Luk 11 | SnqSC | STEP | Wisi wumoosi, Sesu asambilenge ve ma mbure. Ve mane yandi, muyikitsi wandi wumoosi atombe yandi re: «Fumu, lonze yetu nakasambulu, nave lonze Sa bayikitsi bandi.»

Luke 11

Sesu alonze bayikitsi bandi naka sambulu

1 Wisi wumoosi, Sesu asambilenge ve ma mbure. Ve mane yandi, muyikitsi wandi wumoosi atombe yandi re: «Fumu, lonze yetu nakasambulu, nave lonze Sa bayikitsi bandi.» 2 Sesu alonze yawu re: «Veke sambila yenu, yambilanu re:
Tate,
batu botsu bayabi re yire Nzambi yi reele;
Bufumu bwagu burugi.
3 Vege yetu wisi wotsu kure yingyenze.
4 Singile yetu kokolu mu mabi metu,
nave yetu dikasingili kokolu gu botsu babakavagili yetu mabi.
Yiyasingise yetu mu dimangu.»

Wukavondi akadili

5 Sesu abekonde yambile yawu re: «Nonge nuyelige: wumoosi ve ganegarenu ane mbatsi areyende dagise yandi gu mbugandi ne murime dibati muyambile yandi re: “Mbatsyami, sombise me mape mareru. 6 Mbatsyami yimosi yigoneyende gu munyalu ametsange gu mbugami te masandi ne kure yi wuvege yandi.” 7 Ne vane mbatsyagu areyagule yu gugare ndagu re: “Sise me ne swi! Gyabutsu gitsemane wubandugu ne musapi, mane baane bami dikeke gu tangi, masakerungule berambuge muvege yandi mape.” 8 Mayambile yenu, nisi ga asarambugu mu bumbatsi, agurambugu muvege yandi byotsu binandi ne nzale, mumbare mbatsyandi ane muginyinyi wuvonde guga tsonyi. 9 Re dibandu, mayambile yenu: vondanu ne yenu diguvegu; benanu ne yenu digudagise; dukisanu ne yenu digutsibululu gyabutsu. 10 Wotsu wukavondi akavegu, wotsu wukabeni akadagisi ne bakatsibulili gyabutsu gu wotsu wukadukisi. 11 Tayi nde nyi ve ganegarenu wurungule wuvege mwanandi nyoge, ga avonde yandi yibere? ^{▼▼Gu mbuge basifu basakeyi banyoge.} 12 Vore aguvege yandi nginge ga avonde diki? 13 Rembuse yenu batu bababi diyatsi wuvege baane benu bivave bibinyi. Te keke ne Tayi yi gu yulu, aguvege Dinyunyi di Sungeme gu yawu babakavondi yandi!»

Sesu apunze manyunyi mamabi

14 Wisi wumoosi, Sesu abeluse dibagele dibile yibubu. Apunze dinyunyi didibi dibile nandi. Dinyunyi dyene divate mu yandi ne ayambile. Ne vane piti yibile vane yigibeme mbili. 15 Te batu bamosi bayambile re: «Sesu agonepunze manyunyi mamabi nde mu ngudi yi Belesebul, yivunde gi manyunyi mamabi.» 16 Bamosi baronde mange Sesu ne batombe yandi mulonze yawu yilimbe gi yimwile muyabe re asindugu ne Nzambi. 17 Te Sesu ayabenge matase mawu. Kere vane ayambile yawu re: «Batu ba tsengi moosi ga balwane yawu ne yawu, tsengi yikapanzigi, bandagu tsikabundugi tsine mu yulu tsimosi. 18 Munongu wumoosi Sate ga abelwane ne batu bandi, tsengyandi yigugware nde tsenyi? Mumbare yenu digoneyambile re, magonepunze manyunyi mamabi mu ngudi yi Belesebul. 19 Te ga mapunze yawu ke mu ngudi yi Belesebul, ake wukavegi batu benu ngudi yi wupunze yawu nde nyi? Re dibandu batu benu yawu bene bagulonze re, mbele yinde nenu! 20 Nungyenze magonepunze manyunyi mamabi nde ne ngudi yi Nzambi, re divindugulu mulonze re Bufumu bu Nzambi butseruge kwange ne gu yenu.

21 Ga dibagele dine myangu ne bilwani agonekyele ndagwandi, gusandi mutu wukerungule nyingene mu wuyibe manive mandi. 22 Te ga dibagele divyogilile yandi myangu aruge ne anedile mulwani, agudumbe yandi bilwani byandi bibetsya ya ne gitu ne wugabe byotsu bibonge yandi.

23 Wotsu wugabile nami ake mukolitsi wami, ne wotsu wugayamune me mugukige mupanzitsi.

Bugabugulu bu dinyunyi didibi

24 Ga dinyunyi didibi dimavate mu mutu, dikayendi nugabugu gu bitsige bi yumuge mubene yitsige gi wulooge. Agasadagise, akayambili re: “Makegabuge gu ndagwami yitsevate me.” 25 Aregabugu, aredagisi yo yigombulu, yikunzu bwedi. 26 Kerevane areyende mu wubonge manyunyi tsambu mamosi mavyogilile yandi wubive, bareruge yawu botsu mutsagele gu ndagwene. Re disine maguge ma mutu wene mayi marage wuvyogilile ve dibandu.»

Manyi mangyenze

27 Ve mane Sesu wuyambile nane, mugyetu wumoosi gugare piti abwamugu re: «Myule gu mugyetu wubure yu ne wunwise yu.» 28 Te Sesu ayagule re: «Myule nde gu babakayulu mambu ma Nzambi ne wugobise mo!»

