‏ Matthew 24

Oliveta guguiana: (1) numa tabuna abo se helopagorigori se ribanonohai

Mk. 13.1-2; Lk. 21.5, 6

1Iesu dubu i laugabaei i lau murimuri eai: ena heaheatayao se laoma ia arinai dubu numadi bena ia se heita. 2Iesu i ribalau isi aridi eai i ene, “Teina ginauri gamagaridi nige au itadi wa? Mamohoi ea ribalaowa arimiu eai, taba nige we’u esau i ota we’u esau potana eai, abo se heboloheohidi.”

Oliveta guguiana: (2) hesio haiona

Mk. 13.3, 4; Lk. 21.7

3Oliveta tupina eai ie bawa ena heaheatayao se lau mahimahihima, si ene, “U heribamai aitea huia eai ina ginauri ta abo se tubu? eo em uioma heiheinoina saha, eo tanoubu ena abalautom heiheinoina saha?”

Oliveta guguiana: (3) teina isi ta ribana

Mk. 13.5, 13; Lk. 21.8-19

4Iesu ie ribalau aridi eai i ene, “Au komakomanimiu, tabu tau esau i boraimiu. 5Gamagaridi abo se lagema eau esagu eai, abo si ene, ‘Eau Keriso ede,’ gamagaridi hinage abo se boraidi. 6Iala wasadi abo au ataiedi, eo iala ribadi hinage: tabu au nuadubu: teina ginauri gamagamagari abo se tubu baguna, e sigasigana sora. 7Basileia esau eo basileia esau se iala, eo basileia esau eo basileia esau se iala (Is. 19.2); eo hari teha, hari teha eai, guriam abo se tubu, eo moniinii abo se hetabutabubu. 8Teina ginauri gamagaridi ta aridi eai nuadubu ie tubu.

9“Omi abo se woealaemiu se henuadubumiu, eo abo se unuhematemiu; hinage basileia gamagaridi eai se ouyalayalaemiu esagu debana eai. 10Nei huiana ne gamagaridi abo se alabesibesi (Is. 8.15), esau esau se haihaimoruuioidi, esau esau se haihaiouyalayalauioidi hinage. 11Peroveta borabora gamagaridi abo se tubu, tatao gamagaridi abo se boraidi. 12Paana baaea wa se gamagari ariri, arinai abo gamagaridi edi gadosisi se gogoma. 13Ia ie dudu mo i lau e sigasigana eai, abo i mauri. 14Teina basileia evaneliana tanoubu abo se lauguguiaheohi, hari tatao, hari tatao gamagaridi se ribahasahasaidi; abotai sigasigana abo i lagema.

Oliveta guguiana: (4) nuadubu baaeana

Mk. 13.14-23

15“Arinai ena nuadubu baaeana wa au ita, doha Daniela peroveta i ribaei wa (Dan. 9.27), dimo tabuna eai i totoro (eai to eai i hasiri abo i nuatui): 16nei huiana ne isi Iudea taumiaina abo se dago oea tupidi eai. 17Ia numa ewana eai ie bawa tabu i pesama ena ginauri i abidi numa eai: 18hinage ia oea eai tabu i uioma ana lulu i abidi. 19Kapore sisine taubogaboga, eo nei asubenana ne sisine nanatudiyao se hemadodi! 20Au uura, bena emi huia dagodago eai ania nige se baaea, hinage asubena sabate nige’e. 21Nei huiana ne nuadubu baaeana, nige baaea esau doha nei tanoubu se hetubu i laoma, i laoma, e teina huia ta, eo i lau e ana huia ana tasi (Dan. 12.1). 22Asubena wa ena nige se hekuudi, taba nige tau esau i mauri, na tatao hilehileidi debadi eai nei asubenana ne abo se hekuudi. 23Ena tau esau i ribalaowa i ene, ‘Keriso ia ede ina, Keriso ia ede nei’; ena riba tabu au ataiwatai. 24Paana Keriso boraboradi abo se torohai, eo peroveta boraboradi hinage, isi heiheinoi eo noo lailaidi abo se hemasarahadi: mamohoi, ena abina se ata tatao hilehileidi wa abo se boraidi. 25Au nuatui, ea heribanonohaimiuo. 26Taba arimiu eai si ene, ‘Ia barabara eai ie mia’; tabu au lau arinai: taba hinage si ene, ‘ia i miayamui biriutusi eai’; riba wa tabu au ataiwatai.

