Luk 22 | SnqSC | STEP | Diyayi di mape magarufuge dibile keke bebele. Ne dyo dikatsitsu re Pake.

Luke 22

Pangu mu wuboke Sesu

1 Diyayi di mape magarufuge dibile keke bebele. Ne dyo dikatsitsu re Pake. 2 Bivunde bi bavegitsi ba malagu ne batenditsi ba migage babenenge disuge di wubokise Sesu, te balabe wome batu.

3 Ne vane Sate anyingene gugare murime wu Suda, wukatsitsu re Iskaryote, wubile gu gare digumi ne babeyi di bayikitsi ba Sesu. 4 Ayende gu yulusunu ne bivunde bi bavegitsi ba malagu ne bi bakyelitsi ba ndagu Nzambi, mu wubene disuge di wugabe Sesu. 5 Bivunde balabe wunyi ne bapute pangu mu wuvege Suda badole. 6 Suda asinge ne abene dikyesi diyelimine mugabe Sesu gugayabise piti.

Sesu alambise yilambu gi Pake

7 Wisi wu diyayi dikayu mape magarufuge ne dikaboku mwane yindombe mu yilambu gi Pake wupule. 8 Sesu asindige Pyere ne Sa nuyambile re: «Yendanu gu lambile yetu yilambu gi diyaye di Pake.» 9 Yawu batombe Sesu re: «Yetu diyelambe gyo nde gunyi?» 10 Ayagule yawu re: «Vekepule yenu gu divule, digubengunu ne dibagele ne tsuve mambe gu yulu muru. Landanu yandi ngwu ne gu ndagu yikenyingene yandi. 11 Yambilanu nge ndagwene re: “Mulonzi agonetombe yu re: Itsige gikeyi mane bayikitsi bami yilambu gi Pake gi nde gunyi?” 12 Dibagele dyene agulonze yenu yirini giginene gi ndagu ndeki ^{▼▼Ndagu ndeki re ndagu yine birini bimosi gu yulu.}, gine bivave byotsu biduge. Gwuna re gukelambe yenu gyo.» 13 Ne vane bayende. Badagise mambu motsu nayambulu yawu ne Sesu ne balambe yilambu gi Pake.

Yilambu gi Fumu

14 Ve pule digwere diwuyi, Sesu ne bayikitsi bandi batsagele ve take. 15 Sesu ayambile yawu re: «Negyunenelabe maguge, mabile ne nzale yiyinene muyi yilambu gi Pake gigi nenu. 16 Te mayambile yenu nungyenze, masakebeyi yilambu gyene kwange ne mu wisi wu Nzambi yabene aguvege gyo gu Bufumu bwandi.» 17 Kere vane bayikitsi bavege Sesu kopu yi malamu. Abonge yo ne agabuse dinyi gu Nzambi, kere ayambile yawu re: «Bonganu kopu yi malamu yiyi gabenanu. 18 Te mayambile yenu nungyenze, masakebenu malamu mame kwange ne vekeruge Bufumu bu Nzambi.» 19 Kere vane abonge dipe. Ve mane yandi wugabuse dinyi gu Nzambi, atabule dipe ne agabile bayikitsi nuyambile re: «Dipe didi re nyurwani yikevegu mu yenu. Yangenganu dyo mu wutasilenge me.» 20 Ve mane yawu wuyi, Sesu abonge kopu yi malamu, ayambile re: «Malamu mame re yinongu gimone ve ganegare Nzambi ne batu bandi mumbare malungu mami magutsole mu yenu. 21 Te yabanu re, mutu wukegabe me, agoneyi nami vave. 22 Nzambi amaneyambile re Mwane mutu agufu. Te mulogu gu mutu wukegabe yandi!» 23 Ne vane bayikitsi babande tombene yawu ne yawu re: «Wukerungule wuvage dine dyambu ve pwase manenu nde nyi?»

Wuvyogilile buvunde nde nyi?

