Matthew 5

တောင်ထက်မာ ယေရှု သွန်သင်ပီးခြင်း

(မဿဲ ၅:၁-၇:၂၇)

မင်္ဂလာဟိသူရို့ အကြောင်း

(လုကာ ၆:၂၀-၂၃)

1ယေရှုစာ လူအများကြီးကို မြင်ရေခါ တောင်တို့ တက်ရို့ ထိုင်လီရေ။ အရာ တပည့်ရို့စာ သူ့တို့ လာကတ်လီရေ။ 2ယင်းခါ သူစာ တပည့်ရို့ကို ဒေပိုင် သွန်သင်ပီးလီရေ၊
3“စိတ်နှလုံး ဆင်းရဲသူရို့စာ မင်္ဂလာ ဟိကတ်တေ၊
အကြောင်းကား ဂေါင်းခင်နိုင်ငံတော်စာ သူရို့ နိုင်ငံ ဖြစ်တေ။
4ဝမ်းနည်းသူရို့စာ မင်္ဂလာ ဟိကတ်တေ၊
အကြောင်းကား သူရို့စာ စိတ်အီးချမ်းသာ ရကတ်လိမည်။
5နုညံ့ခြင်းစိတ် ဟိသူရို့စာ မင်္ဂလာ ဟိကတ်တေ၊
အကြောင်းကား သူရို့စာ ထာဝရဘုရား ဂတိခံထားစာ ပြည်ကို ရကတ်လိမည်။
6ကောင်းမြတ်စာ အလုပ်ကို လုပ်ဖို့အတွက် တောင်းတသူရို့စာ မင်္ဂလာ ဟိကတ်တေ၊
အကြောင်းကား သူရို့ တောင်းတခြင်း ပြည့်စုံလိမည်။
7လူကို သနားကြင်နာသူရို့စာ မင်္ဂလာ ဟိကတ်တေ၊
အကြောင်းကား သူရို့စာ သနားကြင်နာခြင်းကို ခံရကတ်လိမည်။
8စိတ်နှလုံး စင်ကြယ်သူရို့စာ မင်္ဂလာ ဟိကတ်တေ၊
အကြောင်းကား သူရို့စာ ထာဝရဘုရားကို မြင်ရကတ်လိမည်။
9လူရို့အထဲမာ ရန်ငြိမ်းအောင် လုပ်ဖို့အတွက် ကြိုးစားသူရို့စာ မင်္ဂလာ ဟိကတ်တေ၊
အကြောင်းကား သူရို့စာ ထာဝရဘုရား၏ သားသမီး ဟို့ အခေါ် ခံရကတ်လိမည်။
10ထာဝရဘုရား၏ အလိုတော်အတိုင်း လုပ်ကိုင်ရေအတွက်န ညှဉ်းဆဲခြင်းကို ခံရသူရို့စာ မင်္ဂလာ ဟိကတ်တေ၊
အကြောင်းကား ဂေါင်းခင်နိုင်ငံတော်စာ သူရို့ နိုင်ငံ ဖြစ်တေ။

11“နင်ရို့ ငါ့အကြောင်းန လူရို့ဘားမာ အသရေရှုတ်ချခြင်း၊ ညှဉ်းဆဲခြင်း အရာ မဟုတ်မမှန်စာ စစ်စွဲခြင်းကို ခံရရေခါ မင်္ဂလာ ဟိကတ်တေ။ 12နင်ရို့ ပျော်ကတ် အရာ ဝမ်းသာကတ်၊ အကြောင်းကား နင်ရို့အတွက် ဂေါင်းခင်ဘုံမာ မဟာဆုမြတ် ဟိရေ။ နင်ရို့ထက် အယင်က ရောက်လာလီကတ်စာ ဘုရားသတင်းပို့သူရို့ကိုလည်း လူရို့ ယင်းပိုင် ညှဉ်းဆဲလီကတ်တေ။

ဆားန အလင်းပိုင် ဖြစ်ခြင်း

(မာကု ၄:၂၁-၂၃၊ ၉:၅၀၊ လုကာ ၈:၁၆-၁၈၊ ၁၁:၃၃-၃၆၊ ၁၄:၃၄-၃၅)

13“နင်ရို့စာ ဒေ လောက၏ ဆားနတူကတ်တေ၊ ယေကေလည်း ဆားမာ အငန်ဓါတ် ပျက်လားခရေဆိုကေ ယင်းအငန်ဓါတ်ကို အရာတစ်ပြန် ဇာပိုင်ပျင်ရို့ ရနိုင်ဖို့သိလည်း? ထိုဆားစာ တစ်ခုပိုင်လည်း အသုံးမဝင်ဗျာ။ အရာ ထိုဆားစာ သက်သက် ပြင်တို့ ဝဲဘိုက်ခြင်းန လူရို့ အခြီန နင်းခြင်းကိုရာ ခံဖို့ထိုက်တန်ရေ။

14“နင်ရို့စာ ဒေ လောက၏ အလင်းနတူကတ်တေ။ တောင်ထက်မာ တည်စာမြို့ကို တစ်ခါလည်း ကွယ်ရို့ မထားနိုင်။ 15ဆီမီးခွက်ကို ထွန်းရို့ တစ်ယောက်လည်း တောင်းချုပ်ရို့ မထား။ ယင်းထက်ပင် အိမ်ထဲတို့ ဝင်လာသူရို့ အလင်းကို ရကတ်ပတ်စီအတွက် ဆီမီးခွက်ကို ခုံထက်မာရာ တင်ထားရေ။ 16ယင်းပိုင်တထန် နင်ရို့စာ ကိုယ်ရို့မာ အလင်းကို လူရို့ ရှိက ထွန်းတောက်စီကတ်။ ယင်းပိုင်ဆိုကေ လူရို့စာ နင်ရို့မာ ကောင်းမြတ်စာ အလုပ်ကို မြင်ရို့ နင်ရို့မာ ဂေါင်းခင်ဘုံသျှင် အဖ၏ ဘုန်းတန်ခိုးကို ချီမွမ်းကတ်လိမည်။

