Luk 19 | SnqSC | STEP | Sesu apule gu Seriko, asabugenge divule.

Luke 19

Sesu yane Sasé

1 Sesu apule gu Seriko, asabugenge divule. 2 Ne vane, vebile mutu dine dyandi Sasé. Abile yivunde gi bayakitsi ba lepu ne abile yikiti. 3 Abenenge wulabe nyi wubile Sesu. Te ve bile yandi ne yitele gi gigufi aserungule, mumbare gubile piti yirage. 4 Aregile mbangu gu mawusu ne abare gu mwiri wu sikomore mu wulabe Sesu wukevyoge vane. 5 Ve pule Sesu ve yitsige gyena, asimbule misu nuyambile nandi re: «Sasé, lenge wusunde ne munyi wuwu makalami gu ndagwagu!» 6 Sasé asunde nyavu nuyake Sesu ne yinyunge. 7 Botsu babalabe dyo, ba gyelenge yandi re: «Mutu wuwu amende lame gu ndagu yi mutu nge mabi!» 8 Ve pule yawu gu ndagu, Sasé ateleme ve wusu Fumu ne ayambile yandi re: «Fumu magupase busine bwami ve time muvege masaandi ne ga mabongile mutu badole tsi vyogilile, magugabusile yandi makabu mamane wuvyogilile.» 9 Kere vane Sesu ayambile yandi re: «Ne munyi Nzambi ameyobule batu be ndagu yiyi, mumbare Sasé ne yu yi gu yitsuku gi Abaraam! 10 Re mu dyo, Mwane mutu aruge mubene ne muyobule bababile batsyemugu.»

Musamu wu basalitsi bareru

11 Sesu ne batu babayulungu mambu mayambilenge yandi, bayendenge ngwu ne vepule yawu bebele ne Serusaleme. Batu batasenge mubu re Bufumu bu Nzambi bugulabene pasi dikyesi. 12 Ne vane, Sesu anyigule yawu nongu yiyi: «Mutu wumosi wu mundumbe ayende gu tsengi yi vale gu vegu dinyange di wubile maate, kere aregabugu. 13 Negi mwendu, atsitse digumi di basalitsi bandi. Avege mutu mutu dikabu di ngyenze dibadole. Ayambile yawu re: “Vaganu mukite mu funyule badole bene kwanga ne vakeruge me.” 14 Te batu ba tsengyandi bakolenge yandi; gu nzimandi basindige bakime mu yambile yandi re: “Yetu diseronde re dibili gutsi dinyange dyandi.” 15 Te nisi nane bavege yandi dinyange dyene ne agabugu gu tsengyandi. Atsitsise basalitsi babavegu badole nandi muyabe nzi yidile yawu. 16 Wu marege aruge ne ayambile re: “Mulonzi, ve yulu dikabu dibadole tsiyivege me, matsefunyule digumi di makabu.” 17 Maate ayambile yandi re: “Bwedi, yinde musalitsi wumunyi. Yibetsi wumunyi mu bivave bi pesu, re mu dyo bonge dinyange di wukume mu digumi di mavule.” 18 Musalitsi wu mubeyi aruge ne ayambile re: “Mulonzi, ve yulu dikabu diyivege me matsefunyule makabu maranu.” 19 Maate ayambile ne wune re: “Yu, bonge dinyange di wukume mu mavule maranu.” 20 Musalitsi wumosi aruge ne ayambile re: “Mulonzi, labe dikabu diyivege me, maswege dyo mu didite di muswari. 21 Mabile ne wome wagu mumbare yinde mutu wu page: Yikabongi badole bagakyele yu ne yikabuki bigavare yu.” 22 Maate ayagule yandi re: “Yinde musalitsi wu mubi, magusosise yu mu mabigu matsetube yibene. Yiyabenge re mayi mutu wu page, makabongi bigakyele me ne makabuki bigavare me. 23 Ake mugi yiseswege dikabu dyene gu dimanyi dikafunyuli badole mure ve keruge me makebonge dyo ne bagundige?” 24 Kere vane maate ayambile bababile vane re: “Dumbanu yandi dikabu di badole di nandi ne veganu dyo gu wune digumi.” 25 Yawu bayambile yandi re: “Mulonzi, nga wune akeke ne digumi di makabu ma badole!” 26 Maate ayagule yawu re: “Masigimise yenu dyo re, bagukonde wotsu wune gyo; te gu wusandi ne gyo agudumbu nisi ma nzi yigonetase yandi re ane yo. 27 Te gu yawu bakolitsi bami, babasaronde re mabili maate mawu, ruganu nawu gunu ne bokanu yawu ve misu mami.”»

Sesu amende gu Serusaleme

28 Ve mane Sesu wuyambile nane, ayende ve wusu piti mu wumake gu Serusaleme. 29 Sesu agogule bebele ne divule di Betefage ne di Betani, tselu yi mukongu wu miri mi ba olive. Asindige bayikitsi babeyi. 30 Ayambile yawu re: «Yendanu gu dimbu di ve wuswenu. Veke pule yenu gune, digudagise yibodu gitungulu gi ganene tsagululu. Nyangulanu gyo ne baganu gyo gunu. 31 Ga mutu atombe yenu re: “Mugi yenu digonenyangule gyo?”, yambilanu yandi re: “Fumu anenzale gyo.”»

32 Bakime bayende ne badagise mambu motsu ke nave yambile Sesu. 33 Ve nyangulenge yawu yibodu, bonge gyo batombe yawu re: «Mugi yenu digonenyangule yibodu gine?» 34 Bayagule re: «Fumu anenzale gyo.» 35 Kere vane bayende ne yibodu gu Sesu. Bayale bidwari byawu mu gyo ne banakige Sesu. 36 Ve yendenge Sesu, batu bayalilenge yandi bidwari byawu mu nzile, ayendenge mu yulu byo. 37 Abile keke bebele ne Serusaleme, kyesi yi divindumunu di mukongu wu miri mi ba olive. Ne vane, piti yotsu yi bayikitsi bandi babile ne yinyunge ne bagitse Nzambi pepe mu mambu motsu mabivinge malabe yawu. 38 Bayambilenge re: «Nzambi avegi myule gu Fumu yikarugi mu dine dyandi! Polu yibili gu yulu ne bundumbe bubili gu Nzambi Pungu!» 39 Dikabu di bafwarisi bababile gugare piti bayambile Sesu re: «Mulonzi, rume bayikitsi bagu barumbi.» 40 Sesu ayagule yawu re: «Mayambile yenu ga barumbe, nisi mamanyi magubwamuge!»

Sesu agonelile mu dyambu di Serusaleme

41 Ve pule Sesu ve tsombu Serusaleme alabe divule ne alile mu dyo. 42 Ayambile re: «Serusaleme, yisayabe tsenyi yirungule wudile polu ne munyi! Te vave, mambu mene makemaswegu yisakebelabe mo! 43 Yabe re, gu yu, wisi ne mwendu bakolitsi bagu bagurunge yibage mu wurambe yu, bagutsenge yu, bagubamige yu tselu ne tselu. 44 Bagugudise yine batu bagu botsu, basake sise nisi yirike gimoosi va yulu gimosi, mumbare yiseditige dikyesi di Nzambi aruge mu wuvagile yu dinyi.»

Sesu gu ndagu Nzambi

45 Sesu anyingene gu ndagu Nzambi ne apunze babasumbisenge bivave gune. 46 Ayambile yawu re: «Ditendu gu mambu ma Nzambi re: “Ndagwami yigubilenge nde ndagu disambulu.” Te yenu dimakaluse yo yiswemulu gi bayibitsi!»

47 Sesu alonzenge tsufu tsyotsu gu ndagu Nzambi. Bivunde bi basambilitsi ba malagu, batenditsi ba migage ne bivunde bi dimbu babenenge wubokise yandi. 48 Te basedile disuge mumbare batu botsu bavere maru mawu muyulu mambu motsu ma yambilenge Sesu.