Luke 4

Sesu agwarile mu dimangu

1Ve burugu Sesu gu Surde abile wubasu ne Dinyunyi di Sungeme, ne Dinyunyi dyene diyenze yandi gu kumu. 2Gwune, amangu ne mukolitsi mu magumi mamane ma batsufu ne aseyi mu batsufu tsyene, ve vu batsufu tsyene ayulu nzale. 3Kerevane mukolitsi ayambile yandi re: «Mumbare yire Mwane Nzambi, rume dimanyi didi dikalugi dipe.» 4Sesu agabusile yandi re: «Ditendu gu mambu ma Nzambi re: “Monyu wu mutu sake muyi dipe pinze.”»

5Kerevane mukolitsi ayende nandi guga yulu. Vane ne vane aritsige yandi batsengi tsyotsu tsi buloongu, 6ne wuyambile re: «Maguvege yu busine ne bundumbe bu batsengi tsyene. Mare wuvegu bine byotsu ne marungule wuvege byo gu wotsu wumakeronde.» 7Kagu ga yibondimine me, maguvege yu bivave byene byotsu! 8Sesu amugabusile re: «Ditendu mu mambu ma Nzambi re: Bondimine ke Fumwagu Nzambi, ne wusalile ke yandi pinze.» 9Ve yulu vane mukolitsi ayende nandi gu Serusaleme, anakige yandi gu yulu mwanze wu ndagu Nzambi. Ne amuyambile re: «Ve yu Mwane Nzambi, vele ne gu tsi! 10Mumbare ditendu gu mambu ma Nzambi re: Nzambi agurume bakime bandi bagu yulu mukyele yu.» 11Nevane baguyake yu mu myogu myawu mure yikere gubegene gyoru mu dimanyi. 12Sesu agabusile yandi re: «Ditendu mu mambu ma Nzambi re: “Yiyamange Fumwagu Nzambi.”» 13Ve vu masuge motsu mumange Sesu, mukolitsi aburugu ve yandi kwanga ne mu dikyesi dimosi diyelimine dikeronde Nzambi.

Sesu abande mudyanzu wandi gu Galilé.

14Sesu agabuge gu Galilé wubasu ne bungudu bu Dinyunyi di Sungeme. Tsangwandi yitsamugu mu musengi wotsu. 15Alonzenge gu bandagu tsi bibengunu bi masambulu, ne batu botsu bakumisenge yandi.

Sesu abusu ne bandi

16Wisi wumoosi Sesu ayende gu Nasarete gu bungugu yandi. Mu wisi wukaloogi basifu anyingene gu ndagu disambulu navagenge yandi ne kale. Ne ateleme murange mabigu. 17Bavege yandi mugande wu mubigitsi Yisayi, anyangule wo ve yitsige gitendu re:
18«Dinyunyi di Fumu diyi mu me,
mumbare asoole me muyende gulonze tsangu yiyinyi gu masaandi.
Asindige me muyambile bisi tsugu re yenu dimayobugu,
ne gu bange pafu re misu menu mamabalugu,
asindige me muyobule babagoneritsugu maguge.
19Mulonze re: Yilime gigi re gikelabe batu botsu manyi ma Fumu.»

