Mar 12 | SBE | STEP | Na kabo Yesu ye hetubu ye hedede palabole kalidi wai ye wane, “Tamowai hesau wine koyana ye kumai, na ye gana hetakikili, wine kaniyodi kaba tamtam ye ginauli, yo kaba yaiyaiwa numana ye kabi. Na kabo yona wine koyana ye mosei taukitakitahetete kalidi wai na ye lau magai hesau keda lohaloha unai.

b(Same 118:22-23)

h(Dutolonomi 6:4-5)

i(Lewitika 19:18)

k(Same 110: 1)

‏ Mark 12

Taukitakitahetete yababadi palabolena

(Mataiyo 21:33-46; Luka 20:9-19)

1 Na kabo Yesu ye hetubu ye hedede palabole kalidi wai ye wane, “Tamowai hesau wine koyana ^{▼▼12:1 Wine koyana meta tano haidi maimaina likena se kumai. Maimaina hesana ede ‘wine’. Iya kaniyona kana kao ede dimdim se wane ‘grapes’. Tamowai grapes wa se tam meta kaedi se hepaisowa se utuhihi kaba tamtam tehana wai, dimdim se wane ‘wine press’. Masina wa ye bui ede numanuma hesana ‘waina’. Waina wa ye hemala mayadai badobado numanumana siya Dius kalidi wai.} ye kumai, na ye gana hetakikili, wine kaniyodi kaba tamtam ye ginauli, yo kaba yaiyaiwa numana ye kabi. Na kabo yona wine koyana ye mosei taukitakitahetete kalidi wai na ye lau magai hesau keda lohaloha unai. 2 Wine yona huya kaniyo ye lage, ede yona heyayai tauhaina hesau ye hetamali ye lau taukitakitahetete kalidi wai bena koya tanuwagana yona wine kaniyona ye haidi. 3 Taukitakitahetete heyayai tauhaina wa se kelebesi yo se pidili, na se hetamali ye uyo ma nima gaibuna.

4 Heyayai tauhaina hesau ye hetamali uyoi. Iya kuluna se koilapai yo se kabihenayai kaliliyei. 5 Hinage hesau ye hetamali uyoi. Iya se koihemwaloi. Na gwaudi kabo ye hetamalidi se lau, meta hekadiyo se pidilidi yo hekadiyo se koihemwaloidi. 6 Na kabo iya natuna tahunuwana ye bom mo maiyana se miyamiya. Na ye hetamali mulitai na ye nuwatui ye wane, ‘Yau natugu, unai kabo se hekasisiyei.’ 7 Taukitakitahetete wa se koitalaliu se wane, ‘Teina ta koya tanuwagana natuna tahunuwana. Kwa laoma ta koihemwaloi, na koya ta kabo kita ta tanuwagai.’ 8 Iya se kelebesi se koihemwaloi na se gabaedikwaei gana dagelana wa unai. 9 Koya tanuwagana kabo saha ye ginauli? Iya kabo ye laoma koya taukitakitahetete ye unuhemwaloidi, na kabo wine koyana wa ye moselaei tamowai hekadi se kitahetete. 10 Komiu taba kabina kwa kata Buka Tabuna unai saha se kuli wa,

‘Taukabinuma duu se subu na se tolehesuwala, na iyamo iya duu salibebe yo numa tauhebayaona ede.
11 Teina Guiyau yona nuwatu na ye namwa kalili matada ne unai.’” ^b
12 Yesu yona palabole wa Dius tamowai lakilakidiyao se nuwatulobai meta siya kadi hedehedede, unai bena se pai. Na boda wa se matausiyedi, unai ede se laugabaei.

