‏ Acts 13

Earua Tabuna Paulo eo Banaba i eogahaidi.

1Ekalesia Anetioka eai peroveta headi eo tauheaheata hinage; doha Banaba, eo Simeona esana esau Nigeru, eo Lukaio Kurene tauna, eo Manaena, Heroda tetarake ena numa eai se miaesega, eo Saulo hinage. 2Isi Guiau se awaabini, eo se aiai‐dabu arinai Earua Tabuna i ene, “Banaba eo Saulo au goraidi paisoa arinai ea eogaidi wa abo se paisoai.”

Paulo ena misionari lauwasina bagubagunana.

3Isi se aiaiudi eo se uura, nimadi se saosaei isi potadi eai, abo se hetamaridi se lau.

4Isi taudi labui Earua Tabuna i hetamaridio, se dobi Selukia, nei eai abo se geru se lau Kuperu eai. 5Isi Salami eai se lage, Eaubada ena riba se lauguguiaei Iudea edi sunago alodi eai: Ioane hinage taudi labui i heaeaiedi.

Satani bena i guduguduidi.

6Isi bonabonarua wa se eona se lau se lulage Papo eai arinai tabusima esau se lobai, ia peroveta borabora, Iudea tauna esana ede Ba‐Iesu. 7Ia wasawasa gavana esana Serio Paulo, tausonoga, arinai i miamia, ia Banaba eo Saulo i eogaidi i henua bena Eaubada ena riba abo i ataiei. 8Elima, tautabutabusima wa (ia esana heaheasonina ede) i ribasuuidi arinai bena gavana ena sunuma wa i riba hetomatoma. 9Arinai abo Saulo (esana hinage se torebui Paulo) Earua Tabuna i monau, i itadidini, 10i ene, “Oa tauboraborasom, baaea gamagamagari u monau boriboriri, oa diabolo natuna, laulau‐dudurai gamagaridi u hewaiunuedi, Guiau ena laulau‐dudurai oa u hegegewaridi, nige u lautom wa? 11Arinai u ita, Guiau nimana potam eai ie tore, oa matam sora abo se gibu, mahana taba nige u ita i lau e, huiana sora.” Ma esega gau eo masigiri i hearo; i heoheodamumuliei bena headi se abinimaei abo se woeai se laei. 12Gavana wa wau laulau ie ita, arinai abo i awamamohoi Guiau ena riba i nooei.

13Paulo edi pele Papo se laugabaei, abo se lage Perega Pamepulia tehana eai: Ioane i laugabaedi ie uio Ierusalema eai. 14Isi abo Perega se laugabaei, se lage Anetioka Pisidia tehana eai, sabati esau se lau sunago alona eai se bawabigabiga. 15Laugagaeo eo peroveta edi buka se hasiri lautom, sunago tanuagadi headi se hetamaridi se lau aridi eai si ene, “Tatao e, eo ema tataoyao e, ena riba headidiri esau au nuatui tatao enadi, au ribaei aridi eai.” 16Arinai abo Paulo i toro, i nimaoiedi, i ene,

“Isaraela tataomiu e, omi Eaubada matausina taumatausi, au ataiei komakomani. 17Teina Isaraela tataodi edi Eaubada tamadayao i abi‐hinehineridi; nei huiana ne Aigupito eai se mia doha laolaoma tataodi, ia i hedebasaedi eo i woeaidi i laedi murimuri eai ia nimana gigiborina eai. 18Borimai tatao‐labui‐se‐mate ia barabara eai i bobodiedi. 19Kanana eai eanua haligigi‐labui i hebaaeaheohidi, edi eanua kelero eai abo i soi enadi. 20Abotai abo borimai handere‐hasi eo tatao‐labui‐se‐mate‐saudoudoi tau‐hedudurai i mosedi i lau e Samuela peroveta huiana eai. 21Isi se henua bena edi wasawasa se hetoro: arinai Eaubada Saulo Kiso natuna abo i mosei aridi eai, tau wa Beniamina bogana, i lau e ena borimai tatao‐labui‐se‐mate. 22Eaubada ia i abihaiuioi na Davida abo i hetoro isi edi wasawasa eai ie lau; ia arinai hinage ie riba, i ene, Davida, Iese natuna, ea italobai ia nuagu i lauei ede; eau egu nuatu gamagaridi ta ia abo i abiwataidi. 23Doha i ribahesunumadio, tau ta tumanayao aridi eai, Eaubada esau abo i hetoro Isaraela aridi eai Tauabihemauridi, ia ede Iesu. 24Ia sora nige i laoma, Ioane Isaraela gamagaridi henuabui bapatisona i guguiabagunaidio. 25Ioane ana paisoa i abiheohi, abo i ene, ‘Omi au ene eau eai? Eau nige ia. Na esau murigu eai i laoma ia aena umna bena ea eairi, nige ea lolo.’

