Matthew 27:32-44
ယေရှုကို ကားတိုင်မာ တင်ခြင်း
(မာကု ၁၅:၂၁-၃၂၊ လုကာ ၂၃:၂၆-၄၃၊ ယောဟန် ၁၉:၁၇-၂၇)
32စစ်သားရို့စာ အုပ်ချုပ်သူကြီးအိမ်က ထွက်လားကတ်တေခါ လမ်းတစ်ပိုင်းမာ ရှိမုန်နာမည်န ကုရေနေမြို့သားတစ်ယောက်ကို တွိကတ်လီရေ။ စစ်သားရို့စာ အားဒမ သူ့ကို ယေရှု၏ ကားတိုင်ကို ရွက်ယူလားဖို့ ခိုင်းကတ်လီရေ။ 33ယင်းနောက် သူရို့စာ “ဂေါလဂေါသ” ဟို့ ခေါ်စာ နေရာတစ်ခုတို့ ရောက်ကတ်လီရေ။ (ဂေါလဂေါသ အဓိပ္ပါယ်ကား အဂေါင်းခွန်နေရာ ဟို့ ခေါ်ရေ)။ 34သူရို့စာ ယင်းနေရာမာ ရောက်ကတ်တေခါ ဆီးခါးရည်န ရောထားစာ ပုံးရည်ကို ယေရှုကို သောက်စီကတ်လီရေ၊ ယေကေလည်း သူစာ တစ်ဖဲ့သျှေ မြည်းပြီးကေ အရာ သောက်ဖို့ မလိုလီဗျာ။ 35စစ်သားရို့စာ ယေရှုကို ကားတိုင်မာ တင်ရို့ သံမှိုခတ်ပြီးရေခါ သူ့အဝတ်အစားတိကို မဲဖေါက်ရို့ ကိုယ်ရို့အထဲမာ ဝီကတ်လီရေ။ 36ယင်းနောက် သူရို့စာ ယင်းနေရာမာ ထိုင်ရို့ ယေရှုကို စောင့်နီကတ်လီရေ။ 37အရာ သူရို့စာ ကားတိုင်မာ ယေရှုအဂေါင်းထက်က အပြစ်ဖေါ်ပြချက် ကမ္ဗည်းစာတစ်ခု ကပ်လီရေ။ ယင်းကမ္ဗည်းစာမာ၊ “ဒေသူ ယုဒလူမျိုးရို့မာ မင်း” ဟို့ ရွီးရို့ ဟိလီရေ။ 38သူရို့စာ ယင်းနိခါ ဒါးမြနှစ်ယောက်ကိုလည်း ယေရှုနအတူ ကားတိုင်မာ တင်ကတ်လီရေ။ သူရို့နှစ်ယောက်မာ တစ်ယောက်ကို ယေရှု ညာဖက်က အရာ အခြားတစ်ယောက်ကို ယေရှု ဘယ်ဖက်က တင်ကတ်လီရေ။ 39ထိုလမ်းက လားသူရို့ အားကုံးသူ လိုင်ညိုက်ပြီးကေ ယေရှုကို သရော်ရို့ ပြောကတ်လီရေ၊ 40“နင် ဝိပဿနာကျောင်းကို ဖြိုရို့ သုံးရက်အထဲတွင်းမာ ပြန်ရို့ ဆောက်ဖို့နိုင်ရေ ဆိုကား! ယင်းပိုင်ဆိုကေ နင် ဒေဂု ကိုယ့်ကိုကိုယ် ကယ်ဆယ်။ နင် အမှန် ထာဝရဘုရား၏ သားတော် ဖြစ်တေဆိုကေ ကားတိုင်က ဆင်းလာလတ်။” 41ယင်းပိုင်တထန် ယဇ်ပုရောဟိတ်အကြီးရို့၊ ကျမ်းဆရာရို့ အရာ ဂေါင်းဆောင်ဝါကြီးရို့လည်း ယေရှုကို သရော်ရို့ ပြောကတ်လီရေ၊ 42“ယင်းသူ အခြားလူရို့ကို ကယ်ဆယ်နိုင်ကေလည်း ကိုယ့်ကို ကယ်ဆယ်ဖို့ မနိုင်။ ယင်းသူ ဣသရေလလူမျိုးရို့မာ မင်း မဟုတ်လော? ဒေဂု ယင်းသူ ကားတိုင်က ဆင်းလာရေဆိုကေ ငါရို့ ယင်းသူကို ကျုံကတ်ဖို့။ 43ယင်းသူ ထာဝရဘုရားကို အားကိုးရေ။ ဒေဂု ထာဝရဘုရားစာ ယင်းသူကို ကယ်ဆယ်ချင်ရေဆိုကေ ကယ်ဆယ်ပတ်စီ၊ အကြောင်းကား သူကား ကိုယ့်ကိုကိုယ် ထာဝရဘုရား၏ သားတော် ဟို့ ခံရေ။” 44ယေရှုနအတူ ကားတိုင်မာ အတင်ခံလီကတ်စာ ဒါးမြနှစ်ယောက်လည်းသောက် ယင်းပိုင်တထန် ယေရှုကို သရော်ရို့ ပြောကတ်လီရေ။
Copyright information for
RmzSC