မောရှေ၏ ပညှတ်တရား အကြောင်း

17“မောရှေ၏ ပညှတ်တရားန ဘုရားသတင်းပို့သူရို့ ရွီးထားခစာ ကျမ်းတိကို ငါ ပယ်ဘိုက်ဖို့အတွက် လာစာ ဟို့ မမှတ်ကတ်ကေ့။ ယင်းသျှင့်တိကို ပယ်ဘိုက်ဖို့အတွက် ငါ လာစာ မဟုတ်၊ ယေကေလည်း ပြည့်စုံအောင် လုပ်ဖို့အတွက် ငါ လာစာ ဖြစ်တေ။ 18ငါ နင်ရို့ကို အမှန် ပြောရေ၊ ဂေါင်းခင်န ကမ္ဘာ ဟိသရိကာလပတ်လုံး ဒေ ပညှတ်တရားအထဲက အက္ခရာသျှေတစ်လုံးလည်း ပျောက်ရမည် မဟုတ်။ ယင်းထက်ပင် ဟိသမျ ပညှတ်တရား ပြည့်စုံရဖို့။ 19ယင်းအတွက်န ဒေ ပညှတ်တရားအထဲက အသျှေဆုံး ပညှတ်ချက်တစ်ခုကို အသူမဆို ကိုယ် မလိုက်နာဘိုင်းန အခြားတစ်ယောက်ကို မလိုက်နာဖို့အတွက် သွန်သင်ပီးရေဆိုကေ ယင်းသူစာ ဂေါင်းခင်နိုင်ငံတော်မာ အားကုံးသူထက် အသျှေဆုံး ဖြစ်လိမည်။ ယေကေလည်း အသူမဆို ဒေ ပညှတ်တရားကို ကိုယ် လိုက်နာရို့ အခြားတစ်ယောက်ကိုလည်း လိုက်နာဖို့အတွက် သွန်သင်ပီးရေဆိုကေ ယင်းသူစာ ဂေါင်းခင်နိုင်ငံတော်မာ အကြီးဆုံးတစ်ယောက် ဖြစ်လိမည်။ 20အကြောင်းကား ငါ နင်ရို့ကို အမှန် ပြောရေ၊ ကျမ်းဆရာရို့န ဖာရိရှဲအဖွဲ့သားရို့ထက် နင်ရို့ အများ ရိုးသားကတ်ရဖို့။ ယင်းပိုင် မဟုတ်ဆိုကေ နင်ရို့စာ ဂေါင်းခင်နိုင်ငံတော်တို့ ဝင်ရကတ်လိမည် မဟုတ်။

အငြိုဒေါသ အကြောင်း

21“‘လူအသက်ကို မသတ်ရ၊ လူအသက်ကို သတ်သူစာ တရားသူကြီး ရှိက တရားစစ်ဆေးခြင်းကို ခံရရေ’ ဟို့ အယင်ကခါ ငါရို့ အဖိုးအဖီးအစိုင်လာရို့ကို ပီးလီစာ ပညှတ်ချက်ကို နင်ရို့ ကြားဖူးကတ်ပျာ။ 22ယေကေလည်း ငါ နင်ရို့ကို အမှန် ပြောရေ၊ အသူမဆို ကိုယ့်ညီအစ်ကိုကို အငြိုဒေါသထားရေဆိုကေ ယင်းသူစာ တရားသူကြီး ရှိက တရားစစ်ဆေးခြင်းကို ခံရလိမည်။ အရာ အသူမဆို ကိုယ့် ညီအစ်ကိုကို ‘နင် ပညာတုံး’ ဟို့ ပြောရေဆိုကေ ယင်းသူစာ မဟာတိုင်ဘင်အဖွဲ့သားရို့ ရှိက တရားစစ်ဆေးခြင်းကို ခံရလိမည်။ အရာ အသူမဆို ကိုယ့်ညီအစ်ကိုကို ‘နင် အရူး’ ဟို့ ပြောရေဆိုကေ ယင်းသူစာ ငရဲမီးအိုင်မာ ဘိုက်ချခြင်းကို ခံရလိမည်။

23– 24“ယင်းအတွက်န နင့် ပူဇော်သက္ကာတိကို ယဇ်ပလ္လင်မာ တင်ရို့ ထာဝရဘုရားဘားမာ ပူဇော်ရေခါ နင့်မာ ညီအစ်ကိုစာ နင့်ကို ဆန့်ကျင်ရို့ စကားပြောစရာ ဟိရေ ဟို့ တွက်ရရေဆိုကေ ထိုပူဇော်သက္ကာတိကို ယဇ်ပလ္လင် ရှိက ထားဘိုက်ခရို့ လားလီ။ ပထမဆုံး နင့် ညီအစ်ကိုန ဖြေရှင်းခီအုန့်သိ၊ ယင်းပြီးခါရာ လာရို့ ထိုပူဇော်သက္ကာတိကို ပူဇော်ခလိုက်။ 25အသူမဆို နင့်ကို ဆန့်ကျင်ရို့ တရားသူကြီးဘားမာ တရားစွဲချင်ရေဆိုကေ ယင်းသူ တရားယုံးတို့ မလားခင်အယင်က နင် အယင် လားရို့ သူန ဖြေရှင်းဘိုက်ခီ။ ယင်းပိုင် မဟုတ်ဆိုကေ သူစာ နင့်ကို တရားသူကြီးဘားမာ တင်အပ်လိမည်။ တရားသူကြီး တစ်ပြန် နင့်ကို ရဲသားဘားမာ တင်အပ်လိမည်။ အရာ ရဲသားစာ နင့်ကို ထောင်မာ ထည့်လိမည်။ 26ငါ နင့်ကို အမှန် ပြောရေ၊ အယော်တန်းကား မပီးသကြား နင် တစ်ခါလည်း ထောင်က ရွတ်လိမည် မဟုတ်။

ကာမဂုဏ်အပြစ် အကြောင်း

(မဿဲ ၁၉:၉၊ မာကု ၁၀:၂-၁၂၊ လုကာ ၁၆:၁၈)

