‏ Matthew 22

Parabole: tawasora mataasina

Lk. 14.16-24

1Iesu arinadi i heuio i ribaparaboleuioidi i ene: 2“Galewa basileiana doha ede wasawasa esau ia natuna abo i hetawasora. 3Ena heaheari tataodi i hetamaridi tatao i ribaedi se eogaidi bena se laoma tawasora eai: se awayagara, nige se laoma. 4Ena heaheari tataodi headi i hetamariuioidi, i ene, ‘Isi se ribaedi wa au heribadi, au ene, Agu aiai ea abinonohaidi: egu bulumakau, eo egu suisui saraidi se unuidio, ginauri gamagaridi se abinonohaidio: au laoma tawasora arinai.’ 5Isi se alaliuliua edi dobila udoidi mo se lauwataidi esau i lau ena oea, esau i lau ena sitoa. 6Tatao hisahisawaidi se mia, ena heaheari tataodi se toaidi se hebaaeaaririedi, eo se unuhematedi. 7Wasawasa wa, wasana i ataiei, abo i ouyalayala: tauiala i hetamaridi, tauaiunu wa se unuidi, edi eanua hinage se gabugorigori. 8Abotai abo i ribalau ena heaheari tataodi aridi eai i ene, ‘Tawasora se abinonohaiyao, isi ea ribaedi wa nige se lolo. 9Au lau dobila lailaidi eai, isi gamagaridi au lobaidi, au heribadi abo se laoma tawasora eai.’ 10Heaheari wa abo se lau dobila lailaidi eai, isi gamagaridi se lobaidi se heoigogoidima, headi se baaea, headi se lolo: tawasora taumanana se gamagari.

11“Wasawasa wa i awasae numa alona eai taumana bena i itadi, na tau esau nei eai ie ita, ena hetahetawasora luluna wa nige i lui: 12Ie ribalau ia arinai i ene, ‘Ehagu e, ue saha u laoma inai hetahetawasora luluna nige u lui?’ Ia nige arinana. 13Wasawasa abo i ribalau heaheari wa aridi eai, i ene, ‘Nimana eo aena au auauidi, au laehesuara, au gabadobei masigiri boeana eai: nei eai abo se doudou, eo moadi se taburueahisidi.’ 14Na tatao gamagari se eogaidi, hisahisawaidi mo se abi hilehileidi.”

Herodiana tataodi edi riba Iesu i heuio.

Mk. 12.13-17; Lk. 20.20-26

15Parisea tataodi abo se oioiriba edoha edi abiabina ena riba wa abo se hepiripiri. 16Edi heaheatayao, eo Herodiana tataodi headi se hetamaridi ia arinai si ene, “Tanuagamai e, ai itayao oa u dudurai mo, eo Eaubada ena dobila mamohoina u lauheataei, nige tau esau hinage u matausiei, paana ede taumonamonaune eo taugogogesagesa mo u nuatuidi gonogonoadi. 17U heribamai, em nuatu saha? Laugagaeo i lolo wa si ene takisi monina se mosei Kaisara, e nige’e wa?” 18Edi baaea Iesu i nuatuiyao i ene, “Aue saha au nohoigu ta, omi tauboraborasom? 19Takisi monina esau hage au heitagu.” Abo denari esega se leama ia arinai. 20Ie ribalau aridi eai i ene, “Eai ana ao ina, eo eai ena uriuri?” 21Ia arinai si ene, “Kaisara enana.” Abo i ribalau aridi eai i ene, “Kaisara ena ginauri au laei Kaisara arinai, eo Eaubada ena ginauri au laei Eaubada arinai.” 22Teina riba ta se ataiei se noonooei, ia se laugabaei se lau edi abalau eai.

Sadukea edi riba Iesu i heuio.

Mk. 12.18-27; Lk. 20.27-40

23Wau asubenana eai wa Sadukea tataodi, isi si ene nige torouiona, se laoma ia arinai se oimuri. 24Si ene, “Tanuagamai e, Mose i ene, ‘Taba tau esau ie mate ia nige nanatunayao, ena tau ia wabuna abo i tawasorai, natuna taba se labasi abo si ene tau mate wa natuna.’ (Du. 25.5). 25Arimai eai tatao haligigi‐labui bogadi esega: taubaguna sine i tawasorai e ie mate, nige natuna, arinai wabuna wa i mosei ena tau ie hai. 26Helabuina hinage doha, eo hehaionana hinage, i lau e taiede hehaligigi‐labuina wabuna wa i tawasorai. 27Murina eai sine hinage ie mate. 28Torouio huiana i lagema sine wa, tataodi haligigi‐labui aitea monena ede? Isi gamagaridi ia se abi.” 29Iesu arinadi i heuio, i ribalau aridi eai i ene, “Au ponori, uriuri nige abidi au ata, eo Eaubada ena gigibori hinage nige abina au ata. 30Torouio huiana eai nige se tawasora, eo nige se hetahetawasoraidi, na isi galewa eai doha Eaubada ena aneru. 31Taumatemate se torouio ribana wa Eaubada i ribalaowa arimiu eai nige au hasiri wa, i ene. 32‘Eau Aberahama ena Eaubada, eo Isaako ena Eaubada, eo Iakobo ena Eaubada (Ex. 3.6)?’ Eaubada, taumatemate nige edi Eaubada, taumaumauri mo edi Eaubada.” 33Moutuana teina se ataiei, ena lauheata se noonooei.

Parisea edi riba Iesu i heuio

Mk. 12.28-31; Lk. 10.25-28

34Parisea abo se ataiei ia Sadukea i ribahetuuridi, edi abaoigogo esega. 35Adi sagu esau, laugagaeo tauna, ia i hesiokamaliua, i ene, 36“Tanuagamai e, laugagaeo ribadi eai, aitea i saesae ariri?” 37Iesu i ribalau ia arinai i ene, “Guiau em Eaubada u gadosisiei ma nuam i ohi, eo ma earuam i ohi, eo ma nuanuatum i ohi (Deut. 6.5). 38Teina laugagaeo ta i baguna, eo i sae ariri. 39Helabuina hinage doha ede. Helem taumia u gadosisiei doha hinage oabom u gadosisiuioim (Lev. 19.18). 40Teina laugagaeo labui ta aridi eai laugagaeo gamagaridi, eo peroveta ribadi se heabasisaedi.”

Iesu Parisea i hesioidi

Mk. 12.35-37; Lk. 20.41-44

41Parisea tataodi ma oigogodi eai na Iesu i oimuridi, 42i ene, “Emi nuatu au ene Keriso eai? Ia eai natuna?” Isi se ribalau ia arinai si ene, “Davida natuna.” 43Ie ribalau aridi eai i ene, “Edoha Davida Earua Tabuna debana eai i awaguiauei, i ene, 44‘Guiau ie ribalau egu Guiau arinai, i ene, Nimatutugu eai u bawa i lau e em waiunuyao se hemala aem adi bou?’ (Psa. 110.1). 45Ena Davida ia i awaguiauei, edohana au ene ia natuna?” 46Nige tau esau heuiona abo abina i ata: eo wau asubena eai i lau e, taba nige esau i hesiouio ia arinai.