2Th 2 | SSX | STEP | Nika꞉ kametonuo. Mo hande nika꞉ Tekehali Yesu Ketisoma꞉ paa epolo pa꞉la꞉ ekina꞉ make ipiki pa꞉ta꞉ niki momba꞉laasa꞉ ekina꞉ make hone witolo hata꞉ iki honke alo dupiki pi aloma꞉me.

‏ 2 Thessalonians 2

Wanda꞉hali ota꞉ hoeyaalo pa꞉la꞉ hoke halina꞉ pi

1 Nika꞉ kametonuo. Mo hande nika꞉ Tekehali Yesu Ketisoma꞉ paa epolo pa꞉la꞉ ekina꞉ make ipiki pa꞉ta꞉ niki momba꞉laasa꞉ ekina꞉ make hone witolo hata꞉ iki honke alo dupiki pi aloma꞉me. 2 Ma꞉nda꞉ma꞉ Tekehalina꞉ ponka꞉ di pilu wia꞉ nate a꞉pa꞉la꞉me lea꞉ka꞉na꞉ta꞉ opua hone ti yoko pomoma꞉ a̱i̱ na homa꞉pa꞉peke. Ma꞉nda꞉ma꞉ Koda꞉ma꞉ aleke handa loa꞉me ala꞉ pi o ma꞉nda꞉ma꞉ pi walolo walea꞉ pi o ma꞉nda꞉ma꞉ alota꞉ Polo amedama꞉ do wapena꞉ leleme pi tupa꞉ leliepate 3 ma꞉nda꞉ma꞉ do aloeki manuma꞉ iki na yola꞉ mina꞉ lapa꞉peke. Mo hande ponka꞉ di pilu ula꞉ nateta꞉ pa hameke na opolo ipilieke. Mo nate epolo pa꞉la꞉ di teke pa꞉ta꞉ ya꞉ka꞉na꞉ta꞉ Koda꞉na꞉ pi na opiki a꞉nda꞉ lita꞉la꞉eki amba꞉la opolo ipilieke. Kutupa make mo wanda꞉hali hoeyaalo pa꞉la꞉ hoke halita꞉ wetepe ti to hala꞉ alena꞉ pena꞉ titina꞉ amba꞉la peneme yaalo ipilieke. 4 Epea꞉ka꞉na꞉ta꞉ wanda꞉halina꞉ yeni hau pu haleme alemanu paeyao make Koda꞉na꞉ alemanu hone u haleme ekimanu sa꞉sa꞉ puluekema꞉ taapilieke. Ipikita꞉ do alo alemanu paeyaota꞉ oto nane yao manda halieke. Kutupa make Koda꞉na꞉ tembolo da pa꞉ta꞉ kone pua pita꞉ I̱ta꞉ Koda꞉ halome lo halieke.