27“‘ကာမဂုဏ်ကို မလိုက်စားရ’ ဟို့ အယင်ကခါ ပီးလီစာ ပညှတ်ချက်ကို နင်ရို့ ကြားဖူးကတ်ပျာ။ 28ယေကေလည်း ငါ နင်ရို့ကို ပြောရေ၊ အသူမဆို မိန်းမတစ်ယောက်ကို ကိလေသာမျက်စိန ကြည့်ရေဆိုကေ သူစာ စိတ်မာ စိတ်မာ ထိုမိန်းမန ကာမဂုဏ် ပြစ်မှားရေ။ 29နင့်မာ ညာဖက်မျက်စိစာ နင့်ကို အပြစ်လမ်းတို့ ဆောင်ယူလားရေဆိုကေ ယင်းမျက်စိကို ထွတ်ရို့ ဝဲဘိုက်လိုက်။ နင့် ခန္ဓာတစ်ကိုယ်လုံး ငရဲမီးအိုင်မာ ကျရဖို့စာထက် မျက်စိတစ်လုံး ပျက်ရဖို့စာပင် နင့်အတွက် ပိုရို့ ကောင်းဖို့သိ။ 30အရာ နင့်မာ ညာဖက်အလက်စာ နင့်ကို အပြစ်လမ်းတို့ ဆောင်ယူလားရေဆိုကေ ယင်းအလက်ကို ပိုင်းရို့ ဝဲဘိုက်လိုက်။ နင့် ခန္ဓာတစ်ကိုယ်လုံး ငရဲမီးအိုင်မာ ကျရဖို့စာထက် အလက်တစ်ဖက် ပျက်ရဖို့စာပင် နင့်အတွက် ပိုရို့ ကောင်းဖို့သိ။

31“‘အသူမဆို ကိုယ့်မယားကို ခွါရေဆိုကေ သူစာ သူ့ကို ခွါစာ ပီးရဖို့’ ဟို့ ပီးလီစာ ပညှတ်ချက်ကို နင်ရို့ ကြားဖူးကတ်ပျာ။ 32ယေကေလည်း ငါ နင်ရို့ကို ပြောရေ၊ အသူမဆို ကာမဂုဏ် ပြစ်မှားခြင်းကို ပယ်ရို့ အခြားအကြောင်းန ကိုယ့်မယားကို ခွါရေဆိုကေ သူစာ ကိုယ့်မယားကို ကာမဂုဏ် ပြစ်မှားခြင်းမာ ချရေ။ အရာ အသူမဆို ခွါဘိုက်လိုက်စာ မိန်းမကို နစပ်တေဆိုကေ သူလည်းသောက် ထိုမိန်းမန ကာမဂုဏ် ပြစ်မှားရေ။

အကျိန်သစ္စာ ကိုင်ခြင်း

33“‘အကျိန်သစ္စာကို မဖျက်ရ၊ ယင်းထက်ပင် ထာဝရဘုရားဘားမာ ခံထားစာ ဂတိသစ္စာ အားကုံးကို နင် ပြည့်စုံအောင် လုပ်ရဖို့’ ဟို့ ပီးလီစာ ပညှတ်ချက်ကို နင်ရို့ ကြားဖူးကတ်ပျာ။ 34ယေကေလည်း ငါ နင်ရို့ကို ပြောရေ၊ နင်ရို့ အသျှင်းလည်း အကျိန်သစ္စာ မကိုင်ရ။ ဂေါင်းခင်ဘုံကို တိုင်တန်းရို့ အကျိန်သစ္စာ မကိုင်ရ၊ အကြောင်းကား ဂေါင်းခင်ဘုံစာ ထာဝရဘုရား၏ ပလ္လင်တော် ဖြစ်တေ။ 35ကမ္ဘာကို တိုင်တန်းရို့ အကျိန်သစ္စာ မကိုင်ရ၊ အကြောင်းကား ကမ္ဘာစာ ထာဝရဘုရား၏ အခြီချဖို့စာနေရာ ဖြစ်တေ။ အရာ ယေရုရှလင်မြို့ကို တိုင်တန်းရို့ အကျိန်သစ္စာ မကိုင်ရ၊ အကြောင်းကား ထိုမြို့စာ အသျှင်မင်းကြီးမြို့ ဖြစ်တေ။ 36အရာ နင်ရို့ အဂေါင်းမာ အလက်တင်ရို့ အကျိန်သစ္စာ မကိုင်ရ၊ အကြောင်းကား နင်ရို့စာ ကိုယ်ရို့မာ ဆံပင်တစ်ပင်ကိုလည်း အမဲ-အဖြူ လုပ်ဖို့ မနိုင်ကတ်။ 37ယင်းအတွက်န နင်ရို့စာ ‘ဟုတ်တေဆိုကေ ဟုတ်တေ အရာ မဟုတ်ဆိုကေ မဟုတ်’ ဟို့ ပပွင့်လလင်း ပြောကတ်။ ယင်းထက်ပိုစာ စကားတိစာ မာရ်နတ်က လာရေ။

လက်စားဆပ်ဖို့စာ အကြောင်း

(လုကာ ၆:၂၉-၃၀)

38“‘မျက်စိတက်စား မျက်စိ အရာ သွားတက်စား သွား’ ဟို့ ပီးလီစာ ပညှတ်ချက်ကို နင်ရို့ ကြားဖူးကတ်ပျာ။ 39ယေကေလည်း ငါ နင်ရို့ကို ပြောရေ၊ အသူမဆို နင်ရို့ကို ဆန့်ကျင်ရို့ မကောင်းလုပ်တေဆိုကေ နင်ရို့ ယင်းသူကို လက်စားမဆပ်ကတ်ကေ့။ ယင်းထက်ပင် အသူမဆို နင့် ညာဖက်ပါးကို သတ်တေဆိုကေ ဘယ်ဖက်ပါးကိုလည်း သတ်ပတ်စီ လှည့်ပီးလိုက်။ 40အသူမဆို နင့် အင်္ကျီကို ယူဖို့အတွက် တရားစွဲချင်ရေဆိုကေ ယင်းသူကို နင့် ကိုယ်ရုံကိုလည်း ချွတ်ပီးလိုက်။ 41အသူမဆို နင့်ကို အားဒမ သူ့ဝန်ထုပ်ကို ရွက်ရို့ တစ်မိုင်ခရီးတိုင်အောင် လားဖို့ ခိုင်းရေဆိုကေ နင် ယင်းသူနအတူ နှစ်မိုင်ခရီးတိုင်အောင် လားလီ။ 42အရာ အသူမဆို နင့်က တစ်ခုမသာ တောင်းရေဆိုကေ နင် သူ့ကို ထုတ်ပီးလိုက်၊ အရာ အသူမဆို နင့်က တစ်ခုမသာ ချီးငှားရေဆိုကေ နင် ယင်းသူကို မငြင်းဘိုင်းန ထုတ်ပီးလိုက်။

