Act 18 | SWP | STEP | Teina ginauri ta muridi eai Paulo Atenai i laugabaei, i laoma Korinito eai.

‏ Acts 18

Paulo Korinito eai.

1 Teina ginauri ta muridi eai Paulo Atenai i laugabaei, i laoma Korinito eai. 2 Ia Iudea tauna esau maena se hailobai esana ede Akula, Ponoto eai se labasi, ia ma monena esana ede Peresila, Italia eai se laolaoma (paana ede Kalaudia Iudea tataodi gamagamagari i lauhesomdi, isi Roma se laugabaei), Paulo ie lau i itadi; 3 ia eo isi edi nima‐paisoa esega, arinai i miamia aridi eai eo se paisoa, adi paisoa wa numa‐lulu tauginaginauri, 4 Sabati gamagamagari sunago alona eai i lauheataidi, Iudea tataodi eo Heleni tataodi i nuaoihetaiiridi.

Ekalesia se hetubu Korinito eai.

5 Abotai Sila eo Timoteo Makedonia eai se lagema, Paulo lauguguia arinai ie mode Iudea tataodi aridi eai i ribaribahemasaraha, ede Keriso iaede Iesu. 6 Isi se riba gudugudui eo se arina baaeai, arinai ana lulu i oiluiluidi i ribalau aridi eai i ene, “Omibom mo osinamiu potamiu eai! Eau taba nige agu giru. Ina abo ea lau Murimuri‐tataodi aridi eai.” 7 To nei eai i laugabaedi, i awasae tau esau ena numa eai, tau wa esana Tito Iuseto, Eaubada tauaihelahuina esau, ia ena numa eo sunago se haitore‐siribebe. 8 Kirisipo, sunago tanuagana, abo Guiau i nuatuwatai, maenayao ena numa tataodi gamagaridi; Korinito tataodi moutuana Paulo ena riba se ataiei Guiau se nuatuwatai hinage, eo se bapatiso. 9 Maiona esau Guiau Paulo i he‐enosuai, i ribalau ia arinai, i ene, “Tabu u matausi, u riba, tabu u monomonou, 10 eau maidam, taba nige tau esau i abilaowa, i hebaaeam: paana ina eanua eai ta egu tatao se gamagari.” 11 Ia nei eai ie mia borimai esega, eo nawalai haligigi‐esega Eaubada ena riba i laulauheatai isi boeadi eai.

Galio ena nuatomatoma.

12 Na huiana ne Galio se hetoro Akaia tehana eai i hemala gavana, Iudea tataodi nuadi esega bena Paulo se toai, ia abo se laei tauhedudurai matadi eai, 13 si ene, “Tau ta tatao i nuaoihetaiiridi, bena Eaubada se aihelahui nige doha ema laugagaeo eai ribana.” 14 Paulo bena awana i dabari, Galio i ribalau Iudea tataodi aridi eai, i ene, “Iudea tataomiu e, taba laulau ponori, e laugagaeo utusina lailaina esau, matapaana gonoana abo emi riba ea ataiei; 15 na ina emi laugagaeo ribadi eo esadi au haihesabaedi, besi, omibom au eooi; eau taba nige ina ginauri ta ea hedudurai.” 16 Abahedudurai abababawana eai ne i aiduiedi. 17 Isi gamagaridi Sosene, sunago tanuagana wa, se toai, aba‐hedudurai numana awamatana eai se pidiri. Na Galio laulau ta nuana nige se lauedi.

Roma 6.14. tauurina, eo 2 Kor. 3.7-14; eo Gala. 3.23-28 Iudea edi laugagaeo esau i abiwatai.

18 Murina eai Paulo i miatahitahi aridi eai, abotai tauataiena i lauaioniedi, ie geru ie lau Suria, Peresila eo Akula ia maenayao: Kenekerea eai i uru’om, paana ede ia i aigora. 19 Epeso eai se lage metai i laugabaedi: iabom i awasae sunago alona eai Iudea tataodi maenayao se ribariba. 20 Isi ia se awanori bena i miatahitahi aridi eai, nige nuana mia; 21 i lauaioniedi, i ene, “Eau ea lau Iesusalema eai, mataasi i hanahanauma ta taba ea ai: ena Eaubada nuana abotai hari huia abo hinage ea uioma arimiu eai. Ia Epeso abo i gerugabaei.

22 Kaisaria eai ie pesa, i awasae ekalesia i lautoiedi, abo i dobi Anetioka eai. 23 Huia headi nei eai ie mia, e eawalana ia abo Galatia, eo Perukia i taudadaidi, tauataataiena gamagaridi i headidiridi.

Apolo Epeso eai.

24 Iudea tauna esau esana Apolo, ia Alesania eai se labasi, i laoma Epeso eai. Ia manana i amna, ena riba se lolo eo uriuri tabudi abidi ie ata ariri. 25 Na tau ta Guiauna ena laulau se heatayao; earuana hinage i gigibori ia Guiauna ena ginauri i heata headidiridi, Ioane mo ena bapatiso ribana i ataiei. 26 Ia sunago alona eai i riba‐adiadidiri: Peresila eo Akula ia se ataiei, se woeai maedi, Eaubada ena dobila se heitakomakomanini. 27 Ia bena i geru i lau Akaia eai, ena tataoyao se uriuri tauataataiena aridi eai, bena ia se labai. Nei eai ie lage isi wa ainauia debana eai tauataiwataina abo i saguaririedi, 28 paana matadi eai Iudea tataodi i nuaoihetaiiridi, ena riba se gigibori, uriuri tabudi eai tatao i heatadi, Keriso ia Iesu ede.