‏ Matthew 26

Iudea adi tanuaga se oioiriba bena Iesu se unui

Mk. 14.1, 2; Lk. 22.1, 2

1Iesu teina riba gamagaridi ta i riba‐lautom, ie ribalau ena heaheatayao aridi eai, i ene, 2“Au nuatuiyao imaisina abo pasova se mataasiei, eo Tau Natuna se moruhai se hesatauro.”

3Kohena lailaidi, eo tauuriuri tataodi, eo eanua babadadi, se oigogo kohena saesaedaoina ena numa eai, ia esana ede Kaiapa. 4Se oioiriba bena Iesu se toaliuliuai, ia abo se unui. 5Na si ene, “Tabu mataasi eai ta, ata tatao se hetalagegagega.”

Maria Betania Iesu i heyausi

Mk. 14.3-9; Io. 12.1-8

6Iesu Betania eai ie mia, Simona, lepera tauna, ena numa eai i bawa bigabiga i aiai, 7sine esau i laoma ia arinai alabata lasina i abiama, eausi alona eai, maisana i lai ariri, i hegoilaei ia boruboruna eai. 8Ena heaheatayao se ita, se siayau, si ene, “Sanapu sahasaha ina i gaba gaibui ta? 9Teina eausi ta taba se uneunei maisana lailai se abi, eo se mosei gogogesagesa tataodi aridi eai.” 10Iesu i ataiei abo i ribalau aridi eai, i ene, “Sine ta sahaina au hemode? Laulau lolona i laulauei arigu eai ta. 11Gogogesagesa tataodi huia gamagamagari maemiuyao se mia; eau nige huia gamagamagari maemiu. 12Teina eausi i hegoi taugu eai ta, edi toregu i nuatunonohaiyao. 13Ea heribamiu ta mamohoi, hari eanua, hari eanua eai, teina evanelia ta se lauguguiaei i lau e tanoubu i ohihai, sine ta ena laulau hinage abo se ribaei, ia abo abahenuaisinina.”

Iudasi Isakariota Guiau i unelau

Mk. 14.10, 11; Lk. 22.3-6

14Saudoudoi‐labui wa esau, esana Iuda Isakariota, ie pesa ie lau kohena lailaidi aridi eai. 15Ie ribalau isi aridi eai, i ene, “Egu saha abo au leama ia abo ea leawa?” Ana mohara se ribaei silver tau‐esega‐i‐mate‐soudoudoi. 16Arinai ena dobila i eooi bena Iesu abo i morui.

Pasova se abi nonohai

Mk. 14.12-16; Lk. 22.14-20, 24-30

17Areto‐nige‐ie‐tubu mataasina asubena bagubagunana eai heaheatayao se laoma Iesu arinai si ene, “Ai lau haedi pasova em abaaina ai abihetoa nonohai?” 18Ia i ene, “Au lau eanua eai tau esau arinai, au ene, ‘Tanuagada i ene, Egu huia i hanahanaumao: maegu heaheatayao pasova abo ai ai em numa eai.’” 19Heaheatayao Iesu ena riba se lauwatai: pasova se abihetoa nonohai.

Pasova murimurita aririna ede meta

Mk. 14.17-21; Lk. 22.14-20, 24-30

20I maimailahi maenayao saudoudoi‐labui se bawabigabiga.

(Ioane 13.2-30 au hasiri. )

21Isi ma aiaidi, i ene, “Ea heribamiu ta mamohoi ami sagu esau abo i moruigu.” 22Isi abo se nuadubu ariri, esau, esau se ribalau ia arinai si ene, “Guiau e, eau wa?” 23Arinadi i heuio i ene, “Ena ia nimana eo nimagu ai hedatuesegaidi gaeba alona eai, ia taumoruigu ede. 24Tau Natuna abo i lau doha wasana se uri nonohaiyao: tau wa Tau Natuna taumoruina ede, kapore ia nuaahaahanina, tau ne i lolo taba ia nige se labasi.” 25Iuda, taumoruina, ia arinana i heuio, i ene, “Tanuagagu e, eau wa?” Iesu ia arinai i ene, “Oa ede u ribaei.”