ရန်သူကို ချစ်ရဖို့စာ အကြောင်း

(လုကာ ၆:၂၇-၂၈၊ ၆:၃၂-၃၆)

43“‘နင့် အိမ်နားပါးသားကို ချစ်ရဖို့ အရာ နင့် ရန်သူကို မုန်းရဖို့’ ဟို့ ပီးလီစာ ပညှတ်ချက်ကိုလည်း နင်ရို့ ကြားဖူးကတ်ပျာ။ 44ယေကေလည်း ငါ နင်ရို့ကို ပြောရေ၊ နင်ရို့စာ ကိုယ်ရို့မာ ရန်သူရို့ကိုလည်း ချစ်ကတ် အရာ နင်ရို့ကို ညှဉ်းဆဲသူရို့အတွက် ထာဝရဘုရားဘားမာ ဆုတောင်းပီးကတ်။ 45ယင်းပိုင်ဆိုကေ နင်ရို့စာ နင်ရို့မာ ဂေါင်းခင်ဘုံသျှင် အဖ၏ သားသမီး ဖြစ်ကတ်လိမည်။ ထာဝရဘုရားစာ လူဆိုး-လူကောင်း အားကုံးသူကို နီအလင်းရောင် ပီးရေ အရာ ရိုးသားသူ-မရိုးသားသူ အားကုံးသူကို မိုးချပီးရေ။ 46နင်ရို့စာ သက်သက် ကိုယ်ရို့ကို ချစ်သူရို့ကိုရာ ချစ်ကတ်တေဆိုကေ နင်ရို့ ဇာ ဆုကို ရကတ်ဖို့စာလည်း? ဖန်ဒါကောက်သမားရို့လည်း ယင်းပိုင် လုပ်နီကတ်တေ။ 47အရာ နင်ရို့စာ သက်သက် ကိုယ့်လူရို့ကိုရာ နှုတ်ဆက်ကတ်တေဆိုကေ အခြားလူရို့ထက် ဇာပိုင် ခွဲခြားမှု ဟိရေလည်း? ထာဝရဘုရားကို မသိသူရို့လည်း ယင်းပိုင် လုပ်နီကတ်တေ။ 48ယင်းအတွက်န ငါ ပြောမည်၊ နင်ရို့မာ ဂေါင်းခင်ဘုံသျှင် အဖ အပြည့်အစုံ စင်ကြယ်စာပိုင် နင်ရို့လည်း အပြည့်အစုံ စင်ကြယ်ကတ်။

Matthew 6

အလှူဒါန ပီးဖို့စာ အကြောင်း

1“သတိထားကတ်! လူရို့က ချီမွမ်းခြင်းကို ရဖို့အတွက် နင်ရို့ ကောင်းမှုကုသိုလ် မလုပ်ကတ်ကေ့။ နင်ရို့ ယင်းပိုင် လုပ်တေဆိုကေ နင်ရို့မာ ဂေါင်းခင်ဘုံသျှင် အဖက ဆုကို ရကတ်လိမည် မဟုတ်။

2“ယင်းအတွက်န နင် ဆင်းရဲသားရို့ကို အလှူဒါန ပီးရေခါ ကိုယ်ရို့ကို သူတော်ကောင်း ဖြစ်တေ ဟို့ လူရို့ဘားမာ ပြဖို့အတွက် လှူသူရို့ပိုင် နင် မလုပ်လီကေ့။ သူရို့စာ အယောင်ဆောင် ဖြစ်ကတ်တေ။ သူရို့စာ လူရို့က ချီမွမ်းခြင်းကို ရဖို့အတွက် တရားဇရပ်တိန လမ်းတိမာ လည်ရို့ တီးမှုတ်ကရိယာကို တီးရို့ အလှူပီးကတ်တေ။ ငါ နင်ရို့ကို အမှန် ပြောရေ၊ သူရို့စာ ကိုယ်ရို့ ရဖို့စာဆုကို ရလားခကတ်ပျာ။ 3ယေကေလည်း နင် ဆင်းရဲသားရို့ကို အလှူဒါန ပီးရေခါ နင့် ညာဖက်အလက် ဇာ လုပ်တေလည်းဆိုစာကို နင့် ဘယ်ဖက်အလက်ကို မသိစီကေ့။ 4ဒေပိုင် နင့်မာ အလှူဒါနစာ ဖုံးရွှက်ခြင်း ဟိရဖို့။ ယင်းပိုင်ဆိုကေ နင် ဖုံးရွှက်ရို့ လုပ်စာ အားကုံးကို နင့် အဖ မြင်ရေအတွက်န နင့်ကို ဆုပီးလိမည်။

