Rom 4 | SWP | STEP | Aberahama, urutubuda tanoubu eai ta, edohana abo ta ribaei?

‏ Romans 4

1 Aberahama, urutubuda tanoubu eai ta, edohana abo ta ribaei? 2 Ena Aberahama ena laulau debadi eai ia se hedudurai, ena aba ribatausaeuioi ede meta; na Eaubada matana eai nige’e. 3 Uriuri tabudi si ene edoha? Aberahama Eaubada i nuatuwatai arinai ede se nuatulaei si ene, laulau duduraina meta. 4 Na paisoa tau‐abina ia nige se ainauiai, na se hemaisa mo. 5 Ia wa nige i paisoa, na tatao baaea tauheduduraidi i nuatuwatai mo, ena sunuma abo se ribaei laulau‐dudurai. 6 Doha hinage Davida ena uriuri eai tau ena nuawoiwoina i ribaei, ia wa Eaubada i awa‐laulaududuraiei, nige ena paipaisoa debadi eai; i ene:

7 “Isi edi laulau baaea se ribagigiridio,
edi laulau baaea se poitawaidio, nuadi se woiwoina;
8 tau Eaubada nige i riba‐taubaaeaei, nuana i woiwoina.” (Psa. 32.1-2.)
9 Wau nuawoiwoina wa, isi tau‐peritome isibom abo se abi, e tatao nige se heperitomedi abo se abi hinage? Paana ita ta ’ne, Aberahama ena sunuma debana eai ia se awataulaulaududuraiei. 10 Edoha edi awaawa‐taulaulaududuraiena? Ia se heperitomeyao, e sora nige se heperitome? Ia sora nige se heperitome. 11 Ia se heperitome doha heiheinoi mo, ena sunuma laulaududuraina heiheinoina huia ne sora nige se heperitome wa; ia abo tauataiena gamagamagari tamadi eai ie lau, isi wa nige se heperitomedi, edi sunuma debana eai mo se awaawa‐taulaulaududuraiedi. 12 Eo ia abo tauperiperitome tamadi eai ie lau, na isi mo nige’e, isi hinage gamagamagaridi tamadi Aberahama ena sunuma laulauna se laulauwatai, sunuma wa i abiyao ia sora nige se heperitome.

13 Paana ribahesunuma wa, Aberahama eo ia pesipesinayao aridi eai se ribaei si ene ia tanoubu abo i tanuagaei, nige laugagaeona debana eai i laoma, na sunuma laulau‐duduraina mo. 14 Na, ena tau‐laulaududurai laugagaeona eai, isi tanoubu abo se tanuagaei, sunuma abo nige aniona, eo ribahesunuma wa hinage nige ana ao. 15 Paana ede laugagaeona wa ouyalayala aba‐hetubuna ede: na haedi eai laugagaeona nige’e, laugagaeo utusina nige’e.

16 Arinai sunuma eai mo ribahesunuma wa i tubuma, ainauia debana eai, bena ia pesipesinayao gamagamagari aridi eai ribahesunuma wa tatao se hemamohoiei; isibom laugagaeo ribana eai enadi mo nige’e, isi hinage enadi Aberahama ena sunuma tau‐abina, ia gamagarida tamada ede, 17 doha se uriyao si ene, “Ea hetorom oa eanua gamagaridi urutubudi eai u lau;” (Gen. 17.5.) Eaubada i sunumawatai wa matana eai, ia taumatemate tauhemauridi, eo ginauri sora nige se hetubudi ena riba eai abo se tubu. 18 Ia ena sunuma doha nige aniona, taiede i sunumawatai mo, eanua gamagamagari bena abo i hemala tamadi; doha se ribaei wa si ene, “Doha hinage meta pesipesimyao abo se gamagari.” (Gen. 15.5.) 19 Tauna i nuatui se beruberuo, ena gigibori se lautom’o, na ena borimai handere i hanahanau, eo Sara i nuatui i agari hinage, taiede ena sunuma nige i beruberu. 20 Eaubada ena ribahesunuma nige i awayagaraei, eo nige i tagugu, ena sunuma mo i adidiri, eo Eaubada i ribatausaei; 21 ena nuatu adidirina eai i ene, saha eo saha i ribahesunumaei abo hinage abina i ata i hemamohoiei. 22 Arinai ede ena sunuma ia arinai se awa‐laulaududuraiei. (Gen. 15.6.) 23 Se uri wa si ene, “Ia arinai se awa‐laulaududuraiei;” iabom mo nige se nuatui, 24 se nuatuida hinage. Ita arida eai nige baeaona sunumada abo se awa‐laulaududuraiei, ita Iesu eda Guiau mate eai i hetorouioi, tausunusunumaena. 25 Eda laulau baaea debadi eai ia se moselaei, eo ia se hetorouioi eda aba‐heduduraida ede.