Guiau ena mataasi tabuna Iesu i hetubu

Mk. 14.22-25; Lk. 22.17-20; 1 Kor. 11.23-25

26Isi ma aiaidi, Iesu areto ie abi, i lautoi, i ihi, i mosei heaheatayao aridi eai, i ene, “Au abi au ai; taugu ede ina.” 27Bia ie abi, i lautoi, i mosei aridi eai, i ene, “Arinai gamagarimiu au nom; 28osinagu ede ina gagaeo harihariuna eai, se heboriri tatao gamagaridi edi baaea abaribagigirina ede. 29Ea heribamiu ta, vine masina taba nige ea nomuioi, i lau e asubenana eai eau maemiu abo ta nom‐esega Tamagu ena basileia eai.”

(Ioane, 14.1-31 au hasiri. )

Petero i uhara Iesu i ribanonohai

Mk. 14.26-31; Lk. 22.31-34; Io. 13.36-38

30Wana esau se wana nonohai, abo se lau murimuri eai. Oliveta tupina eai.

(Ioane 15, 16, 17 au hasiri. )

31Iesu i ribalau aridi eai, i ene, “Ina maiona ta gamagarimiu debagu eai abo au alabesibesi: doha se uriyao, si ene, ‘Mamoe tauitawataidi ea lubi, mamoe eawoidi abo se tatagorigori’ (Zech. 13.7). 32Ea torouio abotai abo ea bagunaemiu Galilaia eai.” 33Petero i ribalau ia arinai i ene, “Tatao gamagaridi debam eai abo se alabesibesi, eau taba nige ea alabesibesi.” 34Iesu ia i heriba i ene, “Ea heribamiu ta mamohoi, ina maiona ta kamkam sora nige se dou, mahaiona abo u uharaegu.” 35Petero i ribalau ia arinai i ene, “Eau maem abo ta mate esega, taba nige ea uharaem.” Nei doha hinage heaheatayao gamagaridi edi riba esega mo.

Iesu amamna lailai i hearo oea eai

Mk. 14.32-42; Lk. 22.40-46

36Iesu maedi abo se lage dimo esau eai esana Getesemani, heaheatayao aridi eai i ene, “Inai au bawa, ea lau kalau nei eai ea lau‐uura.” 37Maenayao Petero eo Sebedaio nanatunayao labui i woeaidi, arinai abo i hetubu i nuadubu, eo nuana i porohe ariri. 38Ie ribalau aridi eai i ene, “Amnagu i baaea ariri, ea nuadubu matemate: inai au bawa, maegu ta silasilawa.”

Uura bagubaguna

Mk. 14.35; Lk. 22.41, 42

39Ia abo i taulau, i guridobi debana ie tutu, i uura, i ene, “Tamagu e, ea ene bena bia ta u laeudoiei: taiede eau nige egu nuatu ea lauwatai: oabom mo em nuatu.”

Heaheata ma‐enodi

Mk. 14.37, 38,40; Lk. 22.45, 46

40Ia abo i laoma heaheatayao aridi eai, ma‐enodi i lobaidi, i ribalau Petero arinai, i ene, “Ie saha mahana esega maeguyao nige ta silasilawa? 41Au silasilawa, eo au uura, noho ata i hearomiu: earuamiu se eari, na bulumamiu se beruberu.”

Uura helabuina

Mk. 14.36; Lk. 22.44

42Ma‐labui ie uio, i uura, i ene, “Tamagu e, taba bia ta nige u laeudoiei u ene bena ea nom, oabom nuam.” 43I uioma abo i lobaiuioidi se eno‐matemateuio: isi matadi se porohe.

Uuru hehaionana

Mk. 14.39

44I laugabaedi, ie uio, ma‐haiona i uura, ena riba esega mo. 45Abotai abo i laoma ena heaheatayao aridi eai, i heribadi i ene, “Abo au eno‐eawasimiu; awa i hanahanaumao, Tau Natuna ia abo se morui se mosei tatao baaea nimadi eai. 46Au torohai ta lau: taumoruigu i lagemao.”