ဆုတောင်းဖို့စာ အကြောင်း

5“နင်ရို့ ဆုတောင်းရေခါ သူတော်ကောင်း အယောင်ဆောင်သူရို့ပိုင် မတောင်းကတ်ကေ့! အကြောင်းကား သူရို့စာ လူရို့ကို ပြဖို့အတွက် တရားဇရပ်တိန လမ်းခွဆုံတိမာ ရပ်ရို့ ဆုတောင်းဖို့စာကို နှစ်သက်ကတ်တေ။ ငါ နင်ရို့ကို အမှန် ပြောရေ၊ သူရို့စာ ကိုယ်ရို့ ရဖို့စာဆုကို ရလားခကတ်ပျာ။ 6ယေကေလည်း နင် ဆုတောင်းရေခါ အိမ်ထဲတို့ ဝင်ပြီးကေ တန်ခါးပိတ် ပိတ်ရို့ နင့်အဖဘားမာ ဆုတောင်း။ နင့်အဖကို မျက်စိန မမြင်ရကေလည်းသောက် ရောက်ရို့ ဟိရေ။ အရာ သူစာ နင် ဖုံးရွှက်ရို့ လုပ်စာ အားကုံးကို မြင်ရေအတွက်န နင့်ကို ဆုပီးလိမည်။

7“အရာ နင်ရို့ ဆုတောင်းရေခါ ထာဝရဘုရားကို မသိသူရို့ပိုင် မတောင်းကတ်ကေ့။ သူရို့စာ အဓိပ္ပါယ်မဟိစာ စကားတိကို အပြန်ပြန် ပြောရို့ ဆုတောင်းနီကတ်တေ၊ အကြောင်းကား သူရို့စာ စကားအရှည်န ဆုတောင်းရေဆိုကေ ကိုယ်ရို့ တောင်းစာဆုကို ထာဝရဘုရား နားထောင်မည် ဟို့ ထင်ကတ်တေ။ 8ယေကေလည်း နင်ရို့စာ ထိုသူရို့ပိုင် မတောင်းကတ်ကေ့၊ အကြောင်းကား နင်ရို့မာ အဖစာ ကိုယ့်ဘားမာ မတောင်းခင်အယင်ကပင် နင်ရို့ ဇာ လိုရေလည်းဆိုစာကို သိထားရေ။

အသျှင်၏ ဆုတောင်းခြင်း

(လုကာ ၁၁:၁-၄)

9“ယင်းအတွက်န နင်ရို့ ဒေပိုင် ဆုတောင်းကတ်၊
‘အိုး အကျွန်ရို့မာ ဂေါင်းခင်ဘုံသျှင် အဖ၊
ကိုယ်တော်၏ သန့်ရှင်းစာ နာမည် ရိုသေခြင်း ဟိပါစီ။
10ကိုယ်တော်၏ နိုင်ငံတော် တည်ထောင်ပါစီ။
ကိုယ်တော်၏ အလိုတော် ဂေါင်းခင်ဘုံမာ ပြည့်စုံစာပိုင် ဒေ ကမ္ဘာမာလည်း ပြည့်စုံပါစီ။
11ဒေနိ အကျွန်ရို့ လိုအပ်စာ အစားအစာကို ကိုယ်တော် အကျွန်ရို့ကို ပီးသနားပါ။
12အကျွန်ရို့စာ ကိုယ်ရို့ကို မတရားလုပ်သူရို့ကို ခွင့်ရွှတ်ကတ်ပါဗျာ။
ယင်းပိုင်တထန် ကိုယ်တော်လည်း အကျွန်ရို့မာ ဟိသမျ အပြစ်ကို ခွင့်ရွှတ်ပါ။
13ကိုယ်တော် အကျွန်ရို့ကို အပြစ်မာ မကျပါစီကေ့၊
ယင်းထက်ပင် အကျွန်ရို့ကို မာရ်နတ်အလက်က ကာကွယ်ပါ။’

14“နင်ရို့စာ အခြားလူရို့ အပြစ်ကို ခွင့်ရွှတ်တေဆိုကေ နင်ရို့မာ ဂေါင်းခင်ဘုံသျှင် အဖလည်း နင်ရို့ အပြစ်ကို ခွင့်ရွှတ်လိမည်။ 15ယေကေလည်း နင်ရို့စာ အခြားလူရို့ အပြစ်ကို ခွင့်မရွှတ်ဆိုကေ နင်ရို့မာ ဂေါင်းခင်ဘုံသျှင် အဖလည်း နင်ရို့ အပြစ်ကို ခွင့်ရွှတ်လိမည် မဟုတ်။

အစားရှောင်ဖို့စာ အကြောင်း

16“နင်ရို့ အစားရှောင်ကတ်တေခါ သူတော်ကောင်း အယောင်ဆောင်သူရို့ပိုင် မျက်နှာမဲရို့န မနီကတ်ကေ့၊ အကြောင်းကား သူရို့စာ ကိုယ်ရို့ အစားရှောင်ကတ်တေဆိုစာကို လူရို့ကို ပြဖို့အတွက် အဂေါင်းန မျက်နှာမာ ပြာလူးရို့ လည်နီကတ်တေ။ ငါ နင်ရို့ကို အမှန် ပြောရေ၊ သူရို့စာ ကိုယ်ရို့ ရဖို့စာဆုကို ရလားခကတ်ပျာ။ 17– 18ယေကေလည်း နင် အစားရှောင်ရေဆိုစာကို အခြားလူရို့ မသိရအောင် နင် အစားရှောင်ရေခါ မျက်နှာသစ်ရို့ အဂေါင်းမာ ဆီထည့်။ ယေကေလည်း မျက်စိန မမြင်ရစာ နင့်အဖစာ နင် အစားရှောင်ရေဆိုစာကို မြင်လိမည်။ နင် ဖုံးရွှက်ရို့ လုပ်စာ အားကုံးကို နင့်အဖ မြင်ရေအတွက်န နင့်ကို ဆုပီးလိမည်။

ပစ္စည်း-ဥစ္စာ စုဆောင်းဖို့စာ အကြောင်း

(လုကာ ၁၂:၃၂-၃၄၊ ၁၆:၁၃)

