Matthew 24:3-14
ကမ္ဘာကုန်ဆုံးရေနိမာ ဖြစ်ပျက်လာဖို့စာ အကြောင်း
(မာကု ၁၃:၃-၁၃၊ လုကာ ၂၁:၇-၁၉)
3ယင်းနောက် ယေရှုစာ သံလွင်တောင်ထက်မာ တက်ရို့ ထိုင်လီရေ။ ယင်းခါ တပည့်ရို့ သက်သက် သူ့တို့ လာရို့ မီးကတ်လီရေ၊ “အသျှင် ကိုယ်တော် အကျွန်ရို့ကို ပြောပါ၊ ထို ဟိသမျ အားကုံးစာ ဇာခါ ဖြစ်ပျက်လာပါဖို့စာလည်း? အရာ ကိုယ်တော် ကြွလာဖို့စာအချိန်န ဒေ ကမ္ဘာကုန်ဆုံးဖို့စာအချိန် ရောက်လာဗျာဆိုစာကို အကျွန်ရို့ ဇာ နိမိတ်လက္ခဏာကို မြင်ရို့ သိရပါဖို့စာလည်း?” 4ယေရှုစာ သူရို့ကို အဖြေပီးလီရေ၊ “နင်ရို့ကို တစ်ယောက်လည်း လိမ်ဖို့ မရလတ်အောင် နင်ရို့ သတိထားကတ်။ 5ငါ နင်ရို့ကို ဒေ စကားတိကို ပြောစာအကြောင်းကား လူအများကြီး ငါ့နာမည်န လာရို့၊ ‘ငါ ခရစ်တော် ဖြစ်တေ’ ဟို့ ပြောပြီးကေ လူအများကြီးကို လိမ်ကတ်လိမည်။ 6နင်ရို့စာ စစ်တိုက်စာအသံန စစ်တိုက်စာသတင်းကို ကြားရကတ်လိမည်။ ယေကေလည်း သတိထားကတ်! နင်ရို့ မကြောက်လီကတ်ကေ့၊ အကြောင်းကား အမှန် ထို ဟိသမျ အားကုံး ဖြစ်ပျက်လာဖို့၊ ယေကေလည်း ကမ္ဘာကုန်ဆုံးဖို့စာအချိန် ရောက်ဖို့ မဟုတ်သိ။ 7လူမျိုးတစ်မျိုးန တစ်မျိုး အရာ တစ်ပြည်န တစ်ပြည် စစ်တိုက်ကတ်လိမည်။ အရပ်အရပ်မာ ငတ်မွတ်ခေါင်းပါးခြင်း ကျရောက်လိမည် အရာ ငယင်ကြီးလုတ်လိမည်။ 8ယေကေလည်း ထိုသားမွီးဖွားစာ ဝေဒနာတိစာ စရေသိ။ 9ယင်းအချိန်ခါ လူရို့စာ နင်ရို့ကို ညှဉ်းဆဲဖို့အတွက်န အသီသတ်ဖို့အတွက် ဖမ်းပီးကတ်လိမည်။ အရာ နင်ရို့ ငါ့တပည့် ဖြစ်ကတ်တေအတွက်န ဟိသမျ လူမျိုးရို့စာ နင်ရို့ကို မုန်းကတ်လိမည်။ 10ယင်းအချိန်ခါ လူအများကြီး ကိုယ်ရို့မာ ကျုံခြင်းတရားကို စွန့်ကတ်လိမည်၊ တစ်ယောက်ကို တစ်ယောက် မုန်းကတ်လိမည် အရာ သစ္စာဖေါက်ကတ်လိမည်။ 11အယောင်ဆောင် ဘုရားသတင်းပို့သူ အများကြီး ရောက်လာကတ်လိမည် အရာ သူရို့စာ လူအများကြီးကို လိမ်ကတ်လိမည်။ 12လူဆိုးလူယုတ် များလာရေအတွက်န လူရို့မာ ချစ်ခြင်းမေတ္တာ ကင်းကတ်လိမည်။ 13ယေကေလည်း အဆုံးတိုင်အောင် တတိုင်းမမြိုင်းနီသူစာ ကယ်တင်ခြင်းကို ရလိမည်။ 14အရာ ဂေါင်းခင်နိုင်ငံတော်၏ အကြောင်း သတင်းကောင်းစာ ကမ္ဘာတစ်လုံးမာ ပြန့်ကျယ်လိမည် အရာ ဟိသမျ လူမျိုးရို့စာ ထိုသတင်းကောင်းကို ကြားရကတ်လိမည်။ ယင်းပြီးခါရာ ကမ္ဘာကုန်ဆုံးဖို့စာအချိန် ရောက်လာလိမည်။
Copyright information for
RmzSC