Mat 15:1-9 | RmzSC | STEP | ယေရုရှလင်မြို့က ဖာရိရှဲအဖွဲ့သား လိုင်းကေယောက်န ကျမ်းဆရာရို့စာ ယေရှုတို့ လာရို့ မီးကတ်လီရေ၊

Matthew 15:1-9

လူ့ထုံးစဉ်န ထာဝရဘုရား၏ ပညှတ်ချက်

(မာကု ၇:၁-၁၃)

1 ယေရုရှလင်မြို့က ဖာရိရှဲအဖွဲ့သား လိုင်းကေယောက်န ကျမ်းဆရာရို့စာ ယေရှုတို့ လာရို့ မီးကတ်လီရေ၊ 2 “ခိုက်ဟောင်းက ကျမ်းဆရာရို့ ပီးခစာ ထုံးစဉ်ကို ကိုယ်ဘင်မာ တပည့်ရို့ ဇာဖို့ မကျင့်ကတ်ပါစာလည်း? သူရို့ အလက် မဆီးဘိုင်းန စားသောက်ကတ်ပါရေ။” 3 ယေရှုစာ သူရို့ကို အဖြေပီးလီရေ၊ “ကိုယ်ဘင်ရို့ ထာဝရဘုရား၏ ပညှတ်ချက်တိကို ပယ်ရို့ ခိုက်ဟောင်းက လူရို့ ပီးခစာ ထုံးစဉ်တိကို ဇာဖို့ ကျင့်နီကတ်စာလည်း? 4 အကြောင်းကား ထာဝရဘုရားစာ ပြောလီရေ၊ ‘အမိအဖကို ရိုသေလေးစားရဖို့၊’ အရာ ‘ကိုယ့်အမိအဖကို တရိုက်သူစာ အမှန် သီဒါဏ် ခံရဖို့။’ 5 – 6 ယေကေလည်း ကိုယ်ဘင်ရို့ ပြောနီကတ်တေ၊ ‘အသူမဆို အမိကို မဟုတ်ကေ အဖကို၊ “ငါ့မာ အမိန အဘာကို ကူညီဖို့စာ ဝန်အားကုံးကို ထာဝရဘုရားဘားမာ လှူဘိုက်လိုက်ပျာ” ဟို့ ပြောရေဆိုကေ ယင်းသူမာ အမိအဖကို ကူညီဖို့စာ တာဝန် မဟိဗျာ။’ ယင်းပိုင် ကိုယ်ဘင်ရို့စာ ထိုခိုက်ဟောင်းက လူရို့ ပီးခစာ ထုံးစဉ်တိကို လိုက်နာရို့ ထာဝရဘုရား၏ ပညှတ်ချက်တိကို ပယ်ဘိုက်လိုက်ကတ်ပျာ။ 7 အယောင်ဆောင်ရို့! ကိုယ်ဘင်ရို့ အကြောင်းကို ဘုရားသတင်းပို့သူ ဟေရှာယ ဒေပိုင် အမှန် စကားကို ဟောပြောခလီရေ၊
8 ‘ဒေ လူရို့ ငါ့ကို ပစနရာ ရိုသေကတ်တေ၊
ယေကေလည်း သူရို့မာ စိတ်နှလုံးစာ ငါန အဝီး ဟိရေ။
9 သူရို့စာ ဟန်ဆောင်မှုန ငါ့ကို ကိုးကွယ်နီကတ်တေ၊
အရာ သူရို့စာ လူရို့ ထုတ်လုပ်စာ ထုံးစဉ်တိကို
ထာဝရဘုရား၏ ပညှတ်ချက် ဆိုပြီးကေ သင်ပီးနီကတ်တေ။’”