19“နင်ရို့အတွက် ဒေ ကမ္ဘာမာ ပစ္စည်း-ဥစ္စာကို မစုဆောင်းကတ်ကေ့၊ အကြောင်းကား ဒေ ကမ္ဘာမာ သံချီးတက်တေ၊ ခြစားရေ အရာ သူခိုး ဖေါက်ရို့ ခိုးယူရေ။ 20ယင်းထက်ပင် ဂေါင်းခင်ဘုံမာ နင်ရို့အတွက် ပစ္စည်း-ဥစ္စာကို စုဆောင်းကတ်။ ယင်းနေရာမာ သံချီးလည်း မတက်၊ ခြလည်း မစား အရာ သူခိုးလည်း ဖေါက်ရို့ မယူ၊ 21အကြောင်းကား နင့် ပစ္စည်း-ဥစ္စာ ဟိစာနေရာမာ နင့် စိတ်လည်း ဟိလိမည်။

22“မျက်စိစာ ခန္ဓာ၏ ဆီမီးခွက် ဖြစ်တေ။ ယင်းအတွက်န နင့်မာ မျက်စိ ကောင်းရေဆိုကေ နင့် ခန္ဓာတစ်ကိုယ်လုံး အလင်းနပြည့်စုံလိမည်။ 23ယေကေလည်း နင့်မာ မျက်စိ မကောင်းဆိုကေ နင့် ခန္ဓာတစ်ကိုယ်လုံး မှောင်မိုက်လိမည်။ ယင်းအတွက်န နင့် စိတ်နှလုံးထဲမာ အလင်းစာ သီလားခရေဆိုကေ နင်စာ အပြည့်အစုံ အမိုက်မှောင်ထဲမာ နီရလိမည်!

24“တစ်ယောက်လည်း အပိုင်သျှင်နှစ်ယောက်ကို မပြုဇုနိုင်၊ အကြောင်းကား သူစာ တစ်ယောက်ကို မုန်းရို့ အခြားတစ်ယောက်ကို ချစ်လိမည်။ အရာ သူစာ တစ်ယောက်ကို ရိုသေလေးစားရို့ အခြားတစ်ယောက်ကို အားမနာ လုပ်လိမည်။ နင်ရို့ တစ်ခါတည်းမာ ထာဝရဘုရားန ပစ္စည်း-ဥစ္စာဘားမာ ကျွန်မခံနိုင်။

အစားအစာထက် အသက် အရေးကြီးခြင်း

(လုကာ ၁၂:၂၂-၃၁)

25“ယင်းအတွက်န ငါ နင်ရို့ကို ပြောရေ၊ နင်ရို့ ဇာ စားသောက်ဖို့လည်း ဆိုပြီးကေ အသက်ရှင်ဖို့စာ အကြောင်း၊ မဟုတ်ကေ ဇာ ဝတ်ဖို့လည်း ဆိုပြီးကေ ခန္ဓာ အကြောင်းကို ယူရို့ မစဉ်းစားကတ်ကေ့။ အကြောင်းကား အသက်စာ အစားအစာထက် အရေးကြီးရေ အရာ ခန္ဓာစာ အဝတ်ထက် အရေးကြီးရေ။ 26ဂေါင်းခင်မာ ပျံနီစာ ငှက်တိကို ကြည့်လိုက်။ သူရို့စာ စိုက်လည်း မစိုက်ကတ်၊ ရိတ်လည်း မရိတ်ကတ် အရာ ရိုင်မာလည်း မထည့်ထားကတ်။ ယေကေလည်း နင်ရို့မာ ဂေါင်းခင်ဘုံသျှင် အဖစာ သူရို့ကို ကျွေးမွေးရို့ ထားရေ။ နင်ရို့စာ ထိုငှက်တိထက် ပိုရို့ တန်ဖိုး ဟိကတ်တေ မဟုတ်လော? 27နင်ရို့အထဲမာ အသူတစ်ယောက် စဉ်းစား-ဆင်ခြင်ရို့ ကိုယ့်အသက်ကို တစ်တောင်လှောက် ရှည်အောင် လုပ်နိုင်ရေလည်း?

28“အဝတ်အတွက် နင်ရို့ ဇာဖို့ ဒေလှောက် စဉ်းစားကတ်စာလည်း? ထိုတောပန်းတိ ဇာပိုင်ပျင်ရို့ ပွင့်ကတ်တေလည်းဆိုစာကို နင်ရို့ စဉ်းစားကြည့်ကတ်။ ယင်းသျှင့်တိစာ အလုပ်လည်း မလုပ်ကတ်၊ ဗိုင်းလည်း မဝင့်ကတ်။ 29ယေကေလည်း ငါ နင်ရို့ကို ပြောရေ၊ ရှောလမုန်မင်းကြီး ဒေလှောက် ချမ်းသာကြွယ်ဝရို့လည်း ထိုတောပန်းတိအထဲက တစ်ပွင့်လှောက်ပင် ကိုယ့်ကို ဆင်ဖို့မနိုင်ခလီ။ 30အဝေး ကျုံခြင်းတရား အားနည်းသူရို့! ထိုမြက်တိကိုတိုင်အောင် ထာဝရဘုရား ဆင်ရေဆိုကေ နင်ရို့ကို အရာလည်း ပိုရို့ လှပအောင် ဆင်ဖို့ မဟုတ်လော? ယေကေလည်း ထိုမြက်တိစာ ဒေနိခါ အသက်ရှင်ရို့ ဟိကေလည်းသောက် နှက်ဖြန်ခါ မီးဖေါ်ထဲတို့ ဘိုက်ချခြင်းကို ခံရကတ်ဖို့။

31– 32“ယင်းအတွက်န ‘ဇာ စားသောက်ဖို့လည်း’ အရာ ‘ဇာ ဝတ်ဖို့လည်း’ ဆိုပြီးကေ နင်ရို့ မစဉ်းစားကတ်ကေ့၊ အကြောင်းကား လောကမာ ထာဝရဘုရားကို မသိကတ်စာ ဟိသမျ လူမျိုးရို့ရာ ထို ဟိသမျ အကြောင်းအရာကို ယူရို့ အလုပ်ရှုတ်နီကတ်တေ။ ယေကေလည်း ထို ဟိသမျ ဝန်တိကို နင်ရို့ လိုအပ်တေဆိုစာကို နင်ရို့မာ ဂေါင်းခင်ဘုံသျှင် အဖစာ သိထားရေ။ 33ယေကေလည်း နင်ရို့စာ ပထမဆုံး ထာဝရဘုရား၏ နိုင်ငံတော်ကို ရှာကတ် အရာ သူ၏ အလိုတော်ကို လိုက်နာကတ်။ ယင်းပိုင်ဆိုကေ ထို ဟိသမျ ဝန်တိကို နင်ရို့ ရကတ်လိမည်။ 34ယင်းအတွက်န နင်ရို့ နှက်ဖြန်ခါ အကြောင်းကို ယူရို့ မစဉ်းစားကတ်ကေ့။ နှက်ဖြန်ခါ အကြောင်းကို နှက်ဖြန်ခါ စဉ်းစားကတ်။ ဒေနိခါ တွိကြုံရစာ ဒုက္ခတိ ဒေနိအတွက်မာ လုံလောက်ပျာ။”

