Mark 9:14-29
နတ်ဆိုးကိုင်စာ ယောက်ျားသျှေ အကောင်းဖြစ်ခြင်း
(မဿဲ ၁၇:၁၄-၂၁၊ လုကာ ၉:၃၇-၄၃)
14ယင်းနောက် ယေရှုန တပည့်သုံးယောက်စာ ကျန်ခစာ တပည့်ရို့တို့ ပြန်လာကတ်လီရေ။ ယင်းခါ သူရို့ လေးဖက်လက်စိမာ လူအများကြီး စုရို့ ဟိကတ်စာန ကျမ်းဆရာ လိုင်းကေယောက် ထိုတပည့်ရို့န အငြင်းအခုံ ဖြစ်နီကတ်စာကို မြင်ရကတ်လီရေ။ 15ထိုလူရို့စာ ယေရှုကို မြင်ရေခါ ကောင်းကောင်း အံ့ဩကတ်လီရေ အရာ ယေရှုတို့ ဗြီးလားရို့ သူ့ကို ကြိုဆိုကတ်လီရေ။ 16ယေရှုစာ ကျမ်းဆရာရို့ကို မီးလီရေ၊ “ကိုယ်ဘင်ရို့ ငါ့တပည့်ရို့န ဇာ အကြောင်းကို ယူရို့ အငြင်းအခုံ လုပ်နီကတ်စာလည်း?” 17ယင်းခါ လူကျိုင်ထဲက တစ်ယောက်စာ အဖြေပီးလီရေ၊ “ဆရာ၊ အကျွန့် သားကို ကိုယ်ဘင် တပည့်ရို့တို့ ယူခလီပါရေ။ သူ့ကို ပပွါးနတ် ကိုင်ထားရေအတွက်န စကားပြောဖို့ မနိုင်ပါ။ 18ယင်းနတ်ဆိုးစာ အကျွန့် သားကို ကိုင်ရေချက်ချင်း မြေပြင်မာ လှဲချပါရေ။ သူ့ပစက အမြှုပ်ထွက်ပါရေ၊ သူစာ သွားချင်းသွား ကြိတ်ပါရေ အရာ သူ့ခန္ဓာစာ ကျကျန်းတတက် ဖြစ်လားခပါရေ။ အကျွန် သူ့ကို ကိုယ်ဘင် တပည့်ရို့တို့ ယူခရို့ နတ်ဆိုး နှင်ထုတ်ဖို့ ခိုင်းလီပါရေ၊ ယေကေလည်း သူရို့ နှင်ထုတ်ဖို့ မနိုင်လီကတ်ပါ။” 19ယင်းခါ ယေရှုစာ ပြောလီရေ၊ “အိုး မကျုံသူရို့! ငါ နင်ရို့နအတူ ဇာမျှရက် နီဖို့သိလည်း? အရာ နင်ရို့ကို ဇာမျှရက် သည်းခံရို့ နီဖို့သိလည်း? နင့် သားကို ငါ့တို့ ယူခ။” 20ယင်းခါ လူရို့စာ ထိုသူကို ယေရှုတို့ ယူလာကတ်လီရေ။ နတ်ဆိုးစာ ယေရှုကို မြင်ရေခါ ထိုသူကို ကောင်းကောင်း ပပြန်းတုန်အောင် လုပ်လီရေ။ အရာ သူ့ပစက အမြှုပ်ထွက်ရို့ သူစာ မြေပြင်မာ လူးနီလီရေ။ 21ယေရှုစာ သူ့အဖကို မီးလီရေ၊ “ဒေသူ ဒေပိုင် ဖြစ်နီစာ ဇာမျှရက် ဟိဗျာလည်း?” အဖစာ အဖြေပီးလီရေ၊ “အသျှေကပင် ဖြစ်ရို့ လာပါစာ။ 22ဒေ နတ်ဆိုးစာ အကျွန့်သားကို သတ်ဖို့အတွက် အမြဲတိုင်း ရီမာ မဟုတ်ကေ မီးမာ ချလီပါရေ။ ယေကေလည်း ကိုယ်ဘင် တတ်နိုင်ရေဆိုကေ အကျွန့်ရို့ကို ကျေးဇူးပြုပါ။” 23ယေရှုစာ သူ့ကို ပြောလီရေ၊ “တတ်နိုင်ရေဆိုကေ စကား အဓိပ္ပါယ် ဇာလည်း? ကျုံသူအတွက် အားကုံးစာ ဖြစ်နိုင်ရေ။” 24ချက်ချင်း ထိုသူမာ အဖစာ အားန အော်ရို့ ပြောလီရေ၊ “အကျွန် ကျုံပါရေ၊ ယေကေလည်း အကျွန့်မာ မယုံသင်္ခါစိတ်ကို ပျောက်ကင်းစီပါ။” 25လူအများကြီး ကိုယ့်တို့ ဗြီးလာကတ်စာကို မြင်ရို့ ယေရှုစာ နတ်ဆိုးကို ဟောက်ရို့ ပြောလီရေ၊ “အဝေး နားပင်း-ပပွါးနတ်၊ ငါ နင့်ကို အာဏာချရေ၊ နင် ဒေသူခန္ဓာက ထွက်လားလီ။ နင် အရာတစ်ခါလည်း ဒေသူ ခန္ဓာမာ မဝင်ကေ့။” 26ယင်းခါ နတ်ဆိုးစာ အားန အော်ရို့ ထိုသူကို ပပြန်းတုန်တက်အောင် လုပ်ရို့ ထွက်လားခလီရေ။ ယင်းအတွက်န ထိုသူစာ အသီပိုင် မြေပြင်မာ လဲရို့ ကျန်ဟိလိုက်လီရေ။ ယင်းသျှင့်ကို မြင်ရို့ လူရို့စာ ပြောကတ်လီရေ၊ “ယင်းသူ သီလားခဗျာ။” 27ယေကေလည်း ယေရှုစာ သူ့အလက်ကို ကိုင်ရို့ ထူလီရေခါ သူစာ ထရို့ ရပ်လီရေ။ 28ယင်းနောက် ယေရှုစာ အိမ်ထဲတို့ ဝင်လီရေ။ ယင်းခါ တပည့်ရို့စာ သူ့ကို မီးကတ်လီရေ၊ “အကျွန်ရို့ ဇာဖို့ နတ်ဆိုးကို နှင်ထုတ်ဖို့ မနိုင်လီပါစာလည်း?” 29ယင်းခါ ယေရှုစာ အဖြေပီးလီရေ၊ “ထာဝရဘုရားဘားမာ ဆုမတောင်းဘိုင်းန ဒေပိုင် နတ်ဆိုးတိကို တစ်ခုပိုင်လည်း နှင်ထုတ်ဖို့ နိုင်မည် မဟုတ်။”
Copyright information for
RmzSC