Mark 9:33-40
တပည့်ရို့အထဲမာ အကြီးဆုံး အသူလည်း?
(မဿဲ ၁၈:၁-၅၊ လုကာ ၉:၄၆-၄၈)
33ယင်းနောက် ယေရှုန သူ့တပည့်ရို့စာ ကပေရနောင်မြို့သျှေတို့ ကြွလားခကတ်လီရေ။ သူစာ အိမ်ထဲတို့ ဝင်ရို့ တပည့်ရို့ကို မီးလီရေ၊ “လမ်းမာ လားရေခါ နင်ရို့ ဇာ အကြောင်းကို ယူရို့ အငြင်းအခုံ ဖြစ်လီကတ်စာလည်း?” 34ယေကေလည်း သူရို့စာ တိန်းရို့ နီကတ်လီရေ၊ အကြောင်းကား သူရို့စာ လမ်းမာ လားရေခါ အကြီးဆုံး အသူလည်းဆိုစာ အကြောင်းကို ယူရို့ ကိုယ်ရို့အချင်းချင်း အငြင်းအခုံ ဖြစ်လီကတ်တေ။ 35ယင်းခါ ယေရှုစာ ထိုင်ရို့ တပည့်တစ်ဆယ့်နှစ်ယောက်ကို ကိုယ့်အနားတို့ ခေါ်ရို့ ပြောလီရေ၊ “နင်ရို့အထဲမာ အကြီးဆုံး ဖြစ်ချင်သူစာ အားကုံးသူထက် အသျှေဆုံး ဖြစ်ရဖို့ အရာ အားကုံးသူကို ပြုဇုသူ ဖြစ်ရဖို့။” 36ယင်းနောက် သူစာ အသျှေတစ်ယောက်ကို ခေါ်ရို့ တပည့်ရို့ ရှိက ရပ်စီလီရေ။ အရာ ယင်းအသျှေကို ရွက်ရို့ ပြောလီရေ၊ 37“အသူမဆို ငါ့နာမည်န ဒေ အသျှေပိုင် တစ်ယောက်ကို လက်ခံရေဆိုကေ သူစာ ငါ့ကို လက်ခံရေ အရာ ငါ့ကို လက်ခံသူစာ သက်သက် ငါ့ကို လက်ခံစာ မဟုတ်သိ။ ယင်းထက်ပင် ငါ့ကို ရွှတ်လိုက်သူကိုလည်း လက်ခံရေ။”ငါရို့ကို မဆန့်ကျင်သူစာ ငါရို့အဖွဲ့သား
(လုကာ ၉:၄၉-၅၀)
38ယောဟန်စာ ယေရှုကို ပြောလီရေ၊ “ဆရာ၊ ကိုယ်ဘင်နာမည်န လူတစ်ယောက် နတ်ဆိုး နှင်ထုတ်စာကို အကျွန်ရို့ မြင်ခပါရေ။ သူစာ အကျွန်ရို့အဖွဲ့သား မဟုတ်ပါ။ ယင်းအတွက်န အကျွန်ရို့ သူ့ကို ဟန့်ဘိုက်ခပါရေ။” 39ယေကေလည်း ယေရှုစာ ပြောလီရေ၊ “သူ့ကို မဟန့်ကတ်ကေ့၊ အကြောင်းကား ငါ့နာမည်န အံ့ဩဖွယ် အလုပ်လုပ်သူစာ ငါ့ကို ပုတ်ခတ်ရို့ စကား မပြောနိုင်။ 40အရာ ငါရို့ကို မဆန့်ကျင်သူစာ ငါရို့အဖွဲ့သား ဖြစ်တေ။
Copyright information for
RmzSC