Luke 13

Wuvinze bitsagilitsi vo wufu

1Mu dikyesi dyene, dikabu di batu diruge gu yambile Sesu re: «Pilate abokise bisi Galilé mu dikyesi divegenge yandi malagu gu Nzambi.» 2Sesu ayagule yawu re: «Ake yenu digonetase nde tsenyi? Yawu bafu nane nde mumbare bavage mabi wuvyogilile bisi Galilé bane botswa? 3Sage nane, te malubuse yenu re: kalulanu bitsagilitsi byenu mbe yenu botsu digufu ga yawu. 4Ake digumi ne batu pombu banyigu ne yibage gi murumbe wu Siloé, yenu digonetase nde re yawu babile ne mbele yivyogilile batu botsu ba Serusalema? 5Sage nane, te malubuse yenu: kalulanu bitsagilitsi byenu mbe yenu botsu digufu ga batu bene.»

Mwiri wugabure milunde

6Kere vane Sesu atwile yawu nongu yiyi: «Dibagele dimoosi avare mutsafu gu nungyandi. Ve pule dikyesi dikayu batsafu, ayende mubene wudoke te asedagise tsyo. 7Ne vane, ayambile musalitsi wwandi re: “Labe bilime bikende bireru magonevepe gu bene wudoke batsafu mu mutsafu wuwu, te masakedagisi tsyo. Kagu gwange wo mure wukerekalemine yitsige nzolu.” 8Musalitsi ayagule yandi re: “Mulonzi, besise wo yilime gigi, magusenge mu tungu wo, nusunze batsibi tsi batabe. 9Muvage nane, gotsu yilime gi nzime wugubure. Ga sanane yigugwangise wo.”»

Sesu abeluse mugyetu mu wisi wukaloogi basifu

10Mu wisi wukaloogi basifu Sesu alonzenge gu ndagu disambulu. 11Vane vebile mugyetu wumoosi nubele: mu dinyunyi didibi dibile nandi, abila keke wuvindeme, digumi ne bilime pombu aseberungulenge wusimbugu. 12Ve labe Sesu mugyetu wene, atsitse yandi ne mu yambile re: «Wubele wagu wumavu.» 13Sesu asunzile yandi makake, vane ne vane mugyetu asimbugu ne ayambile re: «Dinyi gu Nzambi.» 14Te yivunde gi ndagu disambulu ayulu kabu yimbili mumbare Sesu abeluse mutu mu wisi wukaloogi basifu. Kere ayambile gu piti re: «Guyi tsufu yisamunu tsi wudyanze kagu ruganu batsufu tsyene mubelusu, te sa mu wisi wulooge.» 15Fumu agabusile yandi re: «Bifutsi bibi, veganegare yenu botsu nde nyi wusakanyanguli yibodu gyandi ve yitsige gikayisu gyo muyende ne gyo munwise mambe mu wisi wukaloogu? 16Ne mugyetu wuwu, wugu yitsuku gi Abaram, Sate atunge yandi digumi ne bilime pombu, kagu sabile dyambu dibwedi mubeluse yandi mu wisi wukaloogi basifwa?» 17Gyotsu gi yambilenge Sesu nane, bakolitsi bandi bafu ne mbili tsonyi. Te piti yotsu yibile ne yinyunge mumbare Sesu avagenge mambu mamanyi.

Bufumu bu Nzambi bugubagusunu nde ne gi?

18Ve yulu vane, Sesu akonde wuyambile re: «Bufumu bu Nzambi bugubagusunu nde ne gi? Makebagusunu bwo nde ne gi? 19Bufumu bu Nzambi buyi munongu wumoosi ne mwinzi wu ditsafu wukavari mutu gu nungyandi. Mwinzi wene wukabendi, wukabangugi ne wukakalugi mwiri ne banyonyi bakarungi mufu mawu mu bitaki byandi.»

20Sesu abekonde yambile re: «Magubagusunu Bufumu bu Nzambi nde ne gi? 21Bufumu bu Nzambi buyi munongu wumoosi ga mukyemu wukabongi mugyetu muputesene ne ma pesu fwarine murandise mbumbi.»

Wuke nyingene gu Bufumu bu Nzambi nde nyi?

22Ve yendenge Sesu gu Serusaleme avyogenge mu mavule ne mu mimbu nulonzenge batu mambu ma Nzambi. 23Mutu wumoosi atombe yandi re: «Fumu, Nzambi aguyobule ke ma dikabu pesu di batwa?» 24Sesu ayagule botsu re: «Ragemanu mu nyngene mu mune wu ndagu wu mukyeki. Nungyenze, mayambile yenu, nzoku batu bagubene wunyingene mu wo te basakerungule.

25Vekerambugu nge ndagu mu bandige gyabutsu ne musapi yenu digusale gu kane. Yenu diguvuredumise gyabutsu nuyambile re: “Fumu kokolu tsibulile yetu ndagu.” Te yandi agugabusile yenu re: “Maseyabe yenu.” 26Ne vane yenu diguyambile yandi re: “Yetu diyi ne wunu nagu, yilonze mu bitsigi bi mbili batu bi mavule metu.” 27Te nge ndagu agubekonde yagule yenu re: “Maseyabe yenu badigonevage mabi!” 28Veke labe yenu Abaram, Isaak ne Sakob ne babigitsi botsu, gugare Bufumu bu Nzambi, vane re vekelilenge yenu, nugwerisenge minu mumbare Nzambi asakesingise yenu mu nyingene. 29Kere vane batu baguruge gu tandu ne bande ne kube magiétu ne kube mabagele mutsagele ve take muyi yilambu gi diyayi gu Bufumu bu Nzambi. 30Ne vane batu bagu nzime ne mapape baguvyoge gu wusu, baba gu wusu ne mapape bagukitigile gu nzime.»

Sesu agufu gu Serusaleme

31Mu dikyesi dyene dikabu di bafwarisi digogule ve mbare Sesu mu yambile yandi re: «Burugu vave, yende kube yimosi mumbare Irode agoneronde wubokise yu.» 32Sesu ayagule yawu re: «Yendanu guyambile mutu wene wu yiyedi ga nganyi re: “Ne munyi ne ngwali magupunze manyunyi mamabi nubeluse babetsi, mu wisi wu mureru magumanisile yisalu gyami.” 33Te nemunyi ne ngwali ne wunemosi, magwende ngwu ne gu Serusaleme, sabwedi re mubigitsi arefu vale ne Serusaleme.

34Bisi Serusaleme, bisi Serusaleme, yenu digonebokise babigitsi, ne wuboke ne mamanyi babakasindulu yenu ne Nzambi. Makyesi mambili marondenge wugukige yenu nakagukigi koku baane bandi gu tsi mapapi mandi, te yenu diseronde. 35Kagu mu dyambu dyene, Nzambi agusambule divule dyenu. Mayambile yenu re: yenu disakebelabe me kwange ne vakepule dikyesi dikeyambile yenu re: “Myule gu yandi wukarugi mu dine di Fumu.”»