Sesu ayagule batu babavonde yimwile

29 Ve gukegenenge piti nutsenge Sesu, abande yambile yawu re: «Batu banemunyi bayi bababi, bagonetombe yilimbe gi yimwile, te gusandi yilimbe nisi gimoosi gikelonzu yawu, vengu ne gi Sonas. 30 Sonas abile yilimbe gi bisi Ninive ne Mwane mutu agubile ne yandi yilimbe gi batu banemunyi. 31 Mu wisi wu mutsundu, fumu yimugyetu yi tsengi yi bande aguteleme ve wusu batu banemunyi muvege yawu mbele, mumbare atsitse gu misengi mivale muyulu mambu ma Salumu mabase buyedi, te gugu guyi mutu wuvyogilile Salumu! 32 Mu wisi wu mutsundu, bisi Ninive baguteleme ve wusu batu banemunyi muvege yawu mbele, mumbare bakalule buyedi ve yulu yawu mambu ma Nzambi malonze Sonas, te vave guyi mutu wuvyogilile Sonas!

Yivele gi nyuru

33 Mutu asakabangi pâge muswege yo vo musunze yo gutsi mulumbu, te akasunzi yo nde ve yikobugulu gyandi, mure babakenyingenenge bakelabenge yivele. 34 Misu magu re page yi nyurwagu, ga misu magu mayi polu, nyurwagu yotsu yigugare yivele te misu magu ga mayi mabive, nyurwagu yi gutsi diviseme. 35 Kagu yirambile mure yivele gigonetase yu re yine gyo gikerebile diviseme. 36 Ga nyurwagu yotsu yi gu yivele, guga yileme nisi gimoosi gu diviseme, nyuru yotsu yigubile gu yivele munongu wumoosi naka tsombusu yu ne yivele gi pâge.»

Sesu agyele bafwarisi ne basupulitsi ba migage

37 Ve mane Sesu wuyambile, mufwarisi wumoosi atsitse yandi mu yeyi yilambu gu ndagwandi. Sesu anyingene gu ndagu mufwarisi ne atsagele ve take. 38 Mufwarisi agibeme ve labe yandi re Sesu asagunge makake ne ginene yi. ^{▼▼Bafwarisi babile ne yifu gi wugunge myogu ne gineneyi, na tabulu dyo gu mugage wu dibundu dyawu.} 39 Kere Fumu ayambile yandi re: «Yenu bafwarisi dikagungi yibungu ne yipele ke gu nzime, te gu bagare benu yenu dibase ne matase mayibe, ne buvembe. 40 Yenu disegoneyulu yivave! Nzambi re wukunze kane, ne yandi re wubekunze gare. 41 Kagu dyambu digyenze diwuvage nde wuvege masaandi bi gugare bipele byenu, kere vane byotsu mu yenu bikebile birele.

42 Mulogu gu yenu bafwarisi! Yenu dikavegi Nzambi gimoosi mu digumi mu bivave ga na malusi, difire, ne bimosi bi mu banungi benu bika vegi mugangu mu dinunge. Te yenu disakavagi mambu masungeme ne disakarondi Nzambi. Mane mbe re makavagi yenu guga libene mambu mane motsu.

43 Mulogu gu yenu bafwarisi! Yenu dikarondi bitsige bimawusu mulabunu gu bandagu tsi masambulu ne yenu gandi dikarondi keke wuyubulu ne digobe mu time kane. 44 Mulogu gu yenu! Diyi ga bangile tsigalabunu tsigonetsaru ne batu gugayabe. ^{▼▼Gu mbuge basifu, ga mutu abembulunu ne fumbi, vo arevyoge ve mbare ngile, akabili keke nzoruru.}»

45 Musupulitsi wu migage wumoosi ayambile Sesu re: «Mulonzi, muyambile nane, yigonesenge nde ne yetu gandi!» 46 Sesu ayagule re: «Mulogu ne gu yenu gandi basupulitsi ba migage! Yenu dikapapisi batu mifune mi tsire ne disegonepupe nisi pesu mu yamune yawu wupape myo. 47 Mulogu gu yenu! Yenu dikarungi bangile tsitsinyi tsi babigitsi, nane babigitsi baboku re ne bakaage benu. 48 Yenu digonesilile re bakaage benu bavagenge ke mambu mamanyi, mumbare babokenge babigitsi, ne yenu digonerunge bangile bawu! 49 Re dibandu Nzambi mu buyedi bwandi, ayambile re: “Magusindigile yawu babigitsi ne bakime; baguboke bane ve ganegarawu ne baguritsige bamosi maguge.” 50 Re mu dyo batu ba nemunyi bagukilusu mu mafwitse motsu mabokwa babigitsi bande ve dibandu di buloongu, 51 yawu bagukilusu bande mu difu di Abel, kwange ne mu di Sakari wu boku ve pwasi yisunzulu gi malagu ne ndagu Nzambi. Nungyenze mayambile yenu, batu ba nemunyi bagukilusu mu mafwitse ma batu bene botsu.

52 Mulogu gu yenu, milonzi mi migage. Yenu dibonge musapi wukatsibulu gyabutsu gi wuyabe Nzambi: yenu bene disegonenyingene, ne yenu diseronde re bamosi banyingeni.»

53 Ve vate Sesu gu ndagwene, batenditsi ba migage ne bafwarisi bagangu ne kabu yi mbili ne baduma yandi banzidu mu mbili minongu mi mambu. 54 Bavere yandi gu pengi muronde tsukige yandi mu pasi dibigu diketube yandi.