Iesu se morui eo se toai

Mk. 14.43-50; Lk. 22.47-53; Io. 18.3-11

47Ia ma ribaribana, Iuda, saudoudoi‐labui esau, i lagema moutuana lailai maenayao, ma elepadi, eo ma kebukebubudi, kohena lailaidi, eo eanua babadadi aridi eai se laoma. 48Taumoruina wa heiheinoi i heribadi i ene, “Ena esau ea alagoiei ne, iaede meta, au toai.” 49Abo i lagema Iesu arinai, i ene, “Guiau e, Eauedo!” Abo ia i alagoiei. 50Iesu i ribalau ia arinai i ene, “Ehagu e, saha hesabana u laoma ta?” Arinai abo se laoma, nimadi eai se abilau Iesu arinai, abo se laei. 51Iesu ana sagu esau nimana i loloi, ena elepa i nuisihai, kohena lailai ena heaheari esau i lau‐elepai beana i talahai. 52Iesu ie ribalau ia arinai i ene, “Em elepa u toreuioi ena abaota eai, paana isi gamagaridi se aielepa, elepa eai hinage abo se unuhematedi. 53U nuatui, u ene bena nige egu nuatu abo ina ena ea lau‐uura Tamagu arinai, ia aneru legiona saudoudoi‐labui abo i hetamariesegaidima? 54Ena meta doha uriuri tabudi abo edohana edi hemahemamohoiena, si ene taba meta doha.” 55Nei awa ne arinai Iesu i ribalau moutuana aridi eai, i ene, “Au laoma au toaigu eau doha tauaiaiyahari ma elepamiu eo ma kebukebubumiu? Asubena gamagamagari numa tabuna eai ea bawa maemiu, ea laulauheata, nige au abilaoma arigu eai.” 56Teina ginauri gamagamagari se abidi peroveta edi uriuri bena abo se hemamohoiedi. Heaheata gamagari ia abo se nuagabaei, se dagogorigori.

Iesu se laei Kaiapa eo Sunaderi nuanuadi eai

Mk. 14.53-65; Io. 18.12, 19-24

57Isi wa Iesu se toai, abo se laei kohena lailai Kaiapa arinai, nei eai tauuriuri eo babadadi se oigogo. 58Petero muri ariri eai Iesu i laulauwatai se lau kohena saesaedaoina ena numa eai, ia i luhu heaheari maenayao se bawabigabiga, i itaitawatailaei. 59Kohena lailaidi, eo babadadi, eo sunaderi gamagaridi, Iesu ana mata borabora se eooidi, ia bena se unuhemate. 60Na nige se lobai: mataborabora gamagaridi tauribaedi se laoma, nige se lobai. Abotai abo mata borabora tauribaedi labui se laoma. 61Si ene, “Teina tau ta i ene, ‘Eaubada ena numa tabuna lopagorigorina abina ea ata, eo asubena haiona eai abo ea hetorouioi.’” 62Kohena saesaedaoina i toro i ribalau ia arinai, i ene, “Oa nige arinam? Wau taudi labui wa se ribataubigaim, u ene edoha?” 63Iesu nige ariarinana. Kohena saesaedaoina ie ribalau ia arinai i ene, “Eaubada maumaurina debana eai ea hetaladuim ta, ena oa Keriso, Eaubada Natuna, u heribamai.” 64Iesu i ribalau ia arinai, i ene, “Oa ede u ribaei: taiede ea heribam ta ea ene, abotai Tau Natuna abo au ita gigibori nimatutuna eai ie bawa, galewa eadadi boeadi eai i laolaoma.” 65Kohena saesaedaoina ana lulu i purisihaidi, i ene, “Eaubada i ribahebaaea, ana mata saha ta eooi? Eaubada i ribahebaaea au ataieyao. 66Emi nuatu saha?” Arinana se heuio si ene, “Ana mata nonohana, ia abo i mate.” 67Ia matana se garigarisoi, ia se oioiahalai; headi ia se laulauwapai, 68Si ene, “Oa Keriso, u riba peroveta arimai eai, Eai i lubim?”

Petero Guiau i uharaei

Mk. 14.66-72; Lk. 22.55-62; Io. 18.16-18

69Petero numa lailai wa murimurina eai i babawa: siu esau i laoma ia arinai, i ene, “Oa hinage Iesu Galilaia maem?” 70Isi gamagaridi matadi eai ie uhara, i ene, “Em riba u ribaei nige ea itaitai.” 71Ia abo i lau murimuri eai, dobila numana eai, siu esau ia ie ita isi nei eai i ribalau aridi eai i ene, “Teina tau ta hinage Iesu Nasareta maena.” 72Abo ie uhara uio, eo i arina baaea, i ene, “Tau me nige ea nuatui.” 73Abotai abo isi nei eai se totoro se laoma, se ribalau Petero arinai, si ene, “Mamohoi oa hinage adi sagu esau: arinam i hemasaraham.” 74Arinai abo i arina baaea ariri, i ene, “Tau me nige ea itaitai.” Maesega kamkam abo ie dou masaraha. 75Petero Iesu ena riba wa nuana ie sae, ia i heriba wa i ene, “Kamkam sora nige ie dou, ma‐haiona abo u uharaegu.” I lulage murimuri eai, i dou matemate.