Luke 16

Musalitsi wu mubi

1Kere vane Sesu ayambile bayikitsi bandi re: «Yikiti gimoosi abile ne musalitsi, ne bayitse funde yandi gu yikiti re musalitsi wagu atsebunge manyi magu. 2Atsitse musalitsi wene nuyambile re: “Magone yulu me mu yu nde gi? Vege me mutangu natse sale yu, mumbare ne dinzime yisakebekyele manyi mami.” 3Musalitsi atase re: “Maguvage nde tsenyi? Fumwami amedumbe me wukyele manyi mandi. Wubuke mutambe muvare? Masane myangu. Wurime? Make ne tsonyi. 4Mayatsi nakevage me mure vekepunzu me gu yisalu, gukebile batu muyake me mu bambuge bawu.” 5Arugise wumoosi ne wumoosi babanwanenge fumwandi ne atombe wumarege re: “Yikanwani fumwami nde kwe?” 6Yandi ayagule re: “Makanwani yandi kame bambuti tsi matsi.” Musalitsi ayambile yandi re: “Bonge mugande wu dinwane dyagu, tsagele nyyavu ne tende magumi maranu.” 7Kere vane abeyambile ne wumubeyi re: “Ake yu, yikanwani nde kwe?” Ayagule re: “Kame basaku tsi misu mabaputu.” Musalitsi arume yandi re: “Bonge mugande wu dinwane dyagu ne tende magumi pombu.” 8Ne fumu akumise musalitsi wandi wu mubi mu wufure wandi, mumbare asale dyambu dyene ne buyedi. Bisi buloongu bubu bane buyedi buvage mambu veganegare bambatsi bawu, wuvyogilile babagu yivele gi Nzambi.»

Mutu aserungule salile ne Nzambi ne badole

9Sesu abeyambile re: «Bonganu badole tsitsibi tsi buloongu bubu muyamune bambatsi babane nzale. Ne vane vakevu badole bena, Nzambi aguyake yenu gu ndagwandi mutsagele gune mubu ne mubu. 10Mutu wusungeme mu mambu mamakyeki, agubile gandi wusungeme mu mambu mamanene. Ne wusandi wusungeme mu mambu mamakyeki, asakebile wusungeme mu mambu mamanene. 11Ake ga yenu disabile basungeme mu badole tsitsibi tsi bulongu bubu, nyi wukevege yenu bukiti bungyenze? 12Ake ga yenu disabile basungeme mu bivave bibanganyi, nyi wukevege yenu byenu?

13Musalitsi aserungule salile fumu beyi: mbe agukole wumoosi ne areronde wune; ga sanane agugobise wumoosi ne agulenze wune. Yenu diserungule salile ne Nzambi ne badole mu dikyesi dimoosi.»

Migage ne Bufumu

14Bafwarisi babarondenge badole, bayulungu mambu mene motsu ne badetenge Sesu. 15Te Sesu ayambile yawu re: «Yenu dikaritsigi batu re yenu diyi basungeme, te Nzambi asetsimbu mirime myenu. Nungyenze, byotsu bikakumisi batu ve wusu Nzambi bike bwanzi.

16Mugage wu Muyise ne migande mi babigitsi migobusu ne batu Kwange ne mu dikyesi di Sa Batise. Bande mu dikyesi dyene musamu wumunyi wu Bufumu bu Nzambi wugonelonzu, mutu mutu agonerageme mu nyingene. 17Yulu ne tsi bigurungule wuvyoge te nisi ma murendu wumukyeki gu mugage wusaketsyemuge.

18Pasi dibagele dikepunze mugatsyandi nubeyonge wumoosi, atsevage butswari; ne wukeyonge mugyetu wupunzu ne mulumyandi, amevage butswari.»

Nongu yi yikiti ne mutu wulugu re Lasare

19Kere vane Sesu atu nongu re: «Dibagele di yikiti, adwarenge ke bidwari bibinyi, bi mafunu mamanene ne wisi wotsu avagenge ke mayayi ma wuyi ne wunu nulaba yinyunge. 20Dibagele dimoosi di disaandi, ndugandi Lasare abile wulame ve mure ndagu yi yikiti. Abile ne bapure mu nyuru yotsu. 21Abilenge ne nzale wuyi bigyegise bilagisenge yikiti ve yanga yandi ve take te asavegungu; ne bamonde barugenge muvete bapure bandi. 22Ve yulu vane, disaandi afu ne bakime ba yulu ba Nzambi babage yandi gu yulu ve mbare Abaraam. Yikiti ne yandi gandi afu ne averu. 23Vebile yandi gu tsengi yi babafu, alabenge maguge ma mbili. Asimbule misu ne alabilile gu vale Abaraam ne Lasare ve mbarandi. 24Ne vane, abwamugu re: “Tate Abaraam labe me dingyebe ne sindige Lasare mulobe kodu mulembu wandi gu mambe nu tsolise dibere mu dilimi dyami, mumbare magonelabe maguge mambili gugare mbawu yime yiyi.” 25Abaraam ayagule yandi re: “Mwanami, rangimine re yidilenge mbili manyi ve bilenge yu monyu gu tsi, te Lasare alabenge mbili maguge. Mu dikyesi didi, Lasare agonedile manyi gu yitsige gigi, ga yu yigonelabe maguge. 26Ne gandi ve ganegare manenu guyi mbengi yiyinene mure babakerondenge burugu gu yetu mu wusabugu gu yenu, basakerungule, ne babakerondenge burugu gu yenu mu wusabugu gu yetu basakerungule.” 27Yikiti ayagule re: “Kokolwagu tate, kagu gabile re nane sindige Lasare gu yitsuku gi tate, 28mumbare mane baane ba mame baranu bababagele. Ayendi mu wulubuse yawu mure bakereruge ne yawu gu yitsige gi maguge gigi.” 29Abaraam agabusile yandi re: “Baane bangwagu bayi ne migage mi Muyise ne migande mi babigitsi mu lubuse yawu, bayululu myo.” 30Yikiti agabusile yandi re: “Tate Abaraam, ga mutu wumoosi ve ganegare babafu asayende mu lubuse yawu, disake nonge ne basakekalule bitsagilitsi.” 31Te Abaraam ayambile yandi re: “Ga basayululu migage mi Muyise ne migande mi babigitsi, nisi mutu atserambugu gu difu, basakesinge wukalule bitsagilitsi.”»