Matthew 7:1-27

အခြားတစ်ယောက်ကို တရားစစ်ဆေးခြင်း

(လုကာ ၆:၃၇-၃၈၊ ၆:၄၁-၄၂)

1ယေရှုစာ အရာလည်း ပြောလီရေ၊ “နင်ရို့ အခြားတစ်ယောက်ကို တရားမစစ်ဆေးကတ်ကေ့။ ယင်းပိုင်ဆိုကေ နင်ရို့လည်း တရားစစ်ဆေးခြင်းကို ခံရကတ်လိမည် မဟုတ်။ 2အကြောင်းကား နင်ရို့ အခြားတစ်ယောက်ကို တရားစစ်ဆေးရေပိုင် နင်ရို့လည်း တရားစစ်ဆေးခြင်းကို ခံရကတ်လိမည်။ အရာ နင်ရို့ အခြားတစ်ယောက်ကို ခြင်ရို့ ပီးကတ်စာပိုင် နင်ရို့လည်း ခြင်ရို့ ရကတ်လိမည်။

3“နင် ကိုယ့်မျက်စိမာ မျက်ချီးတစ်ပုံကို မမြင်ဘိုင်းန နင့် ညီအစ်ကို မျက်စိမာ မျက်ချီးတစ်ဖဲ့သျှေကို ဇာဖို့ မြင်နီစာလည်း? 4နင့် မျက်စိမာ မျက်ချီးတစ်ပုံ ဟိရို့အတိုင်းလည်း နင် ဇာပိုင်ပျင်ရို့ နင့် ညီအစ်ကို မျက်စိက မျက်ချီးတစ်ဖဲ့သျှေကို ထုတ်ဘိုက်လိုက်မည် ဟို့ ပြောနိုင်စာလည်း? 5အဝေး အယောင်ဆောင်! ပထမဆုံး နင့် မျက်စိက မျက်ချီးတစ်ပုံကို ထွတ်ဘိုက်လိုက်အုန့်သိ။ ယင်းပြီးခါရာ နင့် ညီအစ်ကို မျက်စိက မျက်ချီးတစ်ဖဲ့သျှေကို ထွတ်ဖို့အတွက် နင့်မာ မျက်စိ ကကြင်းလလင်း မြင်ရလိမည်။

6“သန့်ရှင်းစာ ဝန်တိကို ခွီးကို မပီးကတ်ကေ့ အရာ နင်ရို့မာ တန်ဖိုးဟိစာ ကျောက်တိကို ဝက်ရှိက ချရို့ မထားကတ်ကေ့။ ချထားရေဆိုကေ သူရို့စာ အခြီန နည်ဘိုက်ကတ်လိမည် အရာ နင်ရို့ကို လှည့်ရို့ ကိုက်ကတ်လိမည်။

တောင်းကေ ရဖို့စာ အကြောင်း

(လုကာ ၁၁:၉-၁၃)

7“တောင်းကတ်၊ တောင်းရေဆိုကေ နင်ရို့ ရကတ်လိမည်။ ရှာကတ်၊ ရှာရေဆိုကေ တွိကတ်လိမည်။ အရာ တန်ခါးပိတ်ကို ခေါက်ကတ်၊ ခေါက်တေဆိုကေ နင်ရို့အတွက် ဖွင့်ပီးလိမည်။ 8အကြောင်းကား တောင်းရေလူတိုင်း ရကတ်တေ၊ ရှာရေလူတိုင်း တွိကတ်တေ အရာ တန်ခါးပိတ်ကို ခေါက်တေ လူတိုင်းအတွက် ဖွင့်ပီးရေ။ 9နင်ရို့အထဲမာ ကိုယ့်သား ထမင်းစားဖို့ တောင်းရေဆိုကေ ကျောက်စရစ်ကို ထုတ်ပီးသူ ဟိရေလော? 10မဟုတ်ကေ ငါးစားဖို့ တောင်းရေဆိုကေ မြိန်ကို ထုတ်ပီးသူ ဟိရေလော? 11နင်ရို့ ဆိုးယုတ်ကတ်ကေလည်းသောက် နင်ရို့စာ ကိုယ်ရို့မာ သားသမီးရို့ကို ကောင်းစာ ဝန်တိကို ပီးဖို့တတ်ကတ်တေ။ ယင်းပိုင်ဆိုကေ စဉ်းစားကြည့်ကတ်၊ နင်ရို့မာ ဂေါင်းခင်ဘုံသျှင် အဖစာ ကိုယ့်ဘားမာ တောင်းကတ်သူရို့ကို အရာလည်း ပိုရို့ ကောင်းစာ ဝန်တိကို ပီးဖို့ မဟုတ်လော!

