Gen 17 | SSX | STEP | Eipola꞉ma꞉ 99 bapi mieketa꞉ mo Tekehali opolo pua alota꞉ I̱ta꞉ Aneke Wele wopupiki Koda꞉ halome. I̱ma꞉ alo pi opua hoto paeyao tikitiki hau homeke pea꞉peke.

‏ Genesis 17

Sekemesaisi hauta꞉ mo pi la꞉ wieke ekina꞉ patehau

1 Eipola꞉ma꞉ 99 bapi mieketa꞉ mo Tekehali opolo pua alota꞉ I̱ta꞉ Aneke Wele wopupiki Koda꞉ halome. I̱ma꞉ alo pi opua hoto paeyao tikitiki hau homeke pea꞉peke. 2 I̱ma꞉ta꞉ neke yaapo yaka pi la꞉ wiaata꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ wopu kulueke leekeme. 3 Koto leeke Eipola꞉ma꞉ta꞉ you panda꞉puniao ipika꞉ popeleketa꞉ oni yu wataeyeke handaa Koda꞉ma꞉ alota꞉ 4 I̱ma꞉ neke yaapo do pi la꞉ witolome. I̱ma꞉ pi la꞉ witolota꞉ neketa꞉ tutu paeyao sikina꞉ apa꞉mei halipikie. 5 Naka꞉ bikita꞉ Eipola꞉ma꞉ dia꞉yalo ameta꞉ Eipoloha꞉ma꞉e. Pa ekipeke neketa꞉ tutu paeyaona꞉ apa꞉mei hawaasome. 6 I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandiki tieke kua꞉ka꞉na꞉ta꞉ kota꞉ mandaneta꞉ kinimanu pitilimikie. Nakana꞉ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ tieke kua꞉ka꞉na꞉ta꞉ kota꞉ tutu ta꞉ta꞉ ta꞉ta꞉ halimikie.

7 I̱ma꞉ta꞉ neke pa꞉ta꞉ make naka꞉ monduma꞉ monduma꞉ pilipi wekiwandikina꞉ wekiwandikina꞉ tapake pa꞉ta꞉ maketa꞉ do la꞉ witolo pita꞉ ota꞉ na paeke pa u halo pa꞉la꞉ pi la꞉ witolome. I̱ta꞉ naka꞉ Koda꞉ make naka꞉ monduma꞉ monduma꞉ pilipi wekiwandikina꞉ wekiwandikina꞉ Koda꞉ make halueke. 8 Ame do neketa꞉ da ma꞉nda꞉ hali leke hale kenketa꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke. Do Keinani kenke paeyaota꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ ota꞉ hoto paeyao ika꞉ ekie la halaata꞉ I̱ta꞉ ika꞉ Koda꞉ halueke.

9 Koda꞉ma꞉ Eipoloha꞉ma꞉ pa꞉ta꞉ alota꞉ Nakana꞉ma꞉ make naka꞉ wetepe nina꞉ monduma꞉ monduma꞉ pilipi wekiwandikina꞉ wekiwandikima꞉ maketa꞉ I̱ ame̱le̱ do pi la꞉ witolo ekita꞉ ota꞉ wia halumeke laa lapa꞉peke. 10 Nakana꞉ma꞉ make naka꞉ monduma꞉ monduma꞉ pilipi wekiwandikina꞉ wekiwandikima꞉ make ika꞉ hali weki paeyaota꞉ sekemesaisi hau ota꞉ pulumeke laa lapa꞉peke. 11 Ame do kini pea puluta꞉ ika꞉ hali weki mondu wia pitina꞉ hoto ketepo hata꞉ paeya꞉ka꞉na꞉ta꞉ kota꞉ sekemesaisi hau peapa꞉peke. Kutupa mo iki haleme da pa꞉ta꞉ mendilimi pa hameke e pokaasa꞉ wanda꞉halina꞉ hali weki make mo kenke ma꞉nda꞉na꞉ hamba꞉la꞉ pa hameke e pokaasa꞉ haliweki make sekemesaisi hau peapa꞉peke. Do hauma꞉ta꞉ neke I̱ dika꞉ pi la꞉ witolopa꞉eki peneme yao walieke. 13 Hali paeyao sikita꞉ sekemesaisi hau peapeke ya꞉la꞉me. Kutupa do manda lokena꞉ pitoloma꞉ ekita꞉ mo na paeke pa u halo pa꞉la꞉ pi la꞉ witolo ekina꞉ patehau pitoloeki walieke. 14 Koto pa꞉la꞉pate iki ma꞉nda꞉ epi sekemesaisi hau na pia꞉ka꞉na꞉ta꞉ kota꞉ Ya tapakee pi na lolueke. Pa ekipeke ipikana꞉ma꞉ta꞉ yaka pi la꞉ ulueki na wia haleke loa꞉me leekeme.

