Luk 17 | SnqSC | STEP | Sesu ayambile bayikitsi bandi re: «Makyesi motsu gugubilenge mambu makelagisenge batu mu mabi. Te maguge gu yandi wukelagise mbatsi mu mo.

Luke 17

Dibi ne kokolu

1 Sesu ayambile bayikitsi bandi re: «Makyesi motsu gugubilenge mambu makelagisenge batu mu mabi. Te maguge gu yandi wukelagise mbatsi mu mo. 2 Mutu wene bwedi adwisu dimanyi didinene mu digore, nuveru gu mubu mure akerelagise mutu wuganene bile ne gitu gi ngyenze. 3 Kagu rambilanu!

Mwane tayagu agavagile yu dyambu didibi, sembe yandi. Agasinge mbelandi, singile yandi kokolu. 4 Agavagile yu dibi makyesi tsambu mu wisi ne ga aruge makyesi tsambu mu wisi mu vonde yu kokolu, yisingile yandi kokolu.»

Gitu

5 Bakime bayambile Fumu re: «Konde yetu gitu.» 6 Fumu ayagule yawu re: «Yenu ga dibile ne gitu gigikyeki munongu wumosi ga mubi wu dilusi, yenu digurungule yambile ne mwiri wuwu re: “Tsulugu ne yende sumeme gu gare mubu”, ne wo wuguyululu yenu.

Yisalu gi musalitsi

7 Nonge nuyelige: wumoosi ve ganegarenu arebile ne musalitsi wukadyanzi gu banungi vore wukakyeli bibodu. Veketutugu yandi gu banungi, aguyambile nde re ruge nyavu muyi ve taka? 8 Sanane, aguyambile musalitsi nde re: “Lambile me yilambu gyami, kere yikevinze bidwari mu sunzile me kure. Vekemane me wuyi ne wunu, ve yulu vane, yikeyi ne wunu ve dyagu dikyesi.” 9 Basakagabusi dinyi gu musalitsi mumbare atsedyanze ke natserumu yandi. 10 Munongu wumoosi ne yenu ga dimedyanze byotsu bitserumu yenu ne Nzambi, yambilanu re: “Yetu ke basalitsi bagane tsongu ditsedyanze ke yisalu gyetu.”»

Sesu abeluse digumi di batu bange makyedi

11 Sesu ayende tselu yi Serusaleme. Avyoge ve pwase divule di Samari ne Galilé. 12 Ve nyingene yandi gu dimbu dimoosi, digumi di batu bange makyedi baruge mu bengunu nandi. Babile vale ne Sesu. 13 Babwamugu re: «Sesu, Mulonzi, labe yetu dingyebe!» 14 Sesu nulabe yawu, ayambile re: «Yendanu muritsige manyuru menu gu bavegitsi ba malagu.» Ve yendenge yawu, babelugu. 15 Ve labe wumoosi re amebelugu, agabugu mu matambi nugitse Nzambi pepe. 16 Ve pule yandi ve wusu Sesu, asume makotulu, mbalenge mu mutambe nugabusile yandi dinyi. Mutu wene bile mwisi Samari. 17 Ne vane, Sesu ayambile re: «Nga batu botsu ba digumi batsebelugu, ake yiwe gi bane batu bande gunyi? 18 Gusandi mutu wutsetase wugabugu mu gabusile Nzambi dinyi, vengu ke mwenyi wuwu.» 19 Kere vane Sesu ayambile yandi re: «Teleme, yendenge, gitu gyagu gitseyobule yu.»

Mwitsu wu Bufumu bu Nzambi

20 Bafwarisi bayubule Sesu dikyesi dikeruge Bufumu bu Nzambi. Ayagule yawu re: «Bufumu bu Nzambi busakeruge ga yivave gikalabeni ne misu. 21 Gusakebile wisi wuke yambulu yenu re: “Bufumu bu Nzambi bwobu.” Vore: “Bwobune gunaa.” Ne vane yabanu re Bufumu bu Nzambi bukeke ve ganegarenu.»

22 Kere Sesu ayambile bayikitsi re: «Gugubile dikyesi dikeronde yenu wulabe Mwane mutu nisi ke wisi wumoosi, te yenu disakelabe yandi. 23 Ne vane, yenu diguyambulu re: “Ranaa, vore rawu!” Te yenu diyayende, diyababise yende gune. 24 Yabanu re nakalabeni mukakadi gu yulu mutsombuse yivele gyandi tsombu ne tsombu, ne Mwane mutu agulabunu munongu wumoosi mu wisi wandi. 25 Te wisi wene ne gi wupule, bwedi arenelabe maguge mambili nubusu ne batu bane munyi. 26 Mambu mavyoge mu dikyesi di Noé magubile munongu wumoosi mu wisi wukeruge Mwane mutu. 27 Batu bayangenge ne banwangenge, bayongenenge ne bayongisenge baane bawu, kwanga ne mu wisi wu Noé anyingene gu mbungu; ne vane, nyidu yiyinene yigudise yawu botsu. 28 Mambu maguvyogenge ga navyogenge mo mu dikyesi di Lote. Batu bayangenge ne banwangenge, basumbenge ne basumbisenge, bavarenge ne barungenge. 29 Te wisi wuburugu Lote gu Sodome, Nzambi alagise mamanyi ma mbawu ga fule, ne batu botsu bagude. 30 Nane re nakevagenge batu mambu kwanga ne mu wisi wukeruge Mwane mutu.

31 Mu wisi wene, mutu wukebile gu yulu mwanze ndagwandi ayasunde mubonge bivave byandi, ne mutu wukebile gu banungi ayagabugu gu ndagwandi. 32 Bangulanu dyambu divyoge mu mugatsi Lote! ^{▼▼Dibandu 19.17, 26.} 33 Wotsu wukebene kyele monyu wandi mu tsi yi, asakedile monyu wu mubu ne mubu. Te wotsu wuketsyemuse monyu wandi mu tsi yi mu me, agudile monyu wu ngyenze. 34 Mayambile yenu, mu dibati dyene, batu babeyi babakebile tangi moosi. Wumoosi agubongu, wune agusisu. 35 Bagyetu babeyi bagurokenge baputu. Wumoosi agubongu, wuna agusisu. 36 Babagele babeyi bagubile gu nungi. Wumoosi agubongu, wune agusisu.» ^{▼▼Migande mimosi misandi ne yirini gyene.} 37 Ne vane, bayikitsi batombe Sesu re: «Mambu mene maguvyoge nde gunyi?» Ayagule yawu re: «Ve yitsige gikabile fumbi, vane gandi re vakadugesene banyunge. ^{▼▼Divindugulu di nongwene re: Gusandi mutu wukerine mutsundu wu Nzambi.}»