‏ Mark 1

Ioane Bapatiso ana paisoa

Mt. 3.11; Lk. 3.1-16; Io. 1.6-8, 19-27

1Iesu Keriso, Eaubada Natuna, ena evanelia ina ie tubu.

2Doha peroveta edi uriuri eai si ene,

“Egu tauwasa ea hetamarimugaiem,
oa em eda i sepanonohai (Mal. 3.1);
3Esau arinana barabara eai i paipainawatai, i ene,
Guiau ena eda au sepanonohai,
eo ena eda au hedudurai” (Isa. 40.3).
4Ioane barabara eai i hebahebapatiso, eo i guguia teina bapatiso eai ta bena nuadi se buidi, edi baaea abo se ribagigiridi. 5Iudea se ohihai, eo isi hinage Ierusalema taumiaina, se torohai se tupagogoma ia arinai, ia abo i hebapatisogogoidi Ioridana sagana eai, edi baaea abo se ribahemasarahadi. 6Ioane ana lulu kamela wiana: ena nogi sarai opina, lokasi eo amoamo i aidi. 7Ia i lauguguia, i ene, “Esau murigu eai i laoma i saetawatawaigu, eau nige ea lolo ea durudobi ia aena umna mainana ea eairi. 8Eau goila eai ea hebapatisoimiu ta, na ia Earua Tabuna arinai abo i hebapatisoimiu.”

Iesu ena bapatiso

Mt. 3.13-17; Lk. 3.21, 22

9Nei asubenana ne Iesu Nasareta Galilaia eai i laoma Ioane Ioridana eai i hebapatisoi. 10Ia goila eai ma‐esega i gaeosaema, galewa ie ita i taigari, Earua ana ao doha bunebune i pesadobima ia potana eai. 11Arina esau galewa eai i laoma, i ene, “Oa Natuyogoyogoigu, nuagu u helolo ariri” (Ps. 2, Isa. 62).

Iesu ena noho

Mt. 4.1-11; Lk. 4.1-13

12Abotai Earua Iesu i woeai i laei barabara eai. 13Asubena tatao‐labui‐si‐mate barabara eai Satani ia i nohoi, sarai aiailetadi aridi eai ie mia; aneru ia se bobodiei.

Galilaia eai paisoa bagubagunana

Mt. 4.12-17; Lk. 4.14

14Ioane numa masigiri eai se tutuguduiyao abotai Iesu Galilaia eai i laoma Eaubada ena basileia wasa lolona i lauguguiaei. 15I ene, “Huia wa i lagemao, Eaubada ena basileia i hanahanaumao; nuamiu au buidi, evanelia ta au awamamohoiei.”

Petero eo Anederea adi eoga

Mt. 4.18-22; Lk. 4.10-11; Io. 1.35-42

16Ia Galilaia gabogabona salagomgomna eai i laulau Simona ma ena tau Anederea edi hiana se galaei gabogabo eai: isi taudi labui tauyamayama. 17Iesu i heribalaedi i ene, “Au hemuriwataiguma, abo au hemala tatao tauyamayamaidi.” 18Ma‐esega se torohai edi hiana se laugabaedi ia se hemuriwatai. 19Ia i bagunalau Sebedaio nanatunayao Iamesi ma ena tau Ioane i itadi, isi hinage waga eai edi hiana se eome. 20Ma‐esega i eogalaedi: isi tamadi Sebedaio ma ena tauhaiwawari waga eai se pesagabaedi, Iesu murina eai se lau.

Iesu Kaperenauma eai demoni i aiduiedi

Lk. 4.31-37

21Isi Kaperenauma eai se lage: asubena Sabati eai i awasae sunago alona eai, i lauheata. 22Ena lauheata se nooei: i ribahasahasaidi ma gigiborina, nige doha tauuriuri tataodi. 23Sunago wa alona eai tau esau earua biibii i lui, i eabayaba. 24I ene, “U otaotaimai, oa saha arimai eai bena u abi? Iesu Nasareta e? Oa u laoma bena u hetatagorigorimai wa? Ea itam, oa Eaubada ena Hetabu Tauna ede.” 25Iesu ia i siooei, i ene, “U monou, u lulagema.” 26Earua biibiina ia i basaaraaratei, eo i eabayaba lailai, i lulagema. 27Isi gamagaridi abo se noo, se heunaboisahaei, si ene, “Teina ginauri ta saha? Teina lauheata harihariuna ta saha? Ena gigibori eai earua biibiidi i ribahesomdi abo se hebigawatai.” 28Nige baeaona ia wasana ie lau Galilaia i hetaiiriyama.

Iesu Simona bosiana sine i hemauri

Mt. 8.14-15; Lk. 4.38-39

29Sunago eai se pesama, se awasae Simona ma ena tau Anederea edi numa eai, Iamesi eo Ioane maediyao. 30Simona bosiana sine ie ota, tauna se gigibori ariri, arinai Iesu se heribalaei. 31I laoma, i abilau ia nimana eai i abihetoro; arinai gigiborina wa i lautom, sine wa abo i haitalaidi.

Demoni se aiduiedi: gamagaridi adi iwala i helautomdi

Mt. 8.16-17; Lk. 4.40-41

32Maimailahi eai, mahana i duio, tauasiasiebo gamagaridi se woeaidima ia arinai, eo isi demoni se luidi hinage. 33Eanua tataodi gamagaridi se oigogoma dobila eai. 34Tauasiasiebo udoi, udoi, gamagaridi i hemauridi, demoni hinage gamagaridi i aiduiedi, demoni wa nige arinadi paana ia se nuatuiyao.

Iesu i uura: lauguguia laulau Galilaia eai

Lk. 4.42-44

35Mara sora nige i iuiari Iesu i torohai ie pesa, ie lau malatupama eai, nei eai i lau‐uura. 36Simona eo isi maenayao wa ia murina eai se lau. 37Ia se lobai se ribalau ia arinai, si ene, “Tatao gamagaridi se eooim.” 38Ie ribalau aridi eai, i ene, “Ta lau eanua headi hanahanau eai bena hinage nei eai ea lauguguia: hesabana ede ina ea laoma ta.” 39Galilaia se hetaiiri edi sunago alodi eai i lauguguia, demoni hinage i aiduiedi.

Taulepera esau i uruosi

Mt. 8.2-4; Lk. 5.12-14

40Lepera tauna esau i laoma Iesu arinai ia turina ie bono ia nuanuana eai, i awanori gadogadora, i ene, “Taba u henua, oa heaagu abina u ata.” 41Iesu ia i nuatoatoaei, nimana i helele, i abiitalaei, ie ribalau ia arinai, i ene, “Ea henua, oa abo u aa.” 42Ie riba ina doha ma‐esega ana lepera i uruosi, na i aao. 43Iesu ia i ribahasahasai, abo i hetamari ie lau. 44I ribalau arinai, i ene, “Tabu tau esau u heriba; u lau oabom u hemasaraham kohena tauna arinai, oa se heaam wa am nima abia u abi doha Mose i lauhesomda, laulau ede meta abo se ita. 45Na, ia mo ie pesa i ribahemasaraha, wasana i duai i hetadada, arinai Iesu nige i laumasaraha eanua eai, ia simalaleilei eai mo ie mia, isi dimo gamagaridi eai se laoma ia arinai.”