရှိမုန်မာ အစ်ကိုသေ မဟုတ်လော? ဒေသူမာ နမှရို့ ဒေမာ ငါရို့နအတူ နီထိုင်ကတ်တေ မဟုတ်လော?” လူရို့မာ ဒေပိုင် စဉ်းစားချက် အကြောင်းန သူရို့စာ ယေရှုကို လက်ခံဖို့ မနိုင်ကတ်လီ။ 4ယင်းခါ ယေရှုစာ သူရို့ကို ပြောလီရေ၊ “ဘုရားသတင်းပို့သူရို့စာ ကိုယ့်မြို့၊ ကိုယ့်အမျိုးအဆွီ အရာ ကိုယ့်အိမ်ကို ပယ်ရို့ အခြား ဟိသမျ နေရာမာ ရိုသေခြင်းကို ခံရကတ်တေ။” 5ယင်းနောက် သူစာ ရောဂါသေ လိုင်းကေယောက်ဘားမာ အလက်တင်ရို့ အကောင်း လုပ်လီရေ၊ ယေကေလည်း သူစာ ထိုအလုပ်တိကို ပယ်ရို့ ယင်းနေရာမာ အခြားအံ့ဩဖွယ်အလုပ် တစ်ခုလည်း လုပ်ဖို့ မရခလီဗျာ။ 6လူရို့ ကိုယ့်ကို မကျုံကတ်စာကို မြင်ရို့ သူစာ ကောင်းကောင်း အံ့ဩလီရေ။ ယင်းနောက် သူစာ မြို့ရွာတိမာ လည်ရို့ သွန်သင်ပီးဖို့ စလီရေ။
Copyright information for
RmzSC