26“Tatao e, eo egu tataoyao e, boga Aberahama nanatunayao, Eaubada matausina tau‐matausi teina mauri ribana ta se hetamariawa omi enamiu. 27Isi Ierusalema taumiaidi, eo adi tanuagao hinage, ia nige se nuatui, eo peroveta gamagaridi ribadi sabati gamagaridi se hasiridi nige se nuatuidi, arinai ede Iesu se hegiru, ribadi we se hemamohoi ede. 28Isi ia ana matapaana nige se lobai, edi nuatu mo Pilato arinai ia bena se unui. 29Riba gamagamagari se uri nonohaidi wa isi se hemamohoiedi, arinai abo oeagi ewana eai se taruhi dobeyama, bousa alona eai se tore. 30Ia mate eai Eaubada i hetorouioiama. 31Isi maenayao Galilaia eai se saema Ierusalema, asubena gamagamagari ia se itaitai eo isi tatao enadi tau‐ribahemasaraha. 32Kode wasana ai ribahemasaraha omi arimiu eai, doha tamadayao aridi eai se riba hesunumaedio wa, 33Eaubada nei ribana i hemamohoiyama ita nanatudiyao arida eai, doha Iesu i hetorouioi; doha hinage se uriyao Buka Vana peina helabuiana eai, si ene, ‘Oa Natugu ede, teina asubena eai ta ea awatamaem’ (Psa. 2.7). 34Ia i mateo, na i hetorouioi, taba nige i posauio, ina doha ena ribariba, i ene, ‘Davida ena aba‐helolodaoina abo ea leawa enamiu.’ (Is. 53.3) 35Arinai hinage Vana esau eai, i ene, ‘Oaem Hetabu Tauna u nuanuaiei ia taba nige i posa’ (Psa. 16.10). 36Paana ede Davida, ana isi i saguidi Eaubada ena nuatu debana eai, ia abo i tubahai, se tore‐esagaidi ma tamanayao, ia abo hinage ie posa: 37na ia, Eaubada i hetorouioi wa, nige i posa. 38Tatao e, eo egu tataoyao e, omi abo au ita, wau tau wa debana eai baaea ribagigirina se guguiaimiu: 39ia debana eai hinage tauataiena gamagamagari se dudurai ginauri gamagamagari aridi eai doha nige au dudurai Mose ena laugagaeo debadi eai. 40Arinai au itakomakomani ata meta peroveta se ribaeyao wa au hearo; i ene, 41‘Iei, omi tauhalanuinui, abo au noo, eo au tatagorigori: emi asubenadi eai paisoana ea paisoa, ena tau esau paisoa wa i riba hasahasaimiu taba nige au nuatui.’” 42Iudea tataodi sunago eai se pesao, abo Murimuri‐tataodi headi se awanorini si ene, “Sabati esau matada eai bena ina riba ta u ribauioidi.” 43Isi tauoigogo se pesagorigori Iudea tataodi eo Eaubada taunanabuena headi se hemala Iudea, isi Paulo eo Banaba se lauwataidi: se heribadi, eo se headidiridi, isi Eaubada ena ainauia eai abo se lauesegai. 44Asubena sabati matadi eai wa eanua tataodi gamagaridi se oigogo Eaubada ena riba bena se ataatai. 45Iudea tataodi moutuadi we se itadi isi se aiaromagigiriedi, Paulo ena riba se hetataguduguduidi, se haiawayagara eo se arina baaea hinage. 46Paulo eo Banaba abo se riba‐adiadidiri, si ene, “I lolo Eaubada ena riba ai heribabagunaemiuo: na omi au otaotaeyao, omibom hinage au ene mauri nige nosina taba nige au abi, arinai ina ai sinibui Murimuri‐tataodi aridi eai 47Mamohoi Guiau i hetaladuimai, doha i ene, ‘Ea torem ta, Etene tau‐hemaradi eai abo u lau, oa edi mauri paana eai abo u lau, i lau e, tanoubu sigasigana eai’ (Isa. 49.6). 48Teina riba ta Murimuri‐tataodi se ataiei abo se kode, Guiau ena riba se hatoei: isi headi mauri nige nosina eai se nuatunonohaidi, isi ede se awamamohoi. 49Guiau ena riba se wasaduaiei dimo gamagamagari eai ne. 50Na Iudea tataodi, sinesinebadadi eo Eaubada taunanabuena sisinedi, eo eanua tanuagadi hinage se heasiwolewoledi isi Paulo eo Banaba se ouyalayalaedi, isi edi tupo eai se aiduiedi. 51Isi aedi geregeredi se oiluiluidi edi heiheinoi, abo se lage Ikonio eai. 52Tau ataiena mo nuadi se kode ariri, eo Earua Tabuna hinage se monau.