24 Kere vane bayikitsi babile ne musosu wumunene muyabe ve gane garawu nyi wuvyogilile buvunde. 25 Sesu ayambile yawu re: «Bamaate ba buloongu baronde tsare batu bagutsi dirumu dyawu, ne bange dinyange bakarondi wutsitsungu re batu babanyi. 26 Yenu diyavage ga yawu. Te wuvyogigile buvunde abili ga mwane ngyebe, ne wugonerume abili ga musalitsi. 27 Vavene, wuvyogilile buvunde nde wugoneyi vore nde musalitsi wugonebage kure? Nde wugoneyi. Nisi name me mulonzi wenu, mayi ve ganegarenu ga musalitsi. 28 Yenu ditsetsagelenge nami vetselabenge me maguge. 29 Re dibandu nave vegu me Bufumu ne Tate ne me gandi mavege yenu bwo. 30 Ne vane yenu diguyi ne wunu nami gu Bufumu bwami, yenu digutsagele mu bakwange musosise digumi ne bibandu bibeyi bi baane ba Israel.»

Pyere alubusu

31 Sesu atsitse Simu Pyere nuyambile yandi re: «Simu, Simu, yirambile! Sate atsetombe Nzambi dinyange mutsukimise yu ne mambu ma page, navekatsukumusu bambi mu bipupu. 32 Te matsesambile mu yu mure yikeretsyemuse gitu gyagu. Te vekegabuge yu gu me, gwarise baane ba Tayagu.» 33 Pyere ayagule re: «Fumu, make ngwu muyende gu tsugu nagu ne mu wufu nagu.» 34 Sesu akalule re: «Pyere, koku ne ginekore ne munyi, yigurune me nyongu yireru.»

Badole ne pengi ne diyenge

35 Kere vane Sesu ayambile bayikitsi re: «Ve masindigenge yenu guga nisi badole, guga nisi pengi, guga nisi matambi, yenu dibunungu yivava?» Bayagule re: «Disebunungu yivave.» 36 Sesu ayambile yawu re: «Te ne mapape gu sakebebile nane mumbare wune badole abongi tsio, munongu wumoosi ga wukebile ne pengi. Wusane dinyenge asumbisi yigubuku gyandi, badole tsikedile yandi asumbi diyenge. 37 Mayambile yenu, bwedi re motsu matendu gu mugande wu Nzambi mu me, malabeni: “Batu batale yandi gu gare mibongi.” Nungyenze mayambile yenu, bwedi motsu matendu mu me, marugili me. Nungyenze ne motsu matendu mu me makelabene.» 38 Bayikitsi bayambile Sesu re: «Fumu, mayenge mabeyi momame.» Sesu ayagule yawu re: «Bivane.»

Disambulu gu mukongu wu ba olive

39 Ne vane, Sesu apule ne ayende ga navaga yandi ne kale gu mukongu wu ba olive. Bayikitsi bandi balande yandi. 40 Ve pule yawu ve mbure yibile Sesu, ayambile yawu re: «Sambilanu mure yenu dikerelage gu dimangu.» 41 Sesu aburugu ve bayikitsi bandi ne ayende ve gigili. Asume makotulu re asambile. 42 Ayambile re: «Tate, ga yironde burulile me kopu yi maguge yiyi! Nisi nane, yiyavage naronde me, te vage naronde yu.» [ 43 Ne vane kime moosi yi yulu yitutugile yandi mu wugwarise yandi. 44 Sesu agangu ne wome wu mbili ne asambile Nzambi ne ngudi. Dirugeme dyandi ditsolenge ve mutambe ga mabere ma malungu. ^{▼▼Gu mbili mirendu gusandi mabigu mame.}]

45 Ve mane Sesu wusambile, arambugu, agabugu gu bayikitsi. Adagise yawu byolu bi munyongu. 46 Ayambile yawu re: «Mugi yenu diyi byolu? Rambuganu, sambilanu mure yenu dikerelage gu dimangu.»