15 Koda꞉ma꞉ Eipoloha꞉ma꞉ pa꞉ta꞉ alota꞉ Naka꞉ wanda꞉ta꞉ Sa꞉tai pi paa na lapeke. Ame do kini peata꞉ Seta lapeke. 16 I̱ma꞉ta꞉ ipiki epeao make ipiki pa꞉ta꞉ yama꞉ naka꞉ weki kulueke. I̱ma꞉ta꞉ ipiki epeao make ipikita꞉ mandane tutuna꞉ inkiki halieke. Kutupa ipika꞉ monduma꞉ monduma꞉ pilia꞉ wekiwandikina꞉ wekiwandiki tukiki pa꞉ta꞉ta꞉ kinimanu halimikie.

17 Koto leeke Eipoloha꞉ma꞉ta꞉ you panda꞉puniao ipika꞉ leke popeleketa꞉ oni yu wataena꞉ leekepate ipika꞉ honema꞉ta꞉ halima꞉ ipikita꞉ 100 bapi ya꞉na꞉ kone weki mendia꞉peke ya꞉la꞉pe laa kutupa Setata꞉ 90 bapina꞉ weki mendia꞉peke ya꞉la꞉pe laa ipika꞉ honema꞉ kone ki teekeme. 18 Kutupa ipikana꞉ma꞉ Koda꞉ pa꞉ta꞉ lota꞉ pitolo alota꞉ Pa ekipeke Isima꞉eloma꞉ yaka anketeke na mina꞉ alepe leekeme.

19 Pate Koda꞉ma꞉ alota꞉ Dia꞉me. Naka꞉ wanda꞉ Setama꞉ naka꞉ weki mendiaeya꞉ka꞉na꞉ta꞉ ipika꞉ bikita꞉ Aisa꞉ke lelipikie. I̱ma꞉ta꞉ ipiki make ipika꞉ monduma꞉ monduma꞉ pilia꞉ wekiwandikina꞉ wekiwandiki ame̱le̱ make hoto paeyao yaka pi la꞉ witoloeki pa wia halumeke. Koto pi la꞉ witolo ekita꞉ ota꞉ na paeke pa u halo pa꞉la꞉ekie. 20 I̱ma꞉ta꞉ mo nakana꞉ma꞉ Isima꞉elona꞉ honke leeki opua꞉me. Koto ekina꞉ I̱ma꞉ta꞉ ipiki epeaota꞉ wekiwandiki wopu halaa ipika꞉ monduma꞉ monduma꞉ pilia꞉ wekiwandikina꞉ wekiwandiki make wopu halueke. Ipikita꞉ 12 you haliweki tonuna꞉ ateke haota꞉ kutupa ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ tutu tieke hawalueke. 21 Pate I̱ma꞉ta꞉ naka꞉ weki Aisa꞉ke yaapo yaka pi la꞉ witoloeki miniki halueke. Ipikita꞉ do homeke natena꞉ kone mo bapina꞉ Setama꞉ mendilieke leekeme. 22 Kutupa Koda꞉ ipiki Eipoloha꞉ma꞉ yaapo pi lo paeyaota꞉ ipiki mina꞉pa꞉lao peekeme.

23 Koto homeke natena꞉ kone Eipoloha꞉ma꞉ma꞉ Koda꞉na꞉ pi opuata꞉ ipika꞉ weki Isima꞉elo make mo ipika꞉ da pa꞉ta꞉ haemeke haliwekimanu make apa꞉tao mo ipika꞉ da kenke pa꞉ta꞉ haemeke pa hameke e pokaemeke wanda꞉halina꞉ eiyeke tonu make mo hambeeke haliweki paeyao siki make sekemesaisi hau peayekeme. 24 Eipoloha꞉ma꞉ ipikita꞉ 99 bapina꞉ sekemesaisi hau piekeme. 25 Kutupa ipika꞉ weki Isima꞉elota꞉ 13 bapina꞉ piekeme. 26 Ipilikita꞉ mo homeke natena꞉ sekemesaisi hau pipikime. 27 Kutupa ipika꞉ pa hameke e pokaemeke haliweki make mandakena꞉ pimikime.