Phili 2 | SGZ | STEP | A támin ngo ái Karisito a lu arakrakai i kamu liu, má kán armámna a abálbál gam, má gam lu ararguna tiklik mai Tanián a Pilpil, má gam lu armámna má artangan arliu i gam.

a 2:3Gal 5:26

b 2:41Ko 10:24

c 2:6Ioa 1:1-2, 17:5

d 2:7Ioa 1:14; 2Ko 8:9

e 2:8Eba 5:8, 12:2

f 2:9Apo 2:33; Epe 1:20-21; Eba 1:3-4

g 2:10 Rom 14:11

h 2:11 Rom 10:9

i 2:15-16Dan 12:3; Pil 1:10; 1Te 2:19

j 2:18Pil 3:1, 4:4

k 2:212Ti 4:10

l 2:25Pil 4:18

‏ Philippians 2

Gama mur i tohtohpas si Karisito

1 A támin ngo ái Karisito a lu arakrakai i kamu liu, má kán armámna a abálbál gam, má gam lu ararguna tiklik mai Tanián a Pilpil, má gam lu armámna má artangan arliu i gam. 2 Má ngorer iau sung gam ngo gama apakta i kak gasgas ngoromin: na tukes á kamu holhol sang. Ngorer kamu armámna arliu na tukesi matngan, má na kepwen i kamu hol, má kamu sorsormángát suri kesá táit na tukes on. 3 ^aMá koion gama mur i tatalen án kiu ngo tatalen án apakta pas gam sang. Ái sár gama agengen tar gam arliu i gam, má keskeskes tili gam na apakta pasi tan lite alari sang. 4 ^bKoion á tekes ngo na mákmák suri tangan masiknai sang, ái sár na hol tepák suri na tángni turán mul.

5 Kamu hol na ngorer i hol si Iesu Karisito, má ninsi gam mul na ngoro ninsin.

6 ^cÁi Karisito a ngoro Káláu sang má diar arwat,
ái sár kápate top dik on suri na tubán akuluknai sang.
7 ^dKápte.
A bál palai kán lala kiskis imi sang,
mák tar kápán páplun áng kálámul má,
mák áksái tatalen kán tám toptop ur on.
8 ^eMá i pákánbung a kakun naul bim,
a agengen pasi sang mák taram no i nemnem si Káláu,
mák áslai lala rumrum er a mat iamuni kubau kus.
9 ^fMá kabin a longoi ngorer,
ái Káláu a apakta pasi
má ák aksimi i kiskis a pakta sorliwi tan táit no,
má ák tari ngis a pakta alari tan ngis no.
10 ^gÁi Káláu a longoi ngorer suri matananu má bos angelo má tan táit no
da agengen pas di sang uri lalin i Iesu.
Áá, di no imi naul bát mái rung main i naul bim má sinih idi pokon án minat,
da kis dirtapul má dák lotu uri narsán ái Iesu.
11 ^hMá di no tili naul matmatngan pokon
da arbin talas ngo ái Iesu Karisito ái á Konom,
má ngorer da árngai ngisán ái Káláu Kák git.

Gama atalsai talas uri katbán matananu

12 Má lain rang buhang, gama mur on ngorer a longoi ái Iesu Karisito er a taram i Kákán. Tungu iau main narsá gam, gam lu mánán i taram. Má onin iau kis tepák alar gam, má a kuluk ngo gama lu sopasun hanhan i kamu tatalen án taram. Gam mánán ngo a mon á matngan tatalen a kuluk er tan tám ruruna da lu mur on. Má ngorer keskeskes tili gam na rakai suri mur i matngan tatalen erei, má na longoi ngorer mai rumrum uri narsán ái Káláu. 13 Kabin ái Káláu sang ái koner a arakrakai i git má gitá artálár suri kákir pasi nemnem káián, má a tangan git mul suri gita long artálár pasi.

14 Tan bos táit gam longoi, koion gama longoi mai ngurngurngur má wor arkuh, 15 ⁱmá ngorer kápte kes na ser pasi sápkin i gam. Má gama rang natun ái Káláu, gama pilpil má nokwan iatung i katbán ngaul matananu di lu mur i sápkin má tokroroi lain ninas. Má i katbán matananu erei, gama ngorer i bos mátmátiah di márám iamuni armongoh, 16 má gama para talsai si di á pinpidan án liu. Má ngo gama mur arwat pasi ngorer, ki gama aposoi ngo kak him káp iau te era bia on iatung i katbán i gam. Má ngorer na mon á kang kábutkis án gasgas namur i bung káián ái Karisito.

17 Tungu gam ruruna, gam tar gam sang ur káián ái Káláu má a ngoro osmapak er tám osmapak a tari uri narsán ái Káláu. Má ngo da han up iau ái rung til Rom, ki kak minat na ngoro kak osmapak uri narsán ái Káláu ngorer i suir wain di urai urami iátin osmapak suri arahi. Káksiai ngo na han ngorer sang, ki ina laes sur git ngo gitáte hut ngoro osmapak uri narsán ái Káláu. 18 ^jMá gam mul gama laes, má giták laes tiklik kabin gitáte bál tar git ngorer.

Worwor sur Timoteo diar ái Epaproditus

19 Má rang buhang, ngo ái Káláu a mángát suri tarwa Timoteo uri narsá gam, iau hol on ngo ina sangar i tarwai. Má ngo ái Timoteo na tarwa kalengnai te arbin sur gam, ki ngorer na arakrakai i iau. 20 Ái Timoteo masik sár kán ásásla a ngoro kak ásásla, má a lala holhol mul suri tangan gam. 21 ^kIau para pas Timoteo kabin marán di lala hol pas kalengna di masik, má dik hol sirereh i him si Iesu Karisito. 22 Gamáte mánán on ái Timoteo ngo matngan kálámul ngoro sinih. Ákte inngas tari ngo lain kálámul sang, má ákte him tiklik mam iau suri talar mai lain arbin ngorer i kalik a tangan kákán. 23 Má ngorer ina sangar i tarwa meleknai i pákánbung erei ina mánán i táit da longoi mam iau. 24 Mái Káláu ákte atumran i kak hol sur iau, ngo páput sár mul má ina han suri laum gam.

25 ^lMá sur Epaproditus, koner tungu gam tarwai ur singing mák tur sur gam suri na tangan iau i kak pákánbung án sáhár. Ái á buhang má táring mul, má giur lu him tiklik ngorer i aru tám arup káián ái Káláu. Má inái ákte ngoi á balang ngo ina tarwa kalengnai uratung si gam. 26 A lala kon sur gam máng konngek kabin gam longrai ngo a sasam. 27 A támin ngo sasam a gis bengtai, wa a tigán án minat sang má, ái sár ái Káláu a mámnai mák aliu pasi. Má sinih ngo ái Káláu a mámna masikna Epaproditus, wa a mámna iau mul kabin ái Káláu a matai ngo na bontai kak tinang nák lala pakta. 28 Má ngorer, a bop i balang suri ngo ina tarwa kalengnai suri gama mákái mul má gamák laes má nák bokoh má kamu tinang, má ngorer iau mul kak tinang na bokoh pas má. 29 Má ngo na hut main, gama árár pasi mai kamu gasgas kabin gam no boh rang buhán ái Konom, má gama aposoi kamu rumrum uri narsán sang má uri narsán bos kálámul di lu him ngoro ái. 30 Kabin pátum na han te mat kunán him si Karisito er a tur sur gam má a kis narsang mák tangan iau i pákánbung iau bokoh alar gam má kápgamte arwat suri tangan iau.