Mat 26:36-46 | RmzSC | STEP | ယင်းနောက် ယေရှုစာ တပည့်ရို့နအတူ ဂေသရှေမန်ဆိုစာ ဥယျာဉ်တစ်ခုတို့ ကြွလီရေ။ အရာ သူစာ တပည့်ရို့ကို ပြောလီရေ၊ “ငါ ထိုနေရာတို့ လားရို့ ဆုတောင်းနီသရိကို နင်ရို့ ဒေမာ ထိုင်ရို့ စောင့်နီကတ်။”

Matthew 26:36-46

ဂေသရှေမန် ဥယျာဉ်မာ ဆုတောင်းခြင်း

(မာကု ၁၄:၃၂-၄၂၊ လုကာ ၂၂:၃၉-၄၆)

36 ယင်းနောက် ယေရှုစာ တပည့်ရို့နအတူ ဂေသရှေမန်ဆိုစာ ဥယျာဉ်တစ်ခုတို့ ကြွလီရေ။ အရာ သူစာ တပည့်ရို့ကို ပြောလီရေ၊ “ငါ ထိုနေရာတို့ လားရို့ ဆုတောင်းနီသရိကို နင်ရို့ ဒေမာ ထိုင်ရို့ စောင့်နီကတ်။” 37 ယင်းနောက် သူစာ ပေတရုန ဇေဗေဒဲသားနှစ်ယောက်ကို ကိုယ်နအတူ ခေါ်ယူလားခလီရေ။ ယင်းခါ သူစာ ကောင်းကောင်း စိတ်ဆိုးရို့ ဝမ်းနည်းလီရေ။ 38 အရာ ယေရှုစာ သူရို့ကို ပြောလီရေ၊ “ငါ့မာ စိတ်ဒုက္ခ ရောက်ရို့ ငါ သီဖို့စာပိုင် တွိနီဗျာ။ နင်ရို့ ငါနအတူ ဒေ နေရာမာ မအိပ်ဘိုင်းန စောင့်နီကတ်။” 39 ယင်းခါ သူစာ တစ်ဖဲ့အဝီးတို့ ကြွပြီးကေ မြေပြင်မာ အပြားဝပ်ရို့ ဆုတောင်းလီရေ၊ “အိုး အကျွန့် အဖ၊ ဖြစ်နိုင်ရေဆိုကေ အကျွန် ခံရဖို့စာ ဒုက္ခ-ဝေဒနာကို ပျောက်ကင်းစီပါ။ ယေကေလည်း အကျွန့် အလိုအတိုင်း မဟုတ်ပါ၊ ကိုယ်တော်၏ အလိုတော်အတိုင်း ဖြစ်ပါစီ။”

40 ယင်းနောက် သူစာ တပည့်ရို့တို့ ပြန်လာရေခါ သူရို့ အိပ်မောကျရို့ ဟိကတ်စာကို မြင်လီရေ။ အရာ သူစာ ပေတရုကို ပြောလီရေ၊ “အား ဇာလည်းသျှင့်! နင်ရို့ ငါနအတူ တစ်နာရီပင် အနိုးမနီနိုင်ကတ်ကား! 41 အပြစ်သွေးဆောင်ခြင်းမာ မကျရအောင် မအိပ်ဘိုင်းန ဆုတောင်းနီကတ်။ စိတ်က ချင်ကေလည်း ကိုယ်ခန္ဓာစာ အားနည်းရေ။” 42 သူစာ ပြန်ကြွရို့ ဒုတိယခေါက် ဆုတောင်းလီရေ၊ “အိုး အကျွန့် အဖ၊ ဒေ ဒုက္ခ-ဝေဒနာကို အကျွန် မခံဘိုင်းန မရွတ်ရာဆိုကေ ကိုယ်တော်၏ အလိုတော် ပြည့်စုံပါစီ။” 43 ယေရှု ပြန်လာရေခါ သူရို့ အရာတစ်ပြန် အိပ်မောကျရို့ ဟိကတ်စာကို မြင်လီရေ၊ အကြောင်းကား သူရို့စာ ကောင်းကောင်း အိပ်ချင်ရို့ ဟိကတ်လီရေ။

44 သူစာ အရာတစ်ပြန် တပည့်ရို့ကို ထားရို့ ပြန်ကြွပြီးကေ အယင်ပိုင်တထန် တတိယခေါက် ဆုတောင်းလီရေ။ 45 ယင်းနောက် သူစာ တပည့်ရို့တို့ ပြန်လာရို့ ပြောလီရေ၊ “နင်ရို့ ဒေဂုလည်း အိပ်ရို့ နားနီကတ်သိယလော? ကြည့်၊ မနုသသားတော်ကို လူဆိုးရို့အလက်မာ ဖမ်းပီးဖို့စာအချိန် ရောက်နီဗျာ။ 46 ထ၊ ငါရို့ လားကတ်မည်။ ကြည့်! ငါ့ကို ရန်သူရို့အလက်မာ ဖမ်းပီးဖို့သူ ရောက်နီဗျာ။”