Mark 6:17-29
ရီနှစ်မင်္ဂလာပီးသူ ယောဟန် အသီခံရခြင်း
(မဿဲ ၁၄:၃-၁၂)
17– 18ရီနှစ်မင်္ဂလာပီးသူ ယောဟန်စာ ဒေပိုင် အသီခံရလီရေ။ ဟေရုဒ်မင်းမာ ဖိလိပ္ပုနာမည်န ညီတစ်ယောက် ဟိလီရေ။ ဖိလိပ္ပုမာ မယားနာမည်စာ ဟေရောဒိမ ဖြစ်တေ။ ဟေရုဒ်မင်းစာ ဒေ ဟေရောဒိမ အကြောင်းန လူရွှတ်လိုက်ရို့ ယောဟန်ကို ဖမ်းရို့ ထောင်မာ လှောင်ထားလီရေ၊ အကြောင်းကား ယောဟန်စာ ဟေရုဒ်မင်းကို အပြန်ပြန် ပြောလီရေ၊ “ကိုယ်ဘင် ကိုယ့်ညီမာ မယား ဟေရောဒိမကို နစပ်ဖို့ မသင့်ပါ။” 19ယင်းအတွက်န ဟေရောဒိမစာ ယောဟန်ကို ကောင်းကောင်း မန်တက်ရို့ အသီသတ်ဖို့ ကြည့်လီရေ။ ယေကေလည်း သူစာ ယောဟန်ကို သတ်ဖို့ မနိုင်လီ၊ 20အကြောင်းကား ဟေရုဒ်မင်းစာ ယောဟန်ကို သူတော်ကောင်းန သန့်ရှင်းသူတစ်ပါး ဖြစ်တေဆိုစာကို သိလီရေအတွက်န သူ့ကို ကြောက်လီရေ။ ယင်းအတွက်န သူစာ ယောဟန်ကို အပြန်ပြန် ဖီးဒုက္ခက ကယ်ဆယ်လီရေ။ ဟေရုဒ်မင်းစာ ယောဟန် စကားကို နားထောင်ရေခါ မငြိမ်းမသာ ဖြစ်ကေလည်းသောက် သူ့စကားကို နားထောင်ဖို့ နှစ်သက်လီရေ။ 21နောက်ဆုံးပြီးမာ ဟေရောဒိမမာ ယောဟန်ကို အသီသတ်ဖို့ အခွင့်ရေးတစ်ခု ရလီရေ။ ဟေရုဒ်မင်းစာ ကိုယ်မွီးဖွားစာ ရက်ကို ကျင့်ပရေနိမာ အစိုးရလူကြီးရို့ကို၊ စစ်ဗိုလ်ကြီးရို့ကို အရာ ဂါလိလဲပြည်နယ်မာ ဟိသမျ လူကြီးရို့ကို စားပွဲတစ်ပွဲ ပီးလီရေ။ 22ဟေရောဒိမ သမီးစာ ထိုစားပွဲမာ ကပြရို့ ဟေရုဒ်မင်းန အခြား အာဂန္တုရို့ကို နှစ်သက်အောင် လုပ်လီရေ။ ယင်းခါ ဟေရုဒ်မင်းစာ ထိုမိန်းမသျှေကို ပြောလီရေ၊ “နင် တောင်းစာကို ငါ ပီးဖို့။” 23ဟေရုဒ်မင်းစာ ထိုမိန်းမသျှေဘားမာ အကျိန်သစ္စာ ကိုင်ရို့ ပြောလီရေ၊ “နင် တောင်းစာကို ငါ ပီးဖို့။ ယင်းထက်မက ငါ့နိုင်ငံ တစ်ခြမ်းကိုလည်း နင့်ကို ငါ ပီးဖို့။” 24ယင်းခါ ထိုမိန်းမသျှေစာ အမိတို့ လားရို့ မီးလီရေ၊ “အမိ၊ အကျွန် ဇာ တောင်းဖို့လည်း?” အမိစာ ပြောလီရေ၊ “ရီနှစ်မင်္ဂလာပီးသူ ယောဟန် အဂေါင်းကို တောင်းခီ။” 25ထိုမိန်းမသျှေစာ ချက်ချင်း မင်းတို့ လားရို့ ပြောလီရေ၊ “ရီနှစ်မင်္ဂလာပီးသူ ယောဟန် အဂေါင်းကို လောင်ပန်း တစ်ချပ်မာ ထည့်ရို့ အကျွန့်တို့ ယူခပါ။” 26ထိုစကားကို ကြားရို့ ဟေရုဒ်မင်းစာ ကောင်းကောင်း စိတ်ဒုက္ခ ရလီရေ၊ ယေကေလည်း စားပွဲမာ လာကတ်စာ အာဂန္တုရို့ ရှိက အကျိန်သစ္စာ ကိုင်ရို့ ပြောလီရေအတွက်န သူစာ ထိုမိန်းမသျှေ တောင်းစာကို ငြင်းဖို့ မနိုင်လီဗျာ။ 27– 28ယင်းခါ သူစာ ချက်ချင်း စစ်သားတစ်ယောက်ကို ရွှတ်လိုက်ရို့ ယောဟန် အဂေါင်းကို ဖြတ်ယူခဖို့ ခိုင်းလီရေ။ ထိုစစ်သားစာ ထောင်တို့ လားရို့ ယောဟန် အဂေါင်းကို ဖြတ်လီရေ။ ယင်းနောက် သူစာ ထိုအဂေါင်းကို လောင်ပန်း တစ်ချပ်မာ ထည့်ယူခရို့ ထိုမိန်းမသျှေကို ပီးလီရေ။ အရာ မိန်းမသျှေစာ ထိုအဂေါင်းကို ကိုယ့်အမိကို ပီးလီရေ။ 29ထိုသတင်းကို ကြားရို့ ယောဟန် တပည့်ရို့စာ လာပြီးကေ သူ့အကောင်တော်ကို ယူလားရို့ သင်္ဂြိုဟ်ကတ်လီရေ။
Copyright information for
RmzSC