Mat 10:5-15 | RmzSC | STEP | ယေရှု ထိုတမန်တော် တစ်ဆယ့်နှစ်ယောက်ကို ဒေပိုင် အမှာစကား ပြောရို့ ရွှတ်လိုက်လီရေ၊ “နင်ရို့ ယုဒမဟုတ်သူရို့ နီထိုင်ကတ်စာ မြို့ရွာတိန ရှမာရိလူမျိုးရို့ နီထိုင်ကတ်စာ မြို့ရွာတိတို့ မလားလီကတ်ကေ့၊

Matthew 10:5-15

5 ယေရှု ထိုတမန်တော် တစ်ဆယ့်နှစ်ယောက်ကို ဒေပိုင် အမှာစကား ပြောရို့ ရွှတ်လိုက်လီရေ၊ “နင်ရို့ ယုဒမဟုတ်သူရို့ နီထိုင်ကတ်စာ မြို့ရွာတိန ရှမာရိလူမျိုးရို့ နီထိုင်ကတ်စာ မြို့ရွာတိတို့ မလားလီကတ်ကေ့၊ 6 ယေကေလည်း ဣသရေလလူမျိုးရို့အထဲက ပျောက်လားခစာ သိုးဆိတ်တိတို့ လားလီကတ်။ 7 နင်ရို့ လမ်းမာ လားရို့ လားရို့ ဒေပိုင် ဟောပြောလီကတ်၊ ‘ဂေါင်းခင်နိုင်ငံတော် အပါးမာ ရောက်နီဗျာ။’ 8 အရာ နင်ရို့ မကျန်းမာသူရို့ကို ကျန်းမာအောင် လုပ်လီကတ်၊ သီသူရို့ကို အရှင်လုပ်လီကတ်၊ အနူရောဂါသေရို့ကို ကောင်းအောင် လုပ်လီကတ် အရာ နတ်ဆိုးတိကို နှင်ထုတ်လီကတ်။ ငါ နင်ရို့ကို အခမဲ့ ပီးရေပိုင် နင်ရို့လည်း အခြားလူရို့ကို အခမဲ့ ပီးလီကတ်။ 9 ရွှေ၊ ငွေ အရာ ကြီးဖွေသျှာတိကိုလည်း နင်ရို့ ခါးပန်းမာ ချပ်ရို့ မယူလီကတ်ကေ့။ 10 အရာ လားရေလမ်းမာ အသုံးပြုဖို့အတွက် ရွယ်အိပ်၊ အဝတ်အပို၊ ဖနပ်အပို အရာ တောင်မိကိုလည်း မယူလီကတ်ကေ့၊ အကြောင်းကား အလုပ်သမား တစ်ယောက်စာ ကိုယ့်လုပ်ခကို ရဖို့ထိုက်တန်ရေ။

11 “နင်ရို့ ဇာ မြို့ရွာတို့ပင်မဆို ဝင်ရေခါ အားကိုးရစာ လူတစ်ယောက်ကို ရှာလီကတ် အရာ ယင်းမြို့က မဟုတ်ကေ ယင်းရွာက ထွက်ရို့ မလားသကြား သူ့အိမ်မာ နီလီကတ်။ 12 နင်ရို့ ယင်းအိမ်တို့ ဝင်ရေခါ သူရို့ အိမ်သားကို ငြိမ်းချမ်းခြင်းစကားန နှုတ်ဆက်လီကတ်။ 13 ယင်းအိမ်သားရို့စာ နင်ရို့ကို ကြိုဆိုလက်ခံရေဆိုကေ သူရို့ဘားမာ ငြိမ်းချမ်းခြင်း ကျရောက်လီစီ၊ ယေကေလည်း ယင်းအိမ်သားရို့စာ နင်ရို့ကို မကြိုဆိုလက်မခံဆိုကေ နင်ရို့ ငြိမ်းချမ်းခြင်းစာ နင်ရို့တို့ ပြန်လာစီ။ 14 အသူမဆို နင်ရို့ကို လက်မခံဆိုကေ အရာ နင်ရို့ စကားကို နားမထောင်ဆိုကေ ယင်းအိမ်က မဟုတ်ကေ ယင်းရွာက ထွက်လားကတ်တေခါ နင်ရို့ အခြီက ကျုပ်မုန့်ကို ခါချဘိုက်ခကတ်။ 15 ငါ နင်ရို့ကို အမှန် ပြောရေ၊ တရားစစ်ဆေးရေနိမာ ထိုမြို့သားရို့စာ သောဒုံမြို့န ဂေါမောရမြို့သားရို့ထက် ပိုရို့ ကြောက်လန့်ဖို့ကောင်းစာ အပြစ်ဒါဏ်ကို ခံရကတ်လိမည်။