Takisi monina hedehededena

(Mataiyo 22:15-22; Luka 20:20-26)

13 Na kabo Paliseya tamowaidi yo Heloda yona tamowai hekadi se hetamalidi se lau Yesu unai yona hedehedede unai bena se henuwapwanopwano. 14 Se lage iya unai kabo se wane, “Tanuwaga, ka kabina ka kata meta kowa ku dudulai. Tamowai nige ku matausiyedi, matawuwuna tamowai nige ku hekasisi gaibuidi. Na Yaubada yona keda mamohoina mo ku lauhekataei. Ye dudulai kabo takisi ka mosei Sisa ^{▼▼12:14 Sisa meta Loma tamowaidi yodi wasawasa saesaena. Buka Suau unai ‘kaisala’ se hepaisowa.} unai o nige? 15 Kabo ka tole o tabu ka toletole?” Yodi kailupolupo Yesu ye kita na ye wane, “Idohagi to bena kwa lautonogigau? Hage, denali ^{▼▼12:15 Denalimeta Loma tamowaidiyao yodi moni hesau.} hesau kwa leyama ya kita.” 16 Ede denali wa se mosei Yesu unai na ye wane, “Teina kaiteya kana kao yo hesana?” Siya se wane, “Sisa.” 17 Yesu ye hededelau udiyedi ye wane, “Ena Sisa yona, kwa mosei Sisa unai, na ena Yaubada yona kwa mosei Yaubada unai.” Siya kabo Yesu se nokoei.

Tolouyoma tawasolana

(Mataiyo 22:23-33; Luka 20:27-40)

18 Sadusiya ^{▼▼12:18 Sadusiyameta Dius kadi boda hesau. Siya meta se gogo kalili, na yodi nuwatu doha teina: Teina tanoubu ta meta kabamiya namwanamwana. Unai boita tolouyona siya nige se kawamamohoiyei yo hineli mayadaina yo mauli hesau matada ne unai nige se nuwatui.} tamowaidi yodi nuwatu tauboiboita taba nige se tolouyoma. Na se laoma Yesu se henamaiyei se wane, 19 “Tanuwaga, Mose yona kulikuli unai ye wane, ena tamowai hesau ye boita, na mwanena ye miyamiya, na nige natunao bena kana kaha hesau kwabulina ne ye tawasolai na natunao ye labasidi, kabo se hemala kana kaha wa natunao. ^{▼▼12:19 Dutolonomi 25,5-6 ku hasili.} 20 Huya hesau tamowai hesau natunao loheloheyao badodi haligigi-labui. Taubaguna ye tawasola, nige natunao, na ye boita. 21 Kana kaha helabuina kwabuli wa ye tawasolai. Iya hinage nige natunao, na ye boita. Na hehaiyonadi ye tawasolai wa gonogonowana. 22 Yodi haligigi-labui kwabuli wa se tawasolai, na nige natudiyao. Sine wa kabo hinage ye boita. 23 Badodi haligigi-labui wa meta kwabuli wa se tawasolai, na tolouyoma unai waihiu wa kabo kaiteya mwanena?” 24 Yesu ye hededelau udiyedi ye wane, “Komiu yomi kaba nuwapwanopwano ede teina. Yaubada yona hedehedede yo yona gigibwali nige kabina kwa kata. 25 Huyana tauboiboita se tolouyoma taba nige se tawasola yo taba nige se hetahetawasola. Na siya kadi kao kabo doha galewa aneludi. 26 Na tauboiboita yodi tolouyoma Mose yona buka unai saha ye kuli wa, idohagi to nige kwa nuwatui? Temenai, Yaubada ye taumasalaha kaiwa hesau unai, na kana kao doha kaiwa ye kalapulupululu. Na ye hededelau Mose unai ye wane,

‘Yau Abelahama yona Yaubada, yo Isako yona Yaubada, yo Yakobo yona Yaubada.’ ^{▼▼12:26 Esodo 3,1-6 ku hasili.}

27 Yaubada ta iya nige tauboiboita yodi Yaubada, na iya taumaumauli mo yodi Yaubada. Komiu nuwamiu se pwanopwano kalili.”