Sesu agangu

47 Ve yambilenge Sesu nane, piti yi batu yitsange. Kime moosi ve ganegare digumi ne babeyi, wukatsitsu re Suda, abile ve wusu piti. Agogule ve mbare Sesu mu wusambene nandi. 48 Sesu ayambile yandi re: «Suda, re mu wusambene, yikegabe Mwane mutwa!» 49 Bayikitsi ba Sesu balabenge mavyogenge. Batombe yandi re: «Fumu, yetu didimbi ne diyenga?» 50 Wumoosi ve pwase bakime ba Sesu apuse diyenge dyandi adimbe musalitsi wu yivunde gi bavegitsi ba malagu ne atabule dyaru dyandi di mabagele. 51 Te Sesu ayambile re: «Sisanu! Diyavage nane.» Agange dyaru di musalitsi ne abeluse yandi. 52 Ne vane Sesu ayambile ne bivunde bi bavetsitsi ba malagu, ne bivunde babakyelenge ndagu disambulu, ne bivunde bi dibundu babayitse gange yandi re: «Yenu dimitse ne mayenge ne batungu were dimende gugange mubongi! 53 Batsufu tsyotsu matsetsagelenge nenu gu ndagu Nzambi ne yenu disabene wugange me. Te ne mapape re digwere dyenu. Didi re dikyesi dikedyanze ngudi yi mambu ma diviseme.»

Pyere arune Sesu

54 Ne vane, bagange Sesu ne bayende nandi ne banyingise yandi gu ndagu yivunde gi bavegitsi ba malagu. Pyere akungeme ne alandenge yawu ayi gu vale. 55 Babange mubige ve gane gare dikange. Batu batsagele ve tungu mbawu ne Pyere atsagele nawu. 56 Numbe musalitsi wumoosi wu mugyetu alabe Pyere matsagele ve tungu mubige. Abemine yandi yiswisu ne ayambile re: «Ne dibagale didi abile ne Sesu!» 57 Te Pyere ayagule mugyetu wene re: «Maseyabe yandi!» 58 Ma makyesi mavyoge, mutu wumosi abelabe Pyere ne ayambile re: «Ne yu, yi gugare bayikitsi ba Sesu!» Te Pyere agabusile dibagele dyene re: «Ee, sa me!» 59 Digwere ne wuvyoge, mutu wumosi asigimise nuyambile re: «Nungyenze wuwu abile ne Sesu mumbare yandi ayi mwisi Galilé.» 60 Te Pyere ayagule re: «Maseyabe digoneronde yambile yu.» Mu dikyesi diyambilenge yandi, koku yikore. 61 Fumu agyelugu ne wubemine Pyere yiswisu. Ne vane Pyere abangule mabigu mayambulu yandi ne Fumu re: «Ne munyi koku neginekore, yigurune me marune mareru.» 62 Pyere avate gu dikange ne wulile mbili.

Sesu asosusu

63 Batu babakyelenge Sesu badetenge yandi ne badimbenge yandi. 64 Yawu badibige wusu wandi ne batombenge yandi re: «Wumedimbe yu nde nyi? Soke!» 65 Ve yulu vane batu basengenge yandi ne mbili mabigu ma deti.

Sesu ve wusu bivunde bi basifu

66 Ve gi wisi, bivunde bi basifu ne bivunde bi bavegitsi ba malagu ne batenditsi ba migage, badugesene, barugise Sesu ve wuswawu. 67 Babande wusosise yandi ne wutombe yandi re: «Yambile yetu, yire wusindugu ne Nzambya?» Sesu ayagule yawu re: «Ga mayambile yenu disakesinge re nungyenze. 68 Maredume yenu nzidu, yenu disakeyagule me. 69 Te ne mapape, Mwane mutu agubile matsagele ve mabagele ma Nzambi yine ngudi yi vyogilile.» 70 Ne vane botsu bayambile yandi re: «Kagu yinde Mwane Nzambya?» Ayagule yawu re: «Yenu bene re badimeyambile: re me.» 71 Ne vane bayambelenenge yawu ne yawu re: «Yetu disage ne nzale bimwenyi! Ditsemane yulu yetu bene mabigu matsevate gu mune wandi!»