Exodus 2
Mose Labasina
1Levi numana tauna esau monena ie hai ia Levi natuna sine esau. 2Sine wa i boga’o abo natuna tau i labasi, to huiana wa ie ita ana ao i lolo ariri, arinai i toreamui nawarai haiona. 3I lau e nige gonoana bena i toreamuida’oiei to bosa esau i haturi leiaha arinai, abo tar arinai ie pati. Murina eai merumeru wa alona eai i he’eno, eo ie tore saga lagaudi boeadi eai, saga hasarina eai. 4Abo louna hanahanauna eai i totoro bena abina i ata abo saha i tubu arinai. 5Nige baeaona Parao natuna sine i dobima saga eai bena abo i aiduidui, eo ena heaheari sisinedi saga laopana eai se tautausi; bosa wa ie ita saga lagaudi boeadi eai, to ena heaheari sinena i hetamari ie abi 6Huiana wa ie so’e kaimou wa ie ita, to i doudou, arinai i nuatoatoaei, i ene, “Ina Heberu esau natuna!” 7Abo louna i ribalau Parao natuna sine arinai, enaba, “Taba ea lau Heberu sinena hesuhesusuna esau ea eogaiyama. Abo kaimou i hesusu oa enam?” 8Parao natuna i ene, “U lau,” to siu wa ie lau merumeru sinana i eogai. 9Abo Parao natuna sine i ribalau arinai i ene, “Merumeru ta u laei u hesusu eau enagu, abo maisana ea leawa.” To sine wa merumeru ie abi i hesusu. 10Merumeru hinage i tubusae, abo i leama Parao natuna sine arinai eo i hemala ia natuna. Esana hinage ie tore Mose, i ene, “Paana goila eai ea abisini.”Mose ena Dago Midiani eai
11Asubena esau, huiana wa Mose i lailaio ie pesa ie lau ena tataoyao aridi eai, eo adi bahebahe poroporohedi i itadi; abo Aigupito tauna esau ie ita Heberu tauna, ana boga tahunuana esau, i pidili. 12I itasae, i itadobi, nige doga esau ie ita, arinai Aigupito tauna i eatu’unui, eo gelegele eai i toreamui. 13Asubena helabuina eai ie pesa ie lau, abo Heberu tataodi labui i itadi se haipoipoi, to i ribalau aisega tau i ponori wa arinai, i ene, “Paana saha em doga u laulubini?” 14Ia i heuio i ene, “Eai i heterom ama tanuaga, e tau hedudulaimai? Em nuatu bena u unuigu doha Aigupito tauna ue unui, wa?” Abo Mose i matausi, eo i nuanuatu, “Omihede ginauri wa abina se ata’o.” 15Huiana wa Parao wasana i ataiei i aipate bena Mose i unui.Na Mose Parao i dagogabaei abo Midiani eanuana eai ie mia. Abo goila huana gegesina eai i bawadobi. 16Na Midiani edi kohena nanatunayao sisine haligigi‐labui se laoma se goila oi, eo aba‐nom se hemonaudi bena tamadi ena mamoe eawoidi goila se henomdi. 17Mamoe tauitawataidi se laoma se aihenauidi, na Mose i toro i saguidi, eo edi mamoe eawoidi goila i henomdi. 18Huiana wa se lage tamadi Reuela arinai i ene, “Edohana to wau au heurama?” 19Si ene, “Aigupito tauna esau mamoe tauitawataidi nimadi eai i lebohaimai, abo hinage goila ie oi, eo mamoe eawoina i henom.” 20I ribalau nanatunayao hasahasaradi aridi ea i ene, “Ia haedi eai? Paana saha au laugabaei? Au eogaiyama abo falawa i ai.” 21Abo Mose nuana ie taru bena tau wa arinai i mia: abo natuna Sipora i mosei Mose arinai. 22Natuna tau i labasi, abo esana ie tore Geresoma, paana enaba, “Eau laolaoma tauna eanua udoi eai.”
23Borimai gamagari se lao’o na Aigupito ena wasawasa i mate’o, eo Isaraela tataodi se dou ariri edi auau debadi eai, eo se eoga lailai bena tausaguidi, abo edi lepalepa edi auau wa debadi eai se lage Eaubada arinai. 24Abo Eaubada edi lepalepa i ataiei, eo Eaubada ena ribahesunuma i henuaisini, Aberahama eo Isaako eo Iakobo aridi eai. 25Abo Eaubada Isaraela tataodi i itadi, eo hinage i nuanuatuidi.
Copyright information for
SWP