5 Na niminaasemepe. Do alo pi paeyaota꞉ I̱ iki ame̱le̱ hande mandake hama꞉ pita꞉ma꞉ la kua꞉me.

6 Ameta꞉ do haumanu peaapa꞉na꞉ ma꞉nda꞉ma꞉ sa꞉sa꞉ pita꞉la꞉me. Ikita꞉ do sa꞉sa꞉ pita꞉la꞉ ekita꞉ hone witelememe. Koda꞉ma꞉ la꞉ ula꞉ nate opolo ipilie dina꞉ta꞉ kota꞉ do wanda꞉hali hoeyaalo pa꞉la꞉ hoke halita꞉ peneme yao ipilieke. 7 Ti teke yokaasa꞉ hauma꞉ ameta꞉ a꞉mbao hata꞉ e poka꞉la꞉pate wetepe pulu pa꞉la꞉ ekita꞉ pa a̱i̱ na pulu pa꞉la꞉pate amba꞉la mo hande sa꞉sa꞉ pita꞉la꞉ halita꞉ hatuku mea pelieke. 8 Kutu pilie dina꞉ta꞉ mo hande wanda꞉hali hoeyaalo pa꞉la꞉ hali opolo ipilieke. Kutupa Tekehali Yesu opolo a꞉pata꞉ ipika꞉ kake pa꞉ta꞉ pomo tapaasa꞉ ekima꞉ make ipika꞉ pa̱a̱ seliapo taapuna꞉ opolo ipilie ekima꞉ make mo hali homaalieke. 9 Mo hande wanda꞉hali hoeyaalo pa꞉la꞉ hoke halita꞉ Sadanina꞉ wele taapuna꞉ ipilieke. Kutupa ipikana꞉ma꞉ pea꞉peke na yeke haumanu make yayapiki pate haumanu make na handeke haumanu make a꞉pa pilieke. 10 Kutupa ipikana꞉ma꞉ mo alu pulu peleme wanda꞉hali pa꞉ta꞉ hoke makeaasa꞉ hau ta꞉ta꞉ ta꞉ta꞉ wopu pilieke. Mo hande alu pulu peleme wanda꞉hali ika꞉ pa꞉ta꞉la꞉la꞉eki na miki alu pulu peleme ekina꞉ teketa꞉ ikana꞉ma꞉ Koda꞉na꞉ ota꞉ hau handa꞉ mea pukima꞉ na homemekeme. 11 Koto ekina꞉ta꞉ mo hande wanda꞉halima꞉ makeaasa꞉ hauta꞉ ota꞉ekie hone wina꞉ Koda꞉ma꞉ ata꞉ka꞉ peaasa꞉ wele iki pa꞉ta꞉ e pokena꞉ tapaalieke. 12 Kota꞉ koto ekina꞉ yenkita꞉ ikana꞉ma꞉ mo ota꞉ pina꞉ hone na tulake hoke haumanu pa꞉ta꞉ ta꞉na꞉ma꞉ homa pu haleme ekina꞉ iki paeyaota꞉ Koda꞉ma꞉ pi yokaalu pea hoke yenki halieke.

Koda꞉ma꞉ iki pa꞉ta꞉la꞉la꞉eki muemena꞉ mea hala꞉eki

13 Tekehalima꞉ pukima꞉ homo hala꞉ kametonuo. Hoto paeyao ikina꞉ Koda꞉ pa꞉ta꞉ keiyae lo hamonoe. Koda꞉ma꞉ iki peteluekema꞉ titina꞉ amba꞉ ma̱leke lia mea haya꞉me. Mo Holi Sipitidima꞉ iki Koda꞉na꞉eki hamena꞉ sa̱ pa꞉la꞉ ekima꞉ make ika꞉ mo ota꞉ pi pa꞉ta꞉ hone tulaleme ekima꞉ make koto ekima꞉ta꞉ Koda꞉ma꞉ iki petelea꞉me. 14 Koda꞉ma꞉ koto tupa꞉ hamena꞉ mo Pi Seliapo waloma꞉ ekima꞉ta꞉ iki wi lea꞉me. Nika꞉ Tekehali Yesu Ketisona꞉ pa̱a̱ pita꞉la꞉eki putu piliki ikana꞉ma꞉ muemena꞉ wi lea꞉me. 15 Kametonuo. Koto ekina꞉ta꞉ mo ota꞉ pimanu nikana꞉ma꞉ wapena꞉ loma꞉eki make kakema꞉ waloma꞉eki make koto pi paeyao miniki hata꞉ taka꞉lao hao hapa꞉peke. 16 Koda꞉ nika꞉ Apa꞉ma꞉ niki pukima꞉ homolo hata꞉ ipika꞉ a꞉ta꞉ma꞉ homa tamba꞉ mina꞉la꞉ ekina꞉yeke mo na paelo pa꞉la꞉ aela꞉ baasa꞉ hau make epeke hone tulaasa꞉ hau make niki kia꞉me. 17 Kutupa ipikana꞉ma꞉ make nika꞉ Tekehali Yesu Ketisoma꞉ make ipilikana꞉ma꞉ aela꞉ baasa꞉ hauma꞉ ika꞉ puki tumbaena꞉ lapa꞉peke aloma꞉me. Kutupa ika꞉ epeke hau paeyao pulu peleme ekina꞉ make ika꞉ epeke pi paeyao lolo peleme ekina꞉ make ipilikana꞉ma꞉ iki wele peawapa꞉peke aloma꞉me.