Gen 20 | SWP | STEP | Nei eai Aberahama i torohai i lauwasi ie lau Negeba tanona eai, Kadesa eo Sura duaduaridi eai ie mia; eo Gerara eai hinage ie mia.

‏ Genesis 20

Aberahama eo Abimeleko

1 Nei eai Aberahama i torohai i lauwasi ie lau Negeba tanona eai, Kadesa eo Sura duaduaridi eai ie mia; eo Gerara eai hinage ie mia. 2 Aberahama abo monena Saraha wa i ribaei i ene, “Ia lougu ede.” Arinai Abimeleko, Gerara edi wasawasa, i lauhetamari eo Saraha ie abi. 3 Na Eaubada i laoma Abimeleko arinai, enosuai eai, maiona eai, i ribalau arinai, i ene, “U ita, oa taumate, sine ue abi wa debana eai, paana ia tau esau monena.” 4 Abimeleko wa sora nige i lau sine wa arinai; arinai i ene; “Guiau e, tatao nige adi giru abo u unuidi? 5 Ia i heribagu, e nige’e, i ene, ‘Lougu ina.’ Sine wa hinage i ene, ‘Tau ta lougu.’ Ma nua‐duduraigu eai, eo ma nima‐aagu eai laulau ta ea abi.” 6 Abo Eaubada enosuai eai i ribalau arinai i ene, “Hedeona, ea nuatuiyao oa ma nua‐duduraim eai laulau ta ue abi, eo eau ede ea abi nuahim to nige baaea u ginauri arigu eai, arinai nige ea eari ia bena u abilau arinai. 7 Besi, tau wa monena u moseuioi; paana ia peroweta, ia abo enam i lau‐uura arinai oa abo u mauri. Na ena nige u moseuioi, u nuatui mamohoi ariri abo u mate, oa maem tataoyao gamagaridi.”

8 Abimeleko maratomtom eai i toro heuheula, ena heaheari tataodi gamagaridi i eogaidi, ginauri gamagaridi ta i heribadi; ena tatao wa abo se matausi ariri. 9 Abimeleko abo Aberahama i eogai, i ribalau arinai i ene, “U sahaimai ina? Eo eau saha arinai ea hebaaeam arinai baaea lailai u leama eau eo egu basileia potamai eai? Ginauri nige i lolo se ginauridi, arigu eai u abidi ede.” 10 Abimeleko Aberahama abo i heriba i ene, “Oa em nuatu saha, na laulau ta u hetubu?” 11 Aberahama i ene, “Ea ginauri paana egu nuatu ea ene, Eaubada matausina ina tupo maudoina eai ta nige’e, arinai abo se unuigu monegu debana eai. 12 Hinage mamohoi ia lougu ede, tamagu natuna esau, na nige sinagu natuna, to i hemala eau monegu. 13 Huiana ne Eaubada i hetamarigu bena tamagu ena numa ea laugabaei ea elielitatausi, ea ribalau sine arinai ea ene, ‘Teina em abataubigaigu ede, haedi ta lage abo u ribaegu u ene, ia lougu.’” 14 Abimeleko abo mamoe eo bulumakau i abidi, eo heaheari tauauaudi eo sisinedi, i mosedi Aberahama arinai, eo monena Saraha i moseuioi arinai. 15 Abimeleko abo i ene, “U ita, egu tano ede matam eai, aisega dimo u henua arinai u mia.” 16 Saraha arinai i ene, “U ita, loum wa moni silver tausani esega ea mosei, em taumaeamaea maisana isi gamagaridi maem wa matadi eai, eo tatao gamagaridi matadi eai oa se heduduraim’o.” 17 Aberahama i lau‐uura Eaubada arinai; Eaubada abo Abimeleko i helolouioi, monena hinage eo ena heaheari sisinedi, isi abotai merumeru se labasidi. 18 Paana GUIAU Abimeleko ena numa taumia sisinedi gamagaridi bogadi i he’agaridi, Saraha, Aberahama monena wa debana eai.