Laugagayo saesae kalilidi

(Mataiyo 22:34-40; Luka 10:25-28)

28 Na kabo laugagayo taulauhekata hesau ye laoma ede saha se hetahetaladi wa ye lapuidi. Iya ye nuwatulobai meta Yesu hedehedede namwanamwadi ye hedededi udiyedi, ede ye henamai Yesu unai ye wane, “Laugagayo maudoidi ta udiyedi meta sahasahana ye baguna ede?” 29 Yesu ye wane, “Teina laugagayo saesae kalilina ede:

‘Isalaela tamowaidiyao, kwa lapulapui! Guiyau yoda Yaubada, iya Guiyau kesega mo. 30 Unai Guiyau yom Yaubada ku gadosisiyei ma nuwam ye gehe, ma yaluwam ye gehe, yo ma nuwanuwatum ye gehe, yo ma bayaom ye gehe.’ ^h

Teina ta laugagayo bagubagunana. 31 Helabuina ede teina:

‘Kowa helem taumiya tamowaina ku gadosisiyei, doha ku bom ku gadosisiyeigo.’ ⁱ

Teina laugagayo labui ta se sae kalili, na kabo hekadi.” 32 Na kabo laugagayo taulauhekata wa ye hededelau Yesu unai ye wane, “Tanuwaga, saha ku hedede wa meta ye dudulai. Ye mamohoi kalili meta Yaubada kesega mo, na nige Yaubada hesau, iya ye bom mo Yaubada. 33 Yaubada bena ta gadosisiyei ma nuwada ye gehe, yo ma sonogada ye gehe, yo ma bayaoda ye gehe. Yo heleda taumiya tamowaina bena ta gadosisiyei, doha ta bom ta gadosisi uyoida. Teina laugagayo ta se sae kalili ede, na kabo kaitalasam gabugabudi yo kaitalasam hekadi.” 34 Yesu ye kita meta tamowai wa ye sibasiba unai ye wane, “Kowa Yaubada yona basileiya ku hanahanawui.” Unai siya maudoidi se matausi ede nige se henamai uyoi.

Dawida natuna hedehededena

(Mataiyo 22:41-46; Luka 20:41-44)

35 Yesu numa tabuna bakubakuna unai ye laulauhekata na ye henamaiyeidi ye wane, “Mata wuwuna saha to laugagayo taulauhekata se hedede bena Keliso meta Dawida natuna? 36 Yaluwa Tabuna yona gigibwali unai Dawida ye hededegabae ye wane,

‘Guiyau ye hededelau yogu guiyau unai ye wane,
“Nima tuutuugu yena ku tuli ^{▼▼12:36 nima tuutuugu unai ku tuli: Teina hedehedede ta kaniyona ede ‘teha saesaena unai ku tuli’.} ye lau ee kam waiunu ya toledi kaem gunina ena,
se hemala kaem kabatoledi.” ’ ^k
37 Dawida Keliso hesana ye katai Guiyau. Na komiu yomi nuwatu saha, iya hinage Dawida natuna?” Boda wa se lapui meta nuwadi se namwa.

Yesu laugagayo taulauhekata ye hededeheyababadi

(Mataiyo 23:1-36; Luka 20:45-47)

38 Yesu yona lauhekata unai ye hededelau udiyedi ye wane, “Laugagayo taulauhekata kwa kita namwanamwaedi. Yodi taitaihile udiyedi se henuwa bena kwama lohalohadi se luwuidi yo kaba lokulokune udiyedi bena tamowai siya se hailobaidi, 39 yo hinage sunago yo kaba kaikaigogo udiyedi kabatutuli namwanamwadi se henuwadi. 40 Na kwabukwabuli yodi numa se lupohaidi, yo yodi tapwalolo se helohadi bena kabo tamowai se nokoeidi. Tamowaidiyao ne Yaubada kabo ye hekamkamna kaliliyeidi.”

Kwabuli dehadehana yona kainauya

(Luka 21:1-4)

41 Na Yesu ye tutuli moni kaba usausa dedekadi wai, na ye kaikaikewa na boda se monimonitole. Tamowai monimonidi yodi moni lakilakidi se usaidi kaba usausa wa kalodi udiyedi. 42 Na kabo kwabuli dehadehana hesau ye laoma, na pene gagilidi labui ye usaidi. Pene labui wa lakidi meta se gagili kalili. 43 Yesu yona hekahekatao ye yoganedima na ye hededelau udiyedi ye wane, “Ya hedede mamohoi. Teina kwabuli ta kainauya lakilaki kalilina ye tole, na kabo maudoidi ne. 44 Mata wuwuna ede siya yodi moni lakilakidi udiyedi na kabo hisa mo se haidi na se toledi, na iya yona deha unai moni maudoina kalina wai ye tolehegehe.”