12“ယင်းအတွက်န နင်ရို့စာ အခြားလူရို့က ကျေးဇူးပြုခြင်းကို ရချင်ရေပိုင် နင်ရို့လည်း သူရို့ကို ကျေးဇူးပြုကတ်၊ အကြောင်းကား ဒေ စကားစာ မောရှေ၏ ပညှတ်တရားန ဘုရားသတင်းပို့သူရို့ အဓိက သွန်သင်ချက် ဖြစ်တေ။

ကျဉ်းစာလမ်းန ကျယ်စာလမ်း

(လုကာ ၁၃:၂၄)

13“ကျဉ်းစာလမ်းခဝကနီရို့ ဝင်ကတ်၊ အကြောင်းကား ငရဲမီးအိုင်တို့ လားစာလမ်းန လမ်းခဝစာ ကြီးလည်းကြီးရေ အရာ ကျယ်လည်းကျယ်ရေ။ ယင်းလမ်းကနီရို့ ဝင်လားသူ များကတ်တေ။ 14ယေကေလည်း အသက်ရှင်ခြင်းတို့ လားစာလမ်းန လမ်းခဝစာ သျှေလည်းသျှေရေ အရာ ကျဉ်းလည်းကျဉ်းရေ။ ယင်းလမ်းကနီရို့ ဝင်လားသူ နည်းကတ်တေ။

အယောင်ဆောင် ဘုရားသတင်းပို့သူရို့ကို သိရဖို့စာ အကြောင်း

(လုကာ ၆:၄၃-၄၅၊ မဿဲ ၁၂:၃၃-၃၇)

15“အယောင်ဆောင် ဘုရားသတင်းပို့သူရို့ကို ရှောင်ကတ်! သူရို့စာ ယဉ်စာ သိုးဆိတ်ပိုင် ဟန်ဆောင်ရို့ နင်ရို့တို့ လာကတ်တေ၊ ယေကေလည်း သူရို့စာ အစာမွတ်စာ တောခွီးနတူကတ်တေ။ 16သူရို့ အယောင်ဆောင် ဖြစ်ကတ်တေဆိုစာကို သူရို့မာ အကျင့်သီလတိကို မြင်ရို့ နင်ရို့ သူရို့ကို သိရကတ်လိမည်။ စူးခြုံမာ စပျစ်သီး မသီးနိုင် အရာ ကြောင်ခြိုက်ခြုံမာ သဖန်းသီး မသီးနိုင်။ 17ယင်းပိုင်တထန် ကောင်းစာအပင်မာ ကောင်းစာအသီး သီးရေ အရာ မကောင်းစာအပင်မာ မကောင်းစာအသီး သီးရေ။ 18ကောင်းစာအပင်မာ မကောင်းစာအသီး မသီးနိုင် အရာ မကောင်းစာအပင်မာ ကောင်းစာအသီး မသီးနိုင်။ 19အသီးကောင်း မသီးစာအပင်စာ ခွတ်ရို့ မီးဖေါ်မာ အထည့် ခံရရေ။ 20ယင်းအတွက်န ငါ အရာလည်း ပြောရေ၊ အယောင်ဆောင် ဘုရားသတင်းပို့သူရို့မာ အကျင့်သီလတိကို မြင်ရို့ နင်ရို့ သူရို့ကို သိရကတ်လိမည်။

အသူ ဂေါင်းခင်နိုင်ငံတော်တို့ ဝင်ရဖို့လည်း?

(လုကာ ၁၃:၂၅-၂၇)

21“ငါ့ကို ‘အသျှင်၊ အသျှင်’ ဟို့ ခေါ်ရေလူတိုင်း ဂေါင်းခင်နိုင်ငံတော်တို့ ဝင်ရကတ်လိမည် မဟုတ်၊ ယေကေလည်း ငါ့ ဂေါင်းခင်ဘုံသျှင် အဖ၏ အလိုတော်ကို လိုက်နာသူရာ ဂေါင်းခင်နိုင်ငံတော်တို့ ဝင်ရလိမည်။ 22တရားစစ်ဆေးရေနိမာ လူအများကြီး ငါ့တို့ လာရို့ ပြောကတ်လိမည်၊ ‘အသျှင်၊ အသျှင်၊ အကျွန်ရို့ ကိုယ်တော်နာမည်န အနာဂတ္တိစကားကို ဟောပြောလီပါရေ။ အကျွန်ရို့ ကိုယ်တော်နာမည်န လူရို့ ခန္ဓာက နတ်ဆိုးကို နှင်ထုတ်လီပါရေ။ အရာ ကိုယ်တော်နာမည်န အကျွန်ရို့ အံ့ဩဖွယ်အလုပ် အများကြီး လုပ်လီပါရေ။’ 23ယင်းခါ ငါ သူရို့ကို ပပြောင့်သသား ပြောဖို့၊ ‘လူဆိုးရို့! ငါ နင်ရို့ကို မသိ။ နင်ရို့ ငါ့နိုင်ဗြင်းက ပျောက်လီကတ်!’

တည်ဆောက်သူနှစ်မျိုး အကြောင်း

(လုကာ ၆:၄၇-၄၉)

24“ယင်းအတွက်န ငါ ပုံဥပမာတစ်ခု တင်ပြမည်။ ငါ့စကားကို ကြားရေအတိုင်း လိုက်နာသူစာ ပညာဟိတစ်ယောက်နတူရေ။ သူစာ ကျောက်ပြင်မာ အုပ်မြစ်ချရို့ အိမ်ဆောက်လီရေ။ 25ယင်းနောက် မိုးကြီးကျရို့ ရီမင်းကြီးလီရေ အရာ လီမုန်တိုင်း အားန တိုက်လာရို့ ယင်းအိမ်မာ အက်ကျလီရေ။ ယေကေလည်း ကျောက်ပြင်မာ အုပ်မြစ်ချရို့ ဆောက်လီရေအတွက်န ယင်းအိမ်စာ မပြိုလီ။

26“ယေကေလည်း ငါ့စကားကို ကြားရေအတိုင်း မလိုက်နာသူစာ ပညာတုံးတစ်ယောက်နတူရေ။ သူစာ သလဲပြင်မာ အိမ်ဆောက်လီရေ။ 27ယင်းနောက် မိုးကြီးကျရို့ ရီမင်းကြီးလီရေ အရာ လီမုန်တိုင်း အားန တိုက်လာရို့ ထိုအိမ်မာ အက်ကျလီရေ။ ယင်းအတွက်န ထိုအိမ်စာ ကြောက်လန့်သဖွယ် ကကြွန်းဆာရို့ ပြိုကျလားခလီရေ!”