Mat 20:20-28 | RmzSC | STEP | ယင်းနောက် ဇေဗေဒဲ မယားစာ ကိုယ့်သားနှစ်ယောက်ကို ယူရို့ ယေရှုတို့ လာလီရေ အရာ ယေရှုကို တစ်ခုမသာ တောင်းပန်ဖို့ အလိုန ရှိခိုးလီရေ။

Matthew 20:20-28

ညီအစ်ကိုနှစ်ယောက် တောင်းဆိုချက်

(မာကု ၁၀:၃၅-၄၅)

20 ယင်းနောက် ဇေဗေဒဲ မယားစာ ကိုယ့်သားနှစ်ယောက်ကို ယူရို့ ယေရှုတို့ လာလီရေ အရာ ယေရှုကို တစ်ခုမသာ တောင်းပန်ဖို့ အလိုန ရှိခိုးလီရေ။ 21 ယေရှုစာ သူ့ကို မီးလီရေ၊ “ကိုယ်ဘင် ဇာ လိုစာလည်း?” ယင်းခါ သူစာ ယေရှုကို တောင်းပန်လီရေ၊ “အသျှင်၊ ကိုယ်တော်၏ နိုင်ငံတော်မာ အကျွန့် သားနှစ်ယောက်ကို ကိုယ်တော် ညာဖက်က တစ်ယောက် အရာ ဘယ်ဖက်က တစ်ယောက် ထိုင်ဖို့အခွင့် ပီးပါ။” 22 ယေကေလည်း ယေရှုစာ ပြောလီရေ၊ “နင်ရို့ ဇာ တောင်းကတ်တေလည်းဆိုစာကို မသိကတ်။ ငါ ခံရဖို့စာ ဒုက္ခ-ဝေဒနာကို နင်ရို့ ခံနိုင်ကတ်ဖို့လော?” ယင်းခါ သူရို့စာ အဖြေပီးကတ်လီရေ၊ “ခံနိုင်ပါရေ။” 23 ယေရှုစာ သူရို့ကို ပြောလီရေ၊ “နင်ရို့ အမှန် ငါ ခံရဖို့စာ ဒုက္ခ-ဝေဒနာကို ခံရကတ်လိမည်၊ ယေကေလည်း ငါ့ညာဖက်န ငါ့ဘယ်ဖက်က ထိုင်ဖို့စာ အခွင့်အာဏာ ငါ့မာ မဟိ။ ငါ့အဖ အဆင်သင့် လုပ်ထားသူရို့ရာ ငါ့ညာဖက်န ငါ့ဘယ်ဖက်က ထိုင်ဖို့စာ အခွင့်အာဏာကို ရကတ်လိမည်။”

24 ထိုစကားတိကို ကြားရို့ အခြားတပည့်ဆယ်ယောက်စာ သူရို့ ညီအစ်ကိုနှစ်ယောက်ကို မန်ပါကတ်လီရေ။ 25 ယင်းခါ ယေရှုစာ တပည့်ရို့ကို ခေါ်ရို့ ပြောလီရေ၊ “ယုဒမဟုတ်သူရို့မာ အုပ်ချုပ်သူရို့စာ တန်ခိုးအာဏာန သူရို့ကို အုပ်ချုပ်ကတ်တေဆိုစာကို နင်ရို့ သိကတ်တေ။ အရာ သူရို့မာ ဂေါင်းဆောင်ရို့စာ သူရို့ကို အာဏာချကတ်တေဆိုစာကိုလည်း နင်ရို့ သိကတ်တေ။ 26 ယေကေလည်း နင်ရို့အထဲမာ ယင်းပိုင် ဖြစ်ဖို့ မသင့်။ နင်ရို့အထဲမာ အကြီးဖြစ်ချင်သူစာ နင်ရို့ကို ပြုဇုသူ ဖြစ်ရဖို့။ 27 အရာ နင်ရို့အထဲမာ အကြီးမြတ်ဆုံးဖြစ်ချင်သူစာ နင်ရို့ဘားမာ ကျွန်ခံရဖို့။ 28 မှတ်ထားကတ်၊ မနုသသားတော်စာ ပြုဇုခြင်းကို ခံရဖို့အတွက် ကြွလာစာ မဟုတ်၊ ယေကေလည်း ပြုဇုဖို့အတွက် ကြွလာစာ ဖြစ်တေ အရာ ကိုယ့်အသက်ကို စွန့်ရို့ လူအများကြီးကို ကယ်ဆယ်ဖို့အတွက် ကြွလာစာ ဖြစ်တေ။”