Oliveta guguiana: (5) Wasawasa ena uiouioma ma namanamarina

Mk. 13.24-37; Lk. 21.25-36

27Doha namanamari i silima tupo aruabu eai, i lau e tupo ealasi eai: Tau Natuna ena laolaoma abo hinage doha ede meta. 28Sinare ena abaota eai magesubu lailai abo se tupagogoesegai.

29“Nei huiana ne, nuadubu baaeana murina eai, maesega mahana abo i wahuwahuhuri, eo nawarai hinage taba nige i sina, eo ipora galewa eai abo se beuma, eo galewa gigiboridi abo se moimoiu (Isaia 13.10; 34.4). 30Arinai abo Tau Natuna ia heiheinoina galewa eai abo i masarahama: tanoubu hari boga, hari boga abo se doudou, Tau Natuna abo se ita galewa eada boeadi eai i laolaoma, ma gigiborina eo ma namanamari‐aririna (Dan. 7.13). 31Ia ena aneru abo i hetamaridi, bogigi arinana lailai eai (Isa. 27.13), tatao hilehileidi, enanayao, mana edi abatoama hasi eai, galewa sigana esau i lau e galewa sigana esau eai, abo se heoigogoidima (Deu. 28.64; 30.4).

Parabole: Kuhou

Mk. 13.28, 29; Lk. 21.29-31

32“Omi kuhou parabolena au nuatui: Lagana ma gubugubuna, lugudi i toredi, arinai au nuatui au ene, siwaro huiana i hanahanau. 33Omi hinage doha meta, wau ginauri gamagamagaridi abo au itadi, abo au nuatui, au ene, i hanahanaumao, iaede dobila hasaridi eai. 34Mamohoi ea heribamiu ta, teina isi ta sora taba nige i lautom, teina ginauri gamagaridi se tubunonohai. 35Galewa eo tanoubu abo se lautom, na egu riba taba nige se lautom.

36“Na asubena ne eo awa ne nige tau esau abina i ata, galewa anerudi hinage nige’e, na Tamagu iabom mo. 37Doha Noa asubenana eai wa (Gene. 7), Tau Natuna ena laolaoma abo doha ede. 38Asubenadi wa dibori utuutu sora nige ie tubu, se aiai eo se nomnom, se tawasora eo se hai, i lau e nei asubenana ne Noa i lulau waga eai. 39Nige se nuatui i lau e dibori utuutu i lagema, gamagaridi i ealuhaidi; Tau Natuna hinage ena laolaoma abo doha meta. 40Nei huiana ne tatao labui abo se mia oea eai, esau abo se abihai, eo esau abo se laugabaei. 41Sisine labui edi abagirigiri eai sitona abo se giri: esau abo se abihai, esau abo se laugabaei. 42Au nuatuhetete: awa wa nige au nuatui arinai emi Guiau i laoma. 43Teina au nuatui, ena numa tanuagana tauaiaigirihai ena huia lagema i nuatui, ia i silawahetete, ena numa taba nige se lopagorigori. 44Arinai omi hinage au nuatuhetoanonohai: awa wa nige au nuanuatui arinai Tau Natuna abo i laoma.

45Eai heaheari tauna i lolo, eo i sonoga, ena guiau ia i hetoro ena numa tanuagana, ia nanatunayao aiai huiadi adi i mosedi? 46Heaheari meta ena guiau ena huia lagema abo i lobai ena laulau nei doha, ia nuana i woiwoina. 47Mamohoi ea heribamiu ta, ia abo heaheari wa i hetoro ena gogo gamagamagari tanuagadi eai ie lau. 48Taba heaheari tauna baaeana nuagadona mo i ene, ‘Egu guiau ena laoma i boneawa’. 49Ana sasaguyao abo i laulaulubidi, tatao eauyaure aridi eai hinage i aiai, eo i aiainom; 50heaheari wa ena guiau abo i laoma asubenana wa nige i nuanuatui: hinage awa eai wa nige se ribaei, 51ia abo i talautusihai, i hepatulaei tauborabora tataodi aridi eai: nei dimo eai ne abo se doudou eo moadi se taburuyahisidi.