20Ve yulu vane Sesu afurige mugande, agabuse wo gu musalitsi, ne atsagele. Batu botsu bababile gu ndagu disambulu, misu mawu mabile keke mu yandi. 21Kerevane Sesu abande wuyambile yawu re: «Mabigu mameyulu yenu matendu mu mugande wu Nzambi mamesupuge ne munyi.» 22Botsu bayambilenge bumwenyi bwandi ne bagibeme mu munongu mabigu ma manyi malonzenge yandi. Bayubulenenge re: «Wuwu sare mwane Susefwa?» 23Sesu ayambile yawu re: «Mayatsi re yenu diguverile me nongu re: “Mubugitsi sabelusi yibene.” Ne yenu digubeyambile me re: “Yetu ditseyulu tsangu yi bimwile byotsu bitsevage yu gu Kapernaum, sakondi wuvage byo gu dimbu dyagu.”» 24Abekonde re: «Nungyenze mayambile yenu, mubigitsi asakagobusu gu dimbu dyandi. 25Nungyenze mayambile yenu, mu dikyesi di mubigitsi Yili, gubile mbili bakwili gu Israel, ve Nzambi asikige fule mu bilime bireru ne yirini, ne nzale yi yinene yidugulu mu tsengi yotsu. 26Yili asesindugu gu bakwili botsu ba Israel vengu gu mukwili wu mwenyi, mwisi Sarepta gu musengi wu Sidon. 27Ne mu dikyesi di mubigitsi Yilisé gubile mbili batu ne makyedi gu Israel te gu yawu botsu gusebeluge mutu nisi wumoosi, vengu Name mwisi Siri.»

28Ve yulu batu botsu bababile gu ndagu disambulu mambu mene, babase ne kabu. 29Yawu bateleme, bapunze Sesu gu dimbu ne bayende nandi gu yulu mukongu wurungu Nasarete divule dyawu, muronde wulikule yandi gu mbengi. 30Te Sesu agyelugu, avyoge vegane garawu nuyendenge.

Sesu apunze dinyunyi didibi

31Kerevane Sesu agulumuge gu Kapernaum, divule di musengi wu Galilé; ne alonzenge batu wisi wukaloogu. 32Bavure gibeme mumbare alonzenge ne dinyange dyotsu. 33Gubile mutu ne dinyunyi didibi gu ndagu disambulu gu lonzenge Sesu ne yandi abwamugu pepe re: 34«O Sesu mwisi Nasarete, yiyagogule gu yetu duke gune, mayatsi re yimitse nde gubunge yetu ne yire wuyelimine, yu wutsesoolu ne Nzambi!» 35Sesu abetile dinyunyi dyene, amuyambile re: «Rumbe, pule gugare mutu wuwu!» Ne dinyunyi di dibi divate, ne dilagise mutu ve gane gare piti gugayulusu yandi pyavi. 36Botsu bavure gibeme ne bayambilenge yawu ne yawu re: «Nungyenze mame mabigu mane ngudi agonerume ne dinyange ne ngudi gu manyunyi mupule. Ne yawu barepule!» 37Ne tsangu yi Sesu yidugulu bitsige byotsu bi musengi.

Sesu abeluse babetsi

38Ve vate Sesu gu ndagu disambulu, anyingene gu ndagu yi Simu. Adagise boyi bu Simu bu mugyetu abile ne yidine girage, ne vane bange ndagu balende Sesu mubeluse yandi. 39Avindemine yandi nubetile yidine, ne gyo givu. Vane ne vane ateleme, ne abande lambile yawu.

40Ve divindemunu di wisi, botsu bababile ne batu bane mabelise ma minongu minongu babage yawu gu Sesu. Asunzile mutu mutu makake nubeluse yawu. 41Manyunyi mamabi gandi mavate mu mbili batu ne wubwamugu re: «Yinde Mwane Nzambi!» Te abetile yawu nukare yawu wuyambile, mumbare manyunyi mene masetsimbungu re yandi re Wusoolu ne Nzambi.

Sesu alonzenge mu bandagu tsi disambulu

42Ne magyelu, Sesu avate gu divule, nuyende ve yitsige gigabile batu. Mbili batu bamubenenge, bapule ve yandi, baronde re abilingi ke nawu. 43Te ayambile yawu re: «Bwedi mareyende gulonze tsangu yiyinyi yi Bufumu bu Nzambi gu misengi misusu mumbare gine re yisalu gisindugu me ne Nzambi mudyanze.» 44Kerevane, alonzenge mu bandagu ba masambulu tsi musengi wu Sudé.