Luk 12 | SnqSC | STEP | Mu dikyesi dyene, mbili batu bagukegene ve mbare Sesu, batsarenenge yawu ne yawu mumbare piti yibile yirage. Sesu abande wuyambile ne bayikitsi bandi re: «Rambilanu mu wufure wu bafwarisi. Wufure wawu wunde ga mukyemu wukarandisi mbumbi.

Luke 12

Sesu alubuse bayikitsi bandi mu wufure wu bafwarisi

1 Mu dikyesi dyene, mbili batu bagukegene ve mbare Sesu, batsarenenge yawu ne yawu mumbare piti yibile yirage. Sesu abande wuyambile ne bayikitsi bandi re: «Rambilanu mu wufure wu bafwarisi. Wufure wawu wunde ga mukyemu wukarandisi mbumbi. 2 Motsu masweme magututugu, ne motsu magudiswele maguyabunu. 3 Re dibandu, motsu makeyambilenge yenu ne dibati maguyulunu ne batu botsu ne nyangu, ne motsu makeyambilenge yenu gu bafundu gu yirini gi tsibugu, maguyambulu pepe mu myanze mi bandagu.

Wubile ne gitu mu Nzambi

4 Bambatsi bami, mayambile yenu re: diyalabe wome gu babakaboki nyuru, te ve yulu vane baseberungule wuvage dyambu dimosi. 5 Makelonze yenu mutu wu wulabe wome: labanu wome ke Nzambi wune dinyange di wuvere yenu gu mbawu yigatsime vekefu yenu. Nungyenze mayambile yenu, wune re wulabe wome.

6 Basakasumbisi masaangu maranu mu ma dole beya? Te Nzambi asakalibeni nisi dimoosi. 7 Nisi banange benu tsyotsu tsiketsitalu. Kagu diyalabe wome: monyu wenu wutsevyogilile mbili masaangu.

Wusinge vore wurune Sesu

8 Mayambile yenu re: wotsu wukesinge me ve wusu batu re mayi muyikitsi wandi, me Mwane mutu magusinge yandi ve wusu bakime ba yulu ba Nzambi re ayi muyikitsi wami. 9 Te wotsu wukerune me ve wusu batu, me Mwane mutu magurune yandi ve wusu bakime ba Nzambi. 10 Wotsu wukeyambile dyambu dibive mu Mwane mutu, agusingulu kokolu, te wotsu wukesenge Dinyunyi di Sungeme asakesingulu kokolu.

11 Vekeyendenge yawu nenu ve wusu bivunde bibandagu tsi masambulu, ne bange dinyange, diyayulu wome mu mabigu makeyagulenge yenu mukare manyuru menu. 12 Diyalabe page mumbare Dinyunyi di Sungeme agulonzenge yenu mu dikyesi dyene makeyagulenge yenu.»

Manyi ma buloongu

13 Mutu wumoosi gugare piti ayambile Sesu re: «Mulonzi, rume mwane mame agabi mikwanyi misilu yetu ne tayetu.» 14 Sesu ayagule yandi re: «Mbatsyami, wutsesoole me mubile mbanze ve ganegarenu, mugabile yenu mikwanyi nde nyi?» 15 Kerevane ayambile ne botsu re: «Rambilanu! Diyabile ne dironde dibusine, mumbare monyu wu mutu wusandi mu busine bwandi, nisi abetsi ne mbili manyi.»

16 Kerevane Sesu atwile yawu nongu re: «Dibagele dimoosi abile yisine, ne banungi bandi bavege mbili kure. 17 Atasenge gu murime wandi re: “Vave makevage nde tsenyi? Masandi ne bitsige bi wugumbe kurami yotsu.” 18 Kerevane abekonde re: “Mayatsi nakevage me: magunene panze biswegu byami bibikyeki, nuberunge biswegu bibinene, ne vane maguswege kurami yotsu ne manyi mami mamosi. 19 Kerevane, maguyambile ne mabene re: Mbatsi! Yine mbili kure mu mbili bilime, yiyilooge, yi, nu, tambe ne monyu.” 20 Te Nzambi ayambile nandi re: “Yidungi! Ne dibati didi yikefu nde wufu. Ake byotsu bitsegukige yu bine, bikesale nde ne nyi?”» 21 Sesu abeyambile re: «Nane re nakebile mutu wukagukigi bukiti bu yabene, te asandi yikiti ve misu ma Nzambi.»

Wubile ne gitu mu Nzambi

22 Sesu ayambile bayikitsi bandi re: «Re dibandu mayambile yenu, diyakayigene mu dyambu di kure yinenu ne nzale mudile monyu, nisi mu dyambu di bidwari bi manyuru menu, 23 mumbare monyu wutsevyogilile kure, ne nyuru yitsevyogilile bidwari. 24 Beminanu banyonyi: basakavari, basakabuki, basandi ne biswegu, te Nzambi akabunguli yawu! Yenu ditsevyogilile banyonyi! 25 Nyi ve ganegarenu arungule wukonde ma yitsingu pesu mu monyu wandi, mu mikayu myandi? 26 Ake yenu ga disarungule wuvage mambu ma pesu, mugi yenu dine mikayu mu mambu mamosi? 27 Moniganu munongu nakabendi bangange mu banungi: basakadyanzi, basakagomi bidwari. Te mayambile yenu re: nisi Salumu, mu bukiti bwandi bwotsu, asebile ne bidwari bivyogilile wunyeve wu ngange moosi ve ganegare bangange bene. 28 Rembuse bisinge bibanungi bivave nemunyi, ngwali bigutsulu nuveru gu mbawu, re Nzambi akadwisi byo; keke ne yenu batu babagane gitu gi ngyenze asakebuse wudwise yenu. 29 Kagu sa bwedi mubile ne mikayu mubu ne mubu mu dyambu di wuyi ne wunu. 30 Batu babaseyabe Nzambi re bakabeni bine byotsu makyesi motsu. Te yenu, dine Tayenu asetsimbu binenu ne nzale. 31 Regilanu kinde wubene Bufumu bu Nzambi, kerevane Nzambi aguvege yenu byotsu binenu ne nzale.

Busine bu gu yulu

32 Digande di pesu, diyalabe wome, mumbare Tayenu atselabe wunyi muvege yenu Bufumu. 33 Sumbisanu manyi menu, ne veganu badole tsitsedile yenu gu masaandi. Ne vane yenu digudile busine bugavu. Busine bwene bugubile mubu ne mubu gu yulu. Bayibitsi basandi ne dinyange diwuyibe bwo, vo batselele mubunge bwo. 34 Nungyenze ve busine bwagu re vekebile gandi murime wagu.»

Bilanu batsonzeme

35 Sesu abekonde re: «Diyabile ne nzugu, bilanu batsonzeme mudyanze makyesi motsu ne tunganu mitsigi mu malungu, kyelanu bapâge benu tsibangu. 36 Bilanu ga basalitsi babagonevingile bugabugulu bu fumwawu wuyende gu diyayi di dyonge, mutsibulile yandi gyabutsu vekedumise yandi. 37 Myule gu basalitsi, babakedagusu ne Fumwawu bamoge! Mayambile yenu nungyenze: agutunge mutsigi mu dilungu dyandi, nutsigise yawu ve take ne aguruge muvege yawu kure. 38 Ga aruge ve murime dibati, vore ve dikyesi dimawusu, ne aredagise yawu bamoge, myule gu yawu!

39 Yabanu bwedi re: mbe fumu ndagu akayabi digwere dikarugi muyibitsi, mbe aserungule wusinge re muyibitsi apanguli ndagwandi mu wunyingene. 40 Bilanu batsonzeme ne yenu gandi, mumbare Mwane mutu agwitse mu digwere digayabe yenu.»

Musalitsi wu munyi ne wu mubi

41 Kerevane Pyere atombe Sesu re: «Fumu, yigonevere nongu yine ke mu yetu pinze vore nde mu batu botsu?»

42 Fumu ayagule yandi re: «Ake musalitsi wu munyi ne wune buyedi nde nyi? Re yandi wu mulonzi ayambile re: “Mavege yu yisalu gigi; vege kure gu basalitsi bami mu dikyesi diyelimine.” 43 Musalitsi wene agulabe wunyi ga mulonzi wandi adagise yandi agonevage mudyanzu wene. 44 Nungyenze mayambile yenu, mulonzi aguvege yandi dinyange diwukyele manyi mandi motsu. 45 Nonge nuyelige: ga musalitsi ayambile re: “Mulonzi wami asakelenge wuruge”, ne ga abande wudimbe basalitsi babagyetu ne babagele, ne ga ayi ne wunu, ne wulange, 46 ga agavage nane, mulonzi agwitse wisi wumoosi, mu dikyesi digayabe yandi; agukilise yandi navegonekilusu babagane gitu mu Nzambi. 47 Musalitsi wuyatsi makarondi mulonzi wandi, agasabile wutsonzeme ne wuvage mo, agukilusu mbili. 48 Te musalitsi wuseyabe makarondi mulonzi wandi ne agasarungule wuvage mo, agukilusu pesu. Ga mutu avegu mbili bivave, agutombu mbili. Ga mutu avegu mbili bivave bi wukyele agubetombu bivyogilile.

Sesu aruge ne dipasu

49 Matseruge ne mbawu mu tsi yi ne magoneronde keke re yibangu! 50 Ne mapape makebonge bateme yi maguge ne murime wami wusandi wusunde kwange ne vekesupugu dyambu dyene! 51 Yenu digonetase ndere maruge nde mubage polu mu tsi ya? Gusandi, mayambile yenu re nde dipasu. 52 Bande ne mapape dipasu digubile va ganegare yitsuku gine batu baranu. Bareru bagukole babeyi, ne babeyi bagukole bareru. 53 Tayi agukole mwanandi wu dibagele, ne mwane agukole tayi, nguyi agukole mwanandi wu mugyetu, ne mwane agukole ngwandi, nguyi mulumi agukole mugatsi mwane, ne mugatsi mwane agukole nguyi mulumi.»

Wuditige bilimbe bi makyesi

54 Sesu abekonde yambile ne piti re: «Vekalabi yenu yipume gipinde gu yulu kube yimagyetu, mbangu mbangu yenu dikayambili re: “Fule yikenoge”, ne yo nunoge. 55 Vekavugi divuge kube yi mabagele, yenu direyambile re: “Gugubile gyusule”, ne gyo gineruge. 56 Batu bane deti be! Yenu diyatsi ke wuditige bilimbe bitsi ne yulu, ake mugi yenu disegoneditige mambu ma dikyesi didi?

Swekiganu mambu menu ngyenze ne giyende gu mutswundu

57 Mugi yenu bene disakatswundi mambu, mu wusungise bwedi? 58 Ga yibile ne dyambu ne mutu, ne yenu dineyende ve wusu mbanze, mange wuyulusunu nandi veki yenu mu nzile. Mure akerebage yu ve wusu misaambu, ne misaambu akerebage gu mugole, ne mugole akereyenze yu gu tsugu. 59 Mayambile yu re: yisakevate gwune kwange ne vekemane yu wuvane badole tsyotsu tsikanwani yu.»