Luke 21

Mukwili mugyetu wu disaandi

1Wisi wumoosi, Sesu abile gu dikange di ndagu Nzambi, amonigenge nave sunzenge bikiti badole gu byeve bi manzolu gu ndagu Nzambi. 2Alabe keke ne mukwili mugyetu wu disaandi asunze fure beyi tsi gane tsongu yingyenze. 3Sesu ayambile re: «Nungyenze mayambile yenu mukwili wu disaandi wuwu atsevege badole wuvyogilile batu botsu, 4bane botsu batsevege ke badole tsisabile yawu ne zale. Te yandi gugare busaandi bwandi, atsevege nzi yotsu yitsesale nandi mu wuyi.»

Sesu alubuse mu dyambu di ndagu Nzambi yikepanzu

5Kere vane batu bayambilenge mu dyambu di ndagu Nzambi re: «Labanu buvwandi bu ndagu Nzambi yiyi nanoku yo ne muboti mamanyi ne birungu bimosi bivege batu badole gu Nzambi.» 6Te Sesu ayagule yawu re: «Nisi nagonelabe yenu byotsu bibi, wisi ne mwendu byotsu bigupanzige, gusakesale dimanyi nisi dimoosi ve yulu dine.»

Bilimbe bikelabene bebele ne disukusulu di buloongu

7Batu bene babetombe Sesu re: «Mulonzi, mambu mene magulabene nde dikyesi dinyi? Ake diguyabe dyo nde tsenyi?» 8Sesu ayagule yawu re: «Dirambile, batu bakeredungimise yenu. Nisi nzoku batu baguruge mu dine dyami, baguyambilenge re: “Mare wusoolu ne Nzambi!” Ne: “Dikyesi dikeke bebele.” Diyasinge makeyambilenge batu bene. 9Vekeyulu yenu bayambile mu dyambu di mitsingu ne mu mambu ma dimbunge, diyayulu wome. Mambu mene bwedi marenenelabene, te sakenenebile disukusulu di buloongu.» 10Kere vane Sesu akonde re: «Batsengi ne batsengi bagulwanenge, bafumu bagulwanenge yawu ne yawu. 11Mutambe wuguregeme mbili. Nzale ne bivunge bigudugulu mbili misengi. Gugulabene mambu ma bivinge ne bilimbe bibinene bikeburugu gu yulu. Ne vane batu bagugangu ne wome wu mbili.

Mambu makerugile bayikitsi ba Sesu

12Mambu mene negiwulabene yenu digugangu ne digutsogusu. Yenu diguyakusu mu bandagu ba masambulu mu wusosusu. Digunyingusu gu tsugu, digubagu ve wusu bamaate ne ve wusu bivunde bi misengi, mu dine dyami. 13Vane kebile re dikyesi dikeyambile yenu bumwenyi bwami mu mambu motsu matselabe yenu. 14Yabanu re vekeyenda yenu ve wusu bivovi, diyabile ne kyere mu mikalu mikeyagula yenu mukare manyuru menu. 15Mabene maguvege yenu buyedi ne mabigu masakerungule wugigule vore wuyagule mutu nisi wumoosi ve ganegare bakolitsi benu. 16Batayi benu ne bangwenu ne baane bangwenu ba babagele ne ba bagyetu ne bakinde benu ne bambatsi benu bagugabe yenu, bagubokise bambili ve ganegarenu. 17Yenu digukolu ne batu botsu mu dyambu di dine dyami. 18Te gusandi dinange nisi dimoosi gu myuru myenu dikelage. 19Gwaranu: nane re nakeyobule yenu myonyu myenu.

Mutsundu wu Serusaleme

20Vekelabe yenu mabadi ma migole bamatsenge Serusaleme, yabanu re, divule disaketsinge nupanzu. 21Mu dikyesi dyene babakebile gu Sudé barine mu yesweme gu mikongu, babakebile gu gare Serusaleme babuli divule dyene, babakebile gu banungi bayabegabugu gu divule dyene. 22Nane re nakekilise Nzambi yitsuku gyandi, mu wusupule motsu matendu mu mabigu mandi. 23Maguge gu bagyetu babakebile ne mimi ne gu yawu babakenwisenge mu batsufu tsyene! Nungyenze, Nzambi agutsogise bisi Serusaleme, kabwandi yigubile mu yitsuku gyene. 24Bane baguboku ne mayenge, bamosi bagubagwa mu batsengi tsimosi ne wusunzwa mu batsugu. Bakolitsi ba Nzambi bagupanze Serusaleme kwange ne vekevu dikyesi di singusu yawu ne Nzambi.»

Vekeruge Mwane mutu

25Sesu abekonde yambile re: «Mambu ma bivinge magulabene gu gare dyumbi, gu gare tsungi ne gu gare banyetse. Mu mutambe, batu bamu batsengi bagulabe wome wu mbili, mu divuve didinene di mingibe mi mubu. 26Batu bagufu ne wome, mutase mambu makarugi gu mutambe, mumbare Nzambi agutsukimise bungudu bu yulu. 27Ve yulu mambu mene motsu, bagulabe Mwane mutu agwitse gu gare yipume, ne mbili bungudu bwandi ne bundumbe bwandi. 28Vekebande labe yenu mambu mene, sunzanu mirime, gwaranu mumbare Nzambi asaketsinge ne wuyobulu yenu.»

Bufumu bu Nzambi bukeke bebele

29Kere Sesu atwile bayikitsi bandi nongu yiyi: «Beminanu munzangele ne miri mine myotsu. 30Vekalabi yenu magayi mawu makebande wubende, yabanu re mutubu wukeke bebele. 31Munongu wumoosi, vekelabe yenu mambu mene yabane re Bufumu bu Nzambi bukelabene. 32Mayambile yenu nungyenze batu ba nemunyi wuwu basakenenefu botsu gugalabe mambu mene. 33Yulu ne tsi biguvyoge, te mabigu mami masakevyoge.

Bwedi mu wurambile

34Dirambile! Diyavyose dikyesi dyenu muvage mayayi, diyavyose dikyesi dyenu ne wunwange malamu ne wulange, vore ne wubile ne munyongu mu monyu, mbe yenu disakeyabe wisi wukeruge Mwane mutu. 35Nakakobi yibere tsundugu gu disinge, dikebile wisi wene re nane gu batu ba buloongu. 36Yenu diyalame byolu sambilenganu ne yikodi. Ne vane yenu digudile ngudi yi wugwarile mu motsu makeruge. Yenu dikelunzu ne Mwane mutu.»

37Bawisi botsu Sesu alonzenge ne nyangu gu ndagu Nzambi; kere ne tsisige, ayendenge gu wulame gu mukongu wu miri mi ba olive. 38Batu botsu barugenge ne yipali gu ndagu Nzambi mu